قىزىلوردا وبلىسىندا تۇركىتىلدەس ەلدەر جاستارىنىڭ حالىقارالىق فەستيۆالى وتەدى، - دەپ حابارلايدى اباي-اقپارات.

«تۇركى الەمىن توعىستىرعان - سىر ەلى» اتالاتىن فەستيۆال 19-21 قىركۇيەك كۇندەرى قارماقشى اۋدانىنداعى «قورقىت اتا» مەموريالدىق كەشەنىندە ۇيىمداستىرىلادى.

تۇڭعىش پرەزيدەنت - ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلاماسى نەگىزىندە وتكىزىلەتىن شارا تۇڭعىش رەت قولعا الىنىپ وتىر.

– حالىقارالىق شارانىڭ باستى ماقساتى - تۇركىتىلدەس ەلدەر جاستارىنىڭ قارىم-قاتىناسىن نىعايتۋ، ورتاق تاريح پەن قۇندىلىقتارىن ناسيحاتتاۋ، جاستار ساياساتىندا وڭ باستامالار بويىنشا تاجىريبە الماسۋ. وعان ەلىمىزدىڭ بارلىق وڭىرىمەن بىرگە تۇركيا، تاتارستان، وزبەكستان جانە ازەربايجان ەلدەرىنەن شىعارماشىل جانە ونەرپاز جاستار قاتىسادى دەپ كۇتىلۋدە، - دەيدى شارانى ۇيىمداستىرۋشىلار.

شارا اياسىندا «تۇران – تۇركى ەسىگى، قورقىت – جىردىڭ بەسىگى» اتتى فەستيۆال ونەرپازدارىنىڭ قاتىسۋىمەن كونتسەرت، «قورقىت اتا مۇرالارىنىڭ تۇركى الەمىندەگى ءرولى» اتتى حالىقارالىق عىلىمي-تەوريالىق كونفەرەنتسيا، «تۇركى الەمىن توعىستىرعان سىر ەلى» اتتى تۇركى تىلدەس ەلدەر جاستارىنىڭ پىكىر الماسۋ الاڭى، قارماقشى اۋدانىنداعى قورقىت اتا مەموريالدى ەسكەرتكىش-كەشەنىندەگى سىر ەلى قولونەر شەبەرلەرىنىڭ ۇلتتىق بۇيىمدارى جارمەڭكەسى، «التىباقان» جاستار ويىن-ساۋىق باعدارلاماسى ۇيىمداستىرىلماق.

Abai.kz