جەكسەنبى, 1 قاراشا 2020
COVID-19 قازاقستاندا. جۇقتىرعاندار — 111953. جازىلعاندار — 106310. قايتىس بولعاندار — 1825
1154 0 پىكىر 24 قىركۇيەك, 2019 ساعات 12:22

كوپبالالى انالارعا ارنالعان «جاردەم» باعدارلاماسى جۇزەگە اسىپ جاتىر

قازاقستان بيلىگىنىڭ قازىرگى ۇستانعان جولى ەلدەگى كومەككە مۇقتاج كوپبالالى انالارعا بارىنشا جاعداي جاساۋ بولىپ وتىر. بۇل جايلى كوپتەن بەرى ايتىلىپ كەلەدى. سوناۋ جىل باسىندا تۇڭعىش پرەزيدەنت ەلباسى نۇرسۇلتان نازارباەۆ تاپسىرما بەرگەننەن بەرى ەلدە كوپبالالى انالارعا كورسەتىلگەن كومەك از ەمەس. 

ءبىز بۇل جەردە بيىل 27 اقپان استانا قالاسىندا وتكەن «نۇر وتان» پارتياسىنىڭ XVIII سەزى تۋرالى ايتىپ وتىرمىز. پارتيانىڭ 20 جىلدىعىنا وراي ۇيىمداستىرىلعان بۇل سەزد قازاقستانداعى الەۋمەتتىك كومەككە مۇقتاج وتباسىلار مەن كوپبالالى انالاردىڭ قۋانىشىنا قانات بىتىرگەن ەدى. ول جينالىستا ەلباسى نۇرسۇلتان نازارباەۆ كوپبالالى انالارعا جاعداي جاساۋ ماقساتىندا قولعا الىنعان كوپبالالى وتباسىلاردىڭ جاردەماقىسىن بۇرىنعىدان الدەقايدا جوعارلاتۋدى تاپسىردى. ول بويىنشا، كوپ بالاسى بار وتباسىلاردى الەۋمەتتىك تۇرعىدا قولداۋ ماقستاندا 500 ميلليارد تەڭگە ءبولىنىپ وتىر، ەندى كوپبالالى وتباسىلارداعى ءاربىر بالاعا 21 مىڭ تەڭگە تولەنۋى كەرەك. سونىمەن قاتار، كوپبالالى جانە از قامتىلعان وتباسىلاردىڭ باسپانالى بولۋى ءۇشىن دە مەملەكەتتىك باعدارلامالار قابىلداۋدى تاپسىردى.

ەكىنشى ماسەلە، كوپبالالى اناراعا اقشالاي كومەك بەرۋمەن قاتار، ولاردىڭ جەكە شارۋاشىلىقپەن اينالىسۋىنا مۇمكىندىك جاساۋدىڭ دا ماڭىزى زور. ءبىر رەتتىك الەۋمەتتىك كومەككە قاراعاندا، ءبىر ءومىر ازىق بولاتىن ونەر نەمەسە ءبىلىم العان كوپبالالى انالاردىڭ وزىنە پايدالى. ولار وسى مۇمكىندىگىنەن پايدالانىپ، وزدەرىنىڭ جەكە جۇمىسىن جانداندىرىپ، كاسىپ جاراتىپ، كىرىسىن ارتتىراتىن بولادى. بۇل تۋرالى باس پارتيانىڭ ورىرنباسارى باۋىرجان بايبەك ايتقان بولاتىن.

«ءبىزدىڭ نەگىزگى ماقساتىمىز – حالىققا بالىق ەمەس، قارماق بەرۋ. ءبىر كۇنى جەپ تاستايسىڭ ءبارىبىر بىتەدى. ءوز ادال ەڭبەگىمەن كوپ ادامدار جۇمىس ىستەپ جاتىر»، - دەگەن ەدى باۋىرجان بايبەك.

ءدال وسى "بالىق بەرمەي، قارماق بەرۋ" ۇستانىمىنا ساي مەملەكەت تاراپىنان كوپبالالى انالاردى قولداۋعا ارنالعان ءىرى باعدارلامالار اشىلىپ جاتىر. ماسەلەن قازاقستان ىسكەر ايەلدەر قاۋىمداستىعىن ايتۋعا بولادى. ءدال وسى ۇيىم كوپتەن بەرى كومەككە مۇقتاج انالارعا قول ءۇشىن سوزىپ كەلەدى.

اتالعان قاۋىمداستىقتىڭ پرەزيدەنتى راۋشان سارسەمباەۆا ەلىمىزدەگى كوپبالالى جانە از قامتىلعان انالاردى قولدايتىن مەملەكەتتىك باعدارلامالار تۋرالى ويىن ايتتى.

راۋشان سارسەمباەۆانىڭ پىكىرىنشە، قاۋىمداستىق اياسىندا ەلدەگى كوپبالالى انالارعا ارنالعان «جاردەم» مەملەكەتتىك باعدارلاماسى جۇزەگە اسىپ جاتىر. وكىنىشتىسى كوپبالالى انالار بۇل باعدارلاماعا قاتىسۋعا قاتتى بەلسەندىلىك تانىتپاي وتىر ەكەن.

«ءبىز ەڭبەك نارىعىندا سۇرانىسقا يە ماماندىقتار بويىنشا تەگىن وقىتامىز: اسپاز، ناۋبايشى، سۇلۋلىق مامانى، تىگىنشى. الماتىدا «باقىتتى وتباسى» ورتالىعى ارقىلى 120 ورىن ۇسىندىق، وندا ءبىز ايەلدەردى وقىتىپ، سول جەردە جۇمىسقا ورنالاستىردىق. وكىنىشكە قاراي، بىزدە وقىعىسى كەلەتىن ادامداردىڭ ءتىزىمى جوق. كوپبالالى انالاردىڭ وزدەرى ءارتۇرلى سىلتاۋ ايتادى. ءبىرىنىڭ بالالارىن تاستايتىن جەرى بولماسا، ەندى ءبىرى ۋاقىتىنىڭ جوقتىعىن العا تارتادى. ءبىز نۇر-سۇلتاندا ەكى اسپاز جانە ەكى تىگىنشىنى دايىنداپ وقىتتىق. ءبىز ولارعا ءوز ىسىمەن اينالىسۋ ءۇشىن باسەكەگە قابىلەتتى ورىنداردا ۇيرەنىپ، كەيىن سول جەردە جۇمىس ىستەۋگە جاعداي جاسادىق. تىگىنشى ماماندىعى بويىنشا وقىعىسى كەلەتىن 16 ادام تىركەلدى. ونىڭ 8 راستالدى، وقۋعا 2 ادام كەلدى. بيزنەستى ۇيرەتۋگە دايىنبىز، ءبىز ولاردى تەگىن وقىتىپ، تۇراقتى جۇمىسقا ورنالاستىرۋعا ءازىرمىز. بىزگە تەك الماتىدان عانا قاۋىمداستىق مۇشەلەرىنەن 120 ورىن قاجەت، بىراق ولار قىزىعۋشىلىق تانىتىپ وتىرعان جوق»، - دەدى سارسەمباەۆا.

راۋشان سارسەمباەۆا ەلىمىزدەگى وتباسىلارعا بەرىلىپ جاتقان اتاۋلى الەۋمەتتىك كومەك جايلى دا ءسوز قوزعادى. ونىڭ ايىنشا، بۇل الەۋمەتتىك اتاۋلى كومەك وتباسى مۇشەلەرىنىڭ ورتاق تابىسىنا بايلانىستى تولەنىپ وتىرعاندىقتان، كەيبىر ادامداردىڭ ۇستانىمىنا اسەر ەتىپ جاتىر. ولاردا اقىرى مەملەكەت كومەك بەرەدى ەكەن، ەندەشە نەسىن جۇمىس ىستەپ قينالامىز دەگەن جارامسىز كوڭىل-كۇي قالىپتاسقان. كەيبىرەۋلەر ءۇشىن جۇمىس ىستەمەي-اق جاردەماقىعا يەك سۇيەپ وتىرعان ىڭعايلى بولىپ وتىر.

«كوپبالالى انالار ااك الۋعا دايىن، بىراق بۇل وتباسىنىڭ تابىسىنا بايلانىستى. ايەلدەر جۇمىس ىستەگەن جەرىنەن كەتەدى، ويتكەنى ەگەر ايەل ءبىر جەردە جۇمىس ىستەپ، ءتورت بالاعا 90 مىڭ السا، ااك ودان كوبىرەك. سوندىقتان ولار ۇيدە وتىرعاندى ءجون كورەدى. ولار كۇيەۋىنىڭ تابىسىن جاسىرۋ ءۇشىن اجىراسۋعا دەيىن بارادى. ااك-ءنىڭ تابىسقا بايلانۋى ءبىز كورىپ وتىرعان جاعىمسىز جايتتارعا الىپ كەلدى. ايەل جۇمىس ىستەگىسى كەلەتىن شىعار، بىراق وعان ااك الۋ ءتيىمدى. بىرىنشىدەن، مەملەكەتتىك قۇرىلىمدارعا ااك-ءتى وتباسى تابىسىمەن بايلانىستىرۋدى الىپ تاستاۋ قاجەت. ءبىز ادامداردى وقىتىپ، جۇمىسقا تۇرعىزا الماي وتىرمىز. ولار اتاۋلى الەۋمەتتىك كومەكتەن قاعىلامىز دەپ قورقادى»، - دەيدى راۋشان سارسەمباەۆا.

ەستەرىڭىزگە سالا كەتەيىك، بۇعان دەيىن ەلىمىزدە اتالعان الەۋمەتتىك كومەكتى شىنىمەن مۇقتاج جاندار ەمەس، كەيبىر امالىن تاپقان پىسىقتار دا الىپ جاتقانى ايتىلعان. وسىعان بايلانىسىتى قازاقستان رەسپۋبليكاسى پرەمەر-ءمينيسترىنىڭ ورىنباسارى بەردىبەك ساپارباەۆ تا ايتقان ەدى. ساپارباەۆ ەلىمىزدەگى كوپبالالى انالارمەن وتكەن كەزدەسۋ بارىسىندا اتاۋلى الەۋمەتتىك كومەكتى ەلدەگى شىن مۇقتاج جاندار الۋى كەرەك ەكەنىن ناقتىلاپ ايتقان ەدى.

وسى ءسوزىمىزدىڭ دالەلى رەتىندە ايتساق، قازىرگى تاڭدا الماتىدا 1300-دەن استام كوپبالالى وتباسىعا اتاۋلى الەۋمەتتىك كومەك بەرۋ توقتاتىلعان. بۇعان دەيىن ولارعا اي سايىن 83 ميلليون تەڭگە دۇرىس تولەنبەي كەلگەنى بەلگىلى بولدى

Abai.kz

0 پىكىر