قر ۇلتتىق بانكى ەلىمىزدە ۆاليۋتا ايىرباستاۋ تارتىبىنە وزگەرىستەر ەنگىزۋدى كوزدەپ وتىر. بۇل تۋرالى «قازاقستان رەسپۋبليكاسى قولما-قول شەتەل ۆاليۋتاسىمەن ايىرباستاۋ وپەراتسيالارىن ۇيىمداستىرۋ قاعيدالارىن بەكىتۋ تۋرالى» قاۋلىنىڭ جوباسىندا كورسەتىلگەن. 

ول بويىنشا، اقشا ايىرباستاۋ ورىندارىندا ءاربىر وپەراتسيا كەزىندە تىزىلىمدەر جۋرنالىنا كليەنتتىڭ اتى-ءجونى، تەگى، اكەسىنىڭ اتى، جسن-ءى، زاڭدى مەكەن-جايى تولىقتاي جازىلىپ الىناتىن بولادى.

وعان قوسا، جاڭارتىلعان قاعيدا جوباسىندا ايىرباستاۋ بەكەتتەرىنىڭ جۇمىس رەجيمى مەن ايىرباستالاتىن قاراجات ليميتىنە قاتىستى تالاپتار جازىلعان. وعان سايكەس، ۆاليۋتا ايىرباستاۋ ۇيىمدارى ۇلتتىق بانك بەلگىلەگەن ۋاقىتپەن ساعات 10.00-دەن 19.00-گە دەيىن جۇمىس ىستەۋى ءتيىس. باس بانكتىڭ قاۋلىسى قابىلدانعاننان كەيىن رەسمي تۇردە جاريالانىپ، كەلەر جىلدىڭ 1-ءشى قاڭتارىنان باستاپ قولدانىلادى.

سونىمەن قاتار، قارجى نارىعىن رەتتەۋشى ءبىر ادامعا 500 مىڭ تەڭگەدەن اسا اقشا ايىرباستاۋعا نەمەسە ساتۋعا رۇقسات ەتپەيدى.

بۇل قۇجات 16 تامىزعا دەيىن قوعام تالقىسىنا تۇسەدى.

بىراق، بۇل باستاما بىردەن كوپشىلىكتىڭ نارازىلىعىنا ۇشىراپ جاتىر. كوپ ساندى ادامنىڭ پىكىرىنشە، بۇلاي ىستەۋ ۆاليۋتا ايىرباستاۋ ءتارتىبىن مۇلدە قيىنداتىپ جىبەرەدى.

الەمدىك ەكونوميكا جانە حالىقارالىق قاتىناستار ينستيتۋتىنىڭ ديرەكتورى اكىمجان ارۋپوۆ كتك تەلەارناسىنا بەرگەن سۇحباتىندا بۇل باستامانىڭ شيكى تۇستارى كوپ ەكەنىن ايتىپتى.

- اياق استىنان ءبىر ادام ۆاليۋتا ايىرباستاعىسى كەلسە، امالىن تابادى. بۇل جەردە ۆاليۋتا ايىرباستاۋ پۋنكتتەرىنىڭ جۇمىس ۋاقىتىن شەكتەۋ ارقىلى كولەڭكەلى بيزنەسكە جول اشامىز. سەبەبى، اقشانى جاسىرىن، قولما-قول ساتاتىنداردىڭ ساۋداسى قىزادى. وعان قوسا، ۆاليۋتانى ءبىر العاندا، ساۋدا 500 مىڭ تەڭگەدەن اسپاۋى كەرەك دەگەن دە كۇلكىلى. سوندا قۇنى 1500 دوللاردان اساتىن جىلجىمايتىن مۇلىكتى ساتقاندار نە ىستەمەك؟، - دەيدى ەكونوميس.

Abai.kz