جەكسەنبى, 14 ءساۋىر 2024
2787 0 پىكىر 23 قىركۇيەك, 2019 ساعات 11:56

مينيسترلىك: ارىس ماڭىنداعى جارىلىستان 10 ساپەر زارداپ شەكتى

21 قىركۇيەكتە ارىس قالاسىنان 60 شاقىرىم جەردە ورنالاسقان پوليگون اۋماعىندا "وق-ءدارى فراگمەنتى وزدىگىنەن جارىلىپ", ون ساپەر جارالاندى. بۇل اقپاراتتى قورعانىس مينيسترلىگى تاراتتى.

مينيسترلىكتىڭ حابارلاۋىنشا، جارالانعان اسكەري قىزمەتكەرلەر دالالىق گوسپيتالگە جاتقىزىلعان.

"بولعان وقيعانىڭ سەبەپتەرى مەن جاي-جاپسارىن انىقتاۋ ءۇشىن قاجەتتى ءىس-شارالار جۇرگىزىلىپ جاتىر" دەلىنگەن مينيسترلىك حابارلاماسىندا.

وسىدان ءۇش ايداي بۇرىن تۇركىستان وبلىسى ارىس قالاسىنداعى اسكەري قويما جارىلىپ، ءتورت ادام قازا تاپقان. رەسمي دەرەك بويىنشا، قويماداعى وق-ءدارىنىڭ 70 پايىزدان استامى جارىلىپ كەتكەن. قالاداعى تۇرعىن ۇيلەردىڭ باسىم بولىگى بۇلىنگەن.

وسى وقيعادان سوڭ ەلدەگى اسكەري قويمالاردىڭ جاعدايى مەن قويما ماڭىنداعى تۇرعىندار قاۋىپسىزدىگى تۋرالى ماسەلە كوتەرىلە باستاعان.

سوڭعى ون جىلدا ارىس قالاسىندا اسكەري وق-ءدارى ساقتالاتىن قويمالار مەن ولاردى جويۋعا ارنالعان جەردە ءتورت رەت جارىلىس بولىپ، بىرنەشە ادام قازاعا ۇشىراعان. بيىل ماۋسىمداعى جارىلىستان كەيىن قورعانىس مينيسترلىگى اسكەري وق-ءدارىنىڭ "ەلدىمەكەندەردەن اۋلاق جەرگە" كوشىرىلەتىنىن مالىمدەگەن.

Abai.kz

0 پىكىر