وزبەكستاننىڭ نوۆوي قالاسىنداعى «فارحاد» مادەنيەت ورتالىعىندا قىزىلوردا وبلىستىق فيلارمونياسىنىڭ تۇرماعامبەت اتىنداعى حالىق اسپاپتار وركەسترى جانە جەكە ورىنداۋشىلار ونەر كورسەتتى، - دەپ حابارلايدى اباي-اقپارات.

اتالعان شارانىڭ نەگىزگى ماقساتى – مەملەكەتارالىق دوستىقتى نىعايتۋ، بەيبىتشىلىكتى ناسيحاتتاۋ. «وزگە ۇلتتىڭ ءتىلى مەن ادەپ-عۇرىپتارىن، سالت-داستۇرلەرىن، مادەنيەتىن ءبىلۋ جانە رۋحاني بولمىسىن تانۋ تۇتاس ءبىر قوعام ءۇشىن زور تاجىريبە» دەيدى شاراعا قاتىسۋشىلار.

وزبەكستانداعى قازاقستان جىلىنىڭ اياسىندا ۇيىمداستىرىلعان شارادا تۇرماعامبەت اتىنداعى حالىق اسپاپتار وركەسترىمەن قاتار باس ديريجەرى «قۇرمەت» وردەنى، مادەنيەت قايراتكەرى توسبەلگىسىنىڭ يەگەرى كەۋلىمجاي بوتاباەۆ، ديريجەرى «مادەنيەت سالاسىنىڭ ۇزدىگى» توسبەلگىسىنىڭ يەگەرى كۇلدارى يزبانوۆا ونەر كورسەتتى. مادەني كەشتە قورقىت، تۇركەش، قۇرمانعازى، الشەكەي سىندى دالا كومپوزيتورلارىنىڭ تۋىندىلارى ورىندالدى. اسىرەسە، سىر بويىندا ساقتالعان ەرەكشە فەنومەن – كومەي ءتىلدى قوزعاي جىرلايتىن مۋزىكالىق مادەنيەتىمىزدەگى ەڭ كونە، ەڭ كۇردەلى ونەرىمىزدى باۋىرلاس ەل زور ىقىلاسپەن قابىل الدى. سونىمەن قاتار، ەكى مەملەكەتتىڭ دوستىعىنىڭ ايعاعى رەتىندە وزبەك حالقىنىڭ شىعارمالارى، بي قويىلىمدارى ساحنالادى.

Abai.kz