مەملەكەت باسشىسى بۇۇ باس حاتشىسىمەن كەزدەستى
قازاقستان پرەزيدەنتى قاسىم-جومارت توقاەۆ بۇۇ باس حاتشىسى انتونيۋ گۋتەرريشپەن كەزدەستى.
بۇگىن نيۋ-يوركتە بۇۇ باس اسسامبلەياسى 74-سەسسياسىنىڭ جۇمىسى اياسىندا قازاقستان پرەزيدەنتى قاسىم-جومارت توقاەۆ بۇۇ باس حاتشىسى انتونيۋ گۋتەرريشپەن كەزدەستى.
كەزدەسۋ بارىسىندا مەملەكەت باسشىسى ۇيىمنىڭ حالىقارالىق تۇراقتىلىق پەن قاۋىپسىزدىكتى قولداۋداعى، حالىقارالىق قاقتىعىستاردىڭ الدىن الۋ مەن رەتتەۋدەگى باسشىلىق ءرولىن اتاپ ءوتتى. قاسىم-جومارت توقاەۆ بۇۇ-نىڭ قازىرگى زامان تالاپتارىنا ساي بەيىمدەلۋىندە انتونيۋ گۋتەرريشتىڭ بەلسەندى قىزمەتىن قولدايتىنىن ءبىلدىردى.
پرەزيدەنت بۇۇ با-نىڭ وسى سەسسياسىندا كوتەرىلىپ وتىرعان "كەدەيلىكپەن كۇرەستى جان-جاقتى كۇشەيتۋدى ىنتالاندىرۋ، ساپالى ءبىلىم بەرۋگە، كليماتتىڭ وزگەرۋىمەن كۇرەس جونىندەگى ءىس-شارالارعا جانە ينكليۋزيۆتىلىككە ىقپال ەتۋ" تاقىرىبى اسا وزەكتى ماسەلە ەكەنىن اتاپ ءوتتى. ونىڭ ايتۋىنشا، قازاقستان بۇۇ-نىڭ 2030 جىلعا دەيىنگى تۇراقتى دامۋ ماقساتتارىن جۇزەگە اسىرۋعا ءازىر. ويتكەنى بۇل قۇجات ءبىزدىڭ ەلدىڭ الداعى ەكونوميكالىق جانە الەۋمەتتىك جاڭعىرتۋ ماسەلەلەرى بويىنشا جاريالاعان جوسپارىمەن ۇندەسەدى.
ءوز كەزەگىندە انتونيۋ گۋتەرريش تۇراقتى دامۋ ماقساتتارىن ىسكە اسىرۋدا قازاقستاننىڭ بىرىككەن ۇلتتار ۇيىمى جۇيەسىمەن ءوزارا ءىس-قيمىلىنا وڭ باعا بەردى. قازاقستاننىڭ جاھاندىق يادرولىق قارۋعا قارسى كۇنتارتىبىندە جەتەكشى ءرول اتقاراتىنى، وڭىرلىك قاقتىعىستاردى رەتتەۋ ىسىندە حالىقارالىق كۇش جۇمىلدىرۋى، سونىڭ ىشىندە سيريا ماسەلەسى بويىنشا وتكەن استانا پروتسەسى اياسىنداعى قوماقتى ۇلەسى ايتىلدى. باس حاتشى قاسىم-جومارت توقاەۆقا 2019 جىلدىڭ مامىر ايىندا بۇۇ-نىڭ 16 ايماقتىق وكىلدىگىن ءبىر شاڭىراق استىنا بىرىكتىرگەن الماتى قالاسىنداعى حالىقارالىق ۇيىمدار عيماراتىن اشقانى ءۇشىن العىس ءبىلدىردى.
كەزدەسۋ بارىسىندا قازاقستان مەن بۇۇ-نىڭ الداعى ءوزارا پراكتيكالىق ءىس-قيمىلىنىڭ پەرسپەكتيۆالارى، ونىڭ ىشىندە ەلىمىزدىڭ حالىقارالىق ۇيىم اياسىندا بىتىمگەرشىلىك وپەراتسيالارعا قاتىسۋدى كەڭەيتۋ مۇمكىندىگى قارالدى. سونىمەن قاتار، تاراپتار الەمدىك ساياساتتىڭ بىرقاتار وزەكتى ماسەلەلەرى بويىنشا دا پىكىر الماستى.
Abai.kz
