جەكسەنبى, 23 ماۋسىم 2024
3480 2 پىكىر 26 قىركۇيەك, 2019 ساعات 12:00

ترامپ پەن زەلەنسكي نيۋ-يوركتە كەزدەستى

نيۋ-يوركتە اقش پرەزيدەنتى دونالد ترامپ پەن ۋكراينا پرەزيدەنتى ۆلاديمير زەلەنسكي كەزدەستى. مەملەكەت باسشىلارى العاش رەت جۇزدەسىپ وتىر.

كەزدەسۋدە ۋكراينا پرەزيدەنتى جەمقورلىقپەن كۇرەس، ۋكراينا تۇتاستىعىن قالپىنا كەلتىرۋ جانە ەلدىڭ شىعىسىنداعى سوعىسى دوعارۋ - باستى ماقسات ەكەنىن مالىمدەدى. زەلەنسكي ۋكراينادا جەمقورلىققا قارسى سوت قۇرىلعانىن حابارلادى.

ترامپ رەسەيدىڭ قىرىمدى اقش پرەزيدەنتى باراك وباما اكىمشىلىگى كەزىندە اننەكسيالاعانىن ەسكە سالۋدى ءجون كورگەن. پرەزيدەنت زەلەنسكيدىڭ ۋكراينادا جەمقورلىقپەن كۇرەسىپ جاتقانىن قۇپتادى. ترامپ ۋكرايناعا اقش ۇشاتىن قارۋ جەتكىزە باستاعانىن دا ايتتى. ول وبامانى كەزىندە كيەۆكە اسكەري كومەك كورسەتپەگەنى ءۇشىن سىنادى.

ترامپ رەسەي مەن ۋكراينا باسشىلارى كەزدەسىپ، ورتاق ماسەلەلەردى بىرگە تالقىلايدى دەپ ۇمىتتەنەدى. اقش پرەزيدەنتىنىڭ پىكىرىنشە، مۇنداي كەلىسسوز جەمىستى بولار ەدى.

زەلەنسكي اقش-تىڭ ىشكى ساياساتىنا ارالاسۋدى ءجون كورمەيتىنىن ەسكەرتىپ ءوتتى. زەلەنسكي اقش-قا كومەك ەمەس، قولداۋ سۇراپ كەلگەنىن ايتتى.

ماۋسىم ايىنىڭ سوڭىندا پرەزيدەنتتەردىڭ تەلەفون ارقىلى اڭگىمەسىنە توقتالعان زەلەنسكي ول كەزدە ترامپ تاراپىنان ەشقانداي قىسىم كورمەگەنىن جانە وعان ەشقانداي ۋادە بەرمەگەنىن مالىمدەدى. ترامپ پەن زەلەنسكيدىڭ تەلەفونمەن اڭگىمەسىنىڭ ستەنوگرامماسىن اق ءۇي سارسەنبى كۇنى جاريالاعان ەدى.

ستەنوگرامماعا ساي، پرەزيدەنتتەر ەكەۋارا اڭگىمەدە 2020 جىلعى پرەزيدەنت سايلاۋىنا ءتۇسۋدى جوسپارلايتىن دەموكرات دجو بايدەننىڭ ۇلى حانتەر بايدەن تۋرالى ايتقان.

ترامپ پەن زەلەنسكي اراسىنداعى اڭگىمە بەلگىلى بولعاننان كەيىن اقش وكىلدەر پالاتاسىنداعى دەموكراتتار ترامپقا "بەرگەن سەرتىن بۇزعانى ءۇشىن" يمپيچمەنت جاريالاۋ پروتسەسىن باستاعان. 24 قىركۇيەكتە وكىلدەر پالاتاسىنىڭ سپيكەرى نەنسي پەلوسي "ترامپ ءوزىنىڭ سەرتىن بۇزدى، ۇلتتىق قاۋىپسىزدىگىمىز بەن سايلاۋ ينستيتۋتىن ساتىپ كەتتى" دەدى.

Abai.kz
2 پىكىر