وزگە ەلدەردەن قازاقستانعا كوشىپ كەلگەن قانداستارىمىزدى «ورالمان» دەپ اتاپ ءجۇرمىز. الايدا وسى اتاۋدى قۇلاققا جاعىمدى، جۇرەككە جىلى قازاقى سوزگە الماستىرۋ جايلى كوپتەن بەرى ايتىلىپ كەلەدى. بۇل ماسەلەگە پرەزيدەنت قاسىم-جومارت توقاەۆتىڭ ءوزى نازار اۋدارىپ، «ورالمان» اتاۋىن «قانداستار» دەپ وزگەرتۋ جايلى ويىن بىرنەشە مارتە ايتقان.

17 قىركۇيەك ماجىلىستە وسى ۇسىنىس تالقىلانىپ، دەپۋتاتتار ەل كۇتپەگەن شەشىم شىعاردى. حالىق قالاعان، پرەزيدەنت ۇسىنعان «قانداستار» اتاۋىن قابىلداماي، «باۋىرلاس» دەگەن ءسوزدى ەنگىزدى. بۇل اتاۋدى دەپۋتات قۋانىش سۇلتانوۆ پەن نۇرلان دۋلاتبەكوۆ ۇسىنعان ەكەن.

قر پرەزيدەنتى جانىنان قۇرىلعان ۇلتتىق قوعامدىق سەنىم كەڭەسىنىڭ مۇشەسى، قوعام قايراتكەرى اۋىت مۇقيبەك وسى ماسەلەنى تالقىلاعان جۇمىس توبىنا پرەزيدەنتتىڭ: «ورالمان» دەپ اتالىپ جۇرگەن تۇرعىندارىمىزبەن جۇمىس ىستەيمىز، ولاردى ءبىزدىڭ قوعامىمىزعا بەيىمدەپ، جاقىن تارتۋ ءۇشىن «قانداستار» دەپ اتاۋدى ۇسىنامىن، - دەگەن ءسوزىن وقىپ بەرسە دە، دەپۋتاتتار دەگەنىنەن قايتپاعان كورىنەدى.

وسى شەشىم قابىلدانا سالا، كوپشىلىك قاۋىم «باۋىرلاس» سوزىنە قارسى شىقتى. بۇل ءسوزدىڭ كوپتەن بەرى كورشىلەس جانە تۋىستاس حالىقتارعا ارناپ ايتىلىپ جۇرگەنىن ەسكە الىپ، شەتەلدەن كەلگەن قانداستاردى بۇلاي اتاۋعا بولمايتىنىن ايتتى. ماسەلەن، بۇعان دەيىن كورشىلەس وزبەك باۋىرلارىمىز، تاجىك باۋىرلارىمىز نەمەسە تۋىستاس تۇرىك باۋىرلارىمىز بولسا، ەندى قانداس قازاق باۋىرلارىمىز پايدا بولعالى تۇر. «باۋىرلاس» ءسوزى قازاقتى ءبىر-بىرىنە جاقىنداستىرمايدى، كەرىسىنشە الىستاتا تۇسەدى.

«قانداستار» اتاۋى سوڭعى كەزدە بەيرەسمي تۇردە «ورالمان» ءسوزىن اۋىستىرا باستاعان. باسپاسوزدە دە، قاراپايىم جۇرت اراسىندا دا شەتەلدەن كوشىپ كەلگەن قازاقتاردى قانداستار دەپ اتاۋ قالىپتاسىپ ۇلگەرگەن. دەپۋتاتتاردىڭ وسىنى دا ەسكەرمەي، «قانداس» سوزىنەن باس تارتۋىن جۇرتشىلىق جالتاقويلىق دەپ باعالادى. «كوپۇلتتى قازاقستان» دەگەندى اۋىزىنان تاستامايتىن بيلىك باسىنداعىلار «قانداس» - «قازاق» دەگەن سوزدەردەن قورقىپ وتىر. سول ءۇشىن دە «اربانى دا سىندىرماي، وگىزدى دە ولتىرمەي» ءمانى بۇلىڭعىرلاۋ «باۋىرلاس» سوزىنە بۇيرەكتەرى بۇردى.

بىراق، ۇلتجاندىلىقتان ۇلتانداي حابارى جوق جالتاق دەپۋتاتتاردىڭ بۇل قۋلىعى حالىقتى الداي العان جوق. الەۋمەتتىك جەلىدە بۇل شەشىمدى قىزۋ تالقىلاپ، پرەزيدەنت ۇسىنعان «قانداستار» اتاۋىن قولدادى. ءبىز دە كۇنى كەشە وسى ماسەلەگە بايلانىستى ماقالا جازىپ، قانداستارىمىزدى - قانداس دەپ اتاي الماۋدىڭ ماسقارا ەكەنىن ايتقان ەدىك.

بۇگىن مەملەكەت باسشىسى قاسىم-جومارت توقاەۆ Twitter جەلىسىندەگى جەكە پاراقشاسىندا شەتەلدەن كەلگەن قازاقتارعا «قانداس» اتاۋىنىڭ جاراساتىنىن تاعى ءبىر مارتە قايتالادى.

- بۇعان دەيىن ايتقانىمداي، اتامەكەنىنە ورالعان قازاقتارعا قاتىستى «ورالمان» سوزىنەن باس تارتىپ، ونىڭ ورنىنا «قانداس» ءسوزىن ەنگىزۋ كەرەك. جەتى اتاسىن بىلەتىن حالىققا «قانداس» دەگەن ۇعىم جاراسادى، - دەپ قاداپ تۇرىپ ايتتى پرەزيدەنت.

ءبىزدىڭ دەپۋتاتتار ءۇشىن «ۇلتتار دوستىعى»، «ۇلتتار تەڭدىگى» دەگەن جاتتاندى ۇراندار قانشا قادىرلى بولسا دا، پرەزيدەنت سوزىنە ەندى قۇلاق تۇرەتىن شىعار. مەملەكەت باسشىسى بۇعان دەيىن ەكى مارتە «قانداس» اتاۋىن ۇسىنسا دا، ءماجىلىس ءمان بەرمەگەن ەدى، ءۇشىنشى رەت تاعى تالاپ ەتىپ وتىر.

قازاق ەلىنە كەلگەن قازاقتاردىڭ قۇجاتتىق ماسەلەسىن بۇرىنعىدان دا جەڭىلدەتىپ، قالاعان ۋاقىتىندا قر ازاماتتىعىن الۋىنا مۇمكىندىك جاساۋدىڭ ماڭىزى زور. قانداستارعا وڭ قاباق تانىتۋدىڭ العى شارتتارىنىڭ ءبىرى - ءبىز ءسوز ەتىپ وتىرعان ورىندى اتاۋ بەرۋ ماسەلەسى. سول ءۇشىن ماجىلىستەگى كونە دەپۋتاتتار كوممۋنيستىك كوزقاراستارىنا قاسارىسپاي، قانداستارىمىزدى «قانداس» دەپ اتاۋعا قارسى تۇرماعانى ءجون...

قۋانىش قاپپاس

Abai.kz