ەلىمىزدەگى ەڭ وزەكتى ماسەلەلەردىڭ ءبىرى – كوپبالالى انالارعا قاتىستى. بۇگىندە قازاقستاندا ءتورت جانە ودان دا كوپ بالاسى بار جانۇيالار كوپبالالى وتباسىلار ساناتىنا جاتادى. ال، ەلىمىز بويىنشا، كوپبالالى وتباسىلاردىڭ سانى 340 مىڭنان اسادى.

ەكى اي بۇرىنعى ەسەپ بويىنشا، كوپبالالى وتباسىلار دىڭ كوشىن تۇركىستان وبلىسى باستاپ تۇر. بۇل وڭىردە بۇگىندە 86 585 كوپبالالى وتباسى تىركەلگەن. ودان كەيىنگى ستاتيستيكا بىلاي جالعاسادى:

الماتى وبلىسىنداعى كوپبالالى وتباسىلار سانى - 40 218,

جامبىل وبلىسى – 30 040

شىمكەنت قالاسى – 27 091

قىزىلوردا وبلىسى – 23 551

ماڭعىستاۋ وبلىسى – 23 042

اتىراۋ وبلىسى – 16 165

الماتى قالاسى – 13 775

استانا قالاسى – 13 721

اقتوبە وبلىسى – 13 387

قاراعاندى وبلىسى – 12 670

شىعىس قازاقستان وبلىسى – 12 576

اقمولا وبلىسى – 7 205

باتىس  قازاقستان وبلىسى – 6 912

پاۆلودار وبلىسى – 5 174

قوستاناي وبلىسى – 5 086

سولتۇستىك قازاقستان وبلىسى – 3 183

ەلباسى نۇرسۇلتان ءابىشۇلى نازارباەۆ 2019 جىلدىڭ 27-اقپان كۇنگى “نۇروتان” پارتياسىنىڭ XVIII سەزىندە “ەڭ تومەنگى كۇنكورىس دەڭگەيىندەگى وتباسىلارعا 20 789 تەڭگە بەرىلەدى” دەدى.

ودان بولەك، مۇگەدەك بالالاردىڭ كۇتىمىنە بايلانىستى بەرىلەتىن جاردەماقى وسەتىنى بەلگىلى بولدى. ياعني، بۇل اتاۋلى كومەك 10 مىڭ تەڭگەگە كوبەيگەن. سونىمەن قاتار، دەنساۋلىق جاعدايىنا بايلانىستى جۇمىس ىستەي المايتىن 100 مىڭنان استام ازاماتتارعا جاردەماقى تولەنەتىنى ايتىلعان.

ايتا كەتەيىك، بۇل جەڭىلدىككە تۇراقتى تىركەۋدە تۇرماعان ازاماتتار ىلىنبەيدى. ال، انالاردىڭ تۇرعىن ۇيمەن قامتىلۋى ءۇشىن بىرقاتار كومەكتەر ۇسىنىلعان:

1.تۇرعىن -ءۇي قۇرىلىسى ماقساتىندا جەر تەلىمدەرى قاراستىرىلادى.

2.باسپانا الۋ ءۇشىن باستاپقى جارناسىنا سۋبسيديا بولىنەدى.

3.ءىرى كومپانيالار مەن كاسىپورىن ەسەبىنەن پاتەرلەر قاراستىرىلادى.

4.جالدامالى پاتەرلەر تۇرعىن ءۇي رەتىندە بەرىلەدى.

بۇگىندە بۇل كەزەكتە 487 مىڭ ادام كەزەكتە تۇرعان كورىنەدى. ولاردىڭ ىشىندەگى كوپبالالىلار سانى – 28 مىڭنان اسادى. ال، 2025 جىلعا دەيىن قىرىق ەكى مىڭعا جۋىق پاتەرلەر سالىنادى. دەمەك، ەلىمىزدىڭ تۇرعىندارىنىڭ باسپانامەن قامتىلۋ دەڭگەيى ءبىرشاما وسپەك.

ال، اۋىلدا تۇراتىن كوپبالالى انالار مەن مۇمكىندىگى شەكتەۋلى ازاماتتارعا شاعىن نەسيەلەر بەرىلمەك. ياعني، ەندى اۋىلداعى جەكە بيزنەسىن اشۋدى ماقسات تۇتقان 5 مىڭ ادامعا 505 مىڭ تەڭگە كولەمىندە شاعىن نەسيە بەرىلمەك. ول – ەكى ءجۇز ايلىق ەسەپتىك كورسەتكىش مولشەرىندە بولماق.

ەستەرىڭىزدە بولسا، 2019 جىلدىڭ 1-قاڭتارىنان باستاپ، ايلىق ەسەپتىك كورسەتكىش مولشەرى – 2 525 تەڭگەنى قۇرادى. ال، ەڭ تومەنگى زەينەتاقى مولشەرى – 36 108 تەڭگە بولدى. ەڭ تومەنگى كۇنكورىس دەڭگەيى – 29 698 تەڭگە بولسا، بازالىق زەينەتاقى تولەمى – 16 037 تەڭگەنى قۇراعان. ال ەلىمىزدەگى ەڭ تومەنگى جالاقى – 42 500 تەڭگەنى قۇراپ وتىر.

ودان بولەك كوپبالالى انالارعا تاعى بىرنەشە جەڭىلدىكتەر قاراستىرىلعان.

ماسەلەن، بيىلدان باستاپ ءۇشىنشى بالاعا دەيىنگى جاردەماقى 95 950 تەڭگەگە كوتەرىلدى. ودان كەيىنگى بالالارعا تولەنەتىن جاردەماقى – 159 075 تەڭگەنى قۇرايدى.

جانە، “التىن القا” مەن “كۇمىس القا” العان انالار جەر جانە كولىك سالىقتارىنان بوساتىلادى. كەيبىر زاڭنامالىق ءىس-ارەكەتتەردى جاساۋ بارىسىندا مەملەكەتتىك باج سالىعىن دا تولەمەيدى.

سونىمەن قاتار، بەس بالاسى بار جانە ولاردى سەگىز جاسقا دەيىن ءوزى تاربيەلەگەن انالار مەرزىمىنەن بۇرىن، ياعني، 53 جاستا زەينەتكە شىعادى.

مەملەكەت تاراپىنان ءتورت جانە ودان كوپ كامەلەتكە تولماعان بالالارى بار وتباسىلارعا ارنايى جاردەماقىلار تولەنىپ كەلەدى.

سونداي-اق، بالا ءبىر جاسقا تولعانشا جۇمىس ىستەيتىن جانە جۇمىس ىستەمەيتىن انالارعا الەۋمەتتىك قولداۋ كورسەتىلەدى. ەگەر نارەستەنىڭ اناسمى جۇمىس ىستەمەسە، وعان بالا ومىرگە كەلگەن ساتتەن باستاپ بالا ءبىر جاسقا تولعانشا ۇزبەي كومەك بەرىلەدى. اي سايىن تولەنەتىن بۇل جاردەماقىنىڭ كولەمى 14 544 تەڭگەدەن 22 473 تەڭگە اراسىندا بولادى.

سونىمەن قاتار، “باتىر انا” اتاعىن العان نەمەسە “التىن القا”، “كۇمىس القا” مەن ماراپاتتالعان كوپبالالى انالار دا مەملەكەت تاراپىنان اي سايىن جاردەماقى الىپ وتىرالى. جانە، ول جاردەماقى انالاردىڭ وتباسىلىق تابىسىنا قاراماستان تاعايىندالعان.

الداعى ۋاقىتتا دا كوپبالالى انالار ماسەلەسى مەن ولارعا بەرىلەتىن جاردەماقى مولشەرى ۇنەمى مەملەكەت باقىلاۋىندا بولادى. جانە ول جىلدان جىلعا ۇلعايا بەرمەك.

Abai.kz