سوت شەشىمىنە سايكەس، الماعامبەتوۆا جازاسىن قاۋىپسىزدىگى ورتاشا (جالپى رەجيمدەگى) كولونيادا وتەيتىن بولادى دەپ حابارلادى ازاتتىق تىلشىسىنە اقتوبە وبلىستىق سوتىنىڭ ءباسپاسوز قىزمەتى.
سوتتالۋشىنىڭ ادۆوكاتى نازگۇل دۇيسەنبەكوۆانىڭ ازاتتىققا ايتۋىنشا، ۇكىم شىققان كۇنى سوت زالىندا اقمارال الماعامبەتوۆانىڭ تۋىستارى بولماعان. ۇكىم ءالى كۇشىنە ەنگەن جوق.
قازاقستان بيلىگىنىڭ "جۋسان" ارنايى وپەراتسياسى اياسىندا بيىل كوكتەمدە سيريادان ەلگە قايتارىلعان سوڭ 32 جاستاعى اقمارال الماعامبەتوۆاعا تەرگەۋ ورىندارى "تەرروريزمدى ناسيحاتتادى", "ۇلتتىق الاۋىزدىق تۋدىردى" دەگەن ايىپتار تاققان ەدى. 22 شىلدەدە وتكەن العاشقى سوت وتىرىسىندا الماعامبەتوۆا وزىنە تاعىلعان ايىپتاردى تولىق مويىنداپ، پروتسەستىك كەلىسىمگە دايىن ەكەنىن ايتقان. قىلمىستىڭ سارالانۋىمەن كەلىسپەگەن سۋديا 23 شىلدەدە الماعامبەتوۆانىڭ ءىسىن جاڭا پروتسەستىك كەلىسىم جاساۋ ءۇشىن پروكۋراتۋراعا قايتارعان بولاتىن.
تەرگەۋ ماتەريالدارى بويىنشا، اقمارال الماعامبەتوۆا زاڭدى نەكەدەگى كۇيەۋىنەن 2013 جىلعى مامىر ايىندا شاريعات جولىمەن اجىراسقان سوڭ كوپ ۇزاماي ءۇش بالاسىن وعان قالدىرىپ، شەتەلگە كەتكەن. 2014 جىلعى قاڭتاردا اقتوبەدە قالعان كۇيەۋىنە سيريادان حابارلاسىپ، قاقتىعىس ايماعىندا جۇرگەنىن ايتقان. كەيىن بىرنەشە رەت اۋديو جانە جازباشا حابارلاما جولداپ، بالالارىنىڭ اكەسىنە دايش () ەكسترەميستىك ۇيىمىنىڭ "يدەيالارىن ناسيحاتتاعان".
تەرگەۋدىڭ دەرەگىنشە، اقمارال الماعامبەتوۆا سوڭعى التى جىلدا سيرياداعى بىرنەشە قالانى مەكەندەگەن. سوڭعى تۇراعى وسى ەلدىڭ سولتۇستىگىندەگى كوباني قالاسىنان كۇرد جاساعىنىڭ كومەگىمەن بوسقىندار لاگەرىنە جەتىپ، 2019 جىلعى 9 مامىردا "جۋسان" وپەراتسياسى اياسىندا قازاقستانعا سيريادا 2015 جانە 2017 جىلدارى دۇنيەگە كەلگەن ەكى بالاسىمەن بىرگە جەتكىزىلگەن.
ونىڭ ەكى بالاسى قازىر مەملەكەت قاراۋىندا. اقتوبەدە ولار تاربيەلەنىپ جاتقان سابيلەر ءۇيىنىڭ اتى-ءجونىن اتاعىسى كەلمەگەن قىزمەتكەرى ازاتتىققا بالالاردىڭ دەنساۋلىعى جاقسى ەكەنىن ايتتى.
بيىل 7-9 مامىر ارالىعىندا "جۋسان" ارنايى وپەراتسياسىمەن سيريادان قازاقستانعا جەتكىزىلگەندەردىڭ ىشىندە الماعامبەتوۆادان بولەك تاعى بىرنەشە اقتوبەلىكتىڭ ۇستىنەن قىلمىستىق ءىس قوزعالعان. ولاردىڭ ءبىرى - 30 جاستاعى زارينا اقمالاەۆا "تەرروريزمدى ناسيحاتتاۋ", ء"دىني الاۋىزدىق قوزدىرۋ" باپتارى بويىنشا ايىپتى دەپ تانىلىپ، شىلدەنىڭ سوڭىندا سوت ۇكىمىمەن بەس جىلعا باس بوستاندىعىنان ايىرىلدى. زارينا اقمالاەۆانىڭ وزىمەن بىرگە قازاقستانعا سيريادان جەتكىزىلگەن كامەلەتكە تولماعان ەكى بالاسى قازىر ناعاشى اجەلەرىنىڭ تاربيەسىندە.
2018 شىلدە ايىندا قازاقستان ۇلتتىق قاۋىپسىزدىك كوميتەتى (ۇقك) تاياۋ شىعىستا سوعىس باستالعالى بەرى سيريا مەن يراكقا قازاقستاننىڭ 800-گە جۋىق ازاماتى كەتكەنى تۋرالى حابارلاعان. ۇقك مالىمەتىنشە، سيريا مەن يراكتاعى حالىقارالىق تەررورلىق ۇيىمدار قاتارىندا قازاقستاندىق 120 ەر، 250-دەن استام ايەل جانە كامەلەتكە تولماعان 500 بالا بولعان.
2019 جىلى قازاقستان بيلىگى "جۋسان" وپەراتسياسى بارىسىندا سيريادان ەلگە 516 ادامدى جەتكىزگەن، ولاردىڭ 360-ى - بالا. بۇعان دەيىن بيلىك ەلگە جاڭادان ورالعانداردىڭ ءبىراز ۋاقىت وڭالتۋ ورتالىعىندا بولاتىنىن حابارلاعان.
Abai.kz
