جۇما, 29 ناۋرىز 2024
2928 0 پىكىر 7 تامىز, 2019 ساعات 11:09

ادۆوكات Qaznet سەرتيفيكاتىن ورناتۋ حابارلاماسىن جىبەرگەن Beeline-ءدى سوتقا بەردى

ادۆوكات جانگەلدى سۇلەيمەنوۆ "قاۋىپسىزدىك سەرتيفيكاتىن" ورناتۋ حابارلاماسىن جىبەرگەن Beeline كومپانياسىنىڭ ۇستىنەن شاعىم ءتۇسىردى. 6 تامىزدا الماتى قالاسى بوستاندىق اۋداندىق سوتىندا ادۆوكات شاعىمى بويىنشا العاشقى سوت وتىرىسى ءوتتى. الدىن الا تىڭداۋ 5 مينۋتقا سوزىلدى.

شاعىم تۇسىرگەن ادۆوكات جانگەلدى سۇلەيمەنوۆ الماتىدا بولماعاندىقتان سوتقا قاتىسپادى. ونىڭ ورنىنا سوتقا وكىلى ستانيسلاۆ لوپاتين كەلدى. جاۋاپكەر تاراپ "كار-تەل" كومپانياسى (Beeline وپەراتورىنىڭ يەسى - رەد.) وكىلى ءىستى نۇر-سۇلتانعا اۋىستىرۋدى سۇرادى. كومپانيا وكىلىنىڭ سوزىنشە، كومپانيانىڭ باس كەڭسەسى نۇر-سۇلتاندا ورنالاسقان. ەكى تاراپتى تىڭداعان سۋديا كەلەسى وتىرىستى 12 تامىزعا بەلگىلەدى.

ادۆوكات سۇلەيمەنوۆ شاعىمىندا "بايلانىس وپەراتورلارىنىڭ قاۋىپسىزدىك سەرتيفيكاتىن ورناتۋدى تالاپ ەتۋى زاڭسىز" ەكەنىن جازعان. Beeline شاعىمعا قاتىستى جاۋابىندا ادۆوكاتتان ارىزىن قايتىپ الۋدى سۇراعان.

ال سۇلەيمەنوۆتىڭ وكىلى ستانيسلاۆ لوپاتين ءىستى نۇر-سۇلتانعا اۋىستىرسا دا، سوتتاسۋعا دايىن ەكەندەرىن جەتكىزدى.

- Beeline "سەرتيفيكاتتى ورناتۋ ءبىزدىڭ قۇزىرىمىزداعى ماسەلە ەمەس" دەپ جالتارىپ وتىر. سوت ءىستى نۇر-سۇلتانعا اۋىستىرۋى مۇمكىن. بۇل ماڭىزدى ەمەس. تەك ۋاقىتتى سوزۋى مۇمكىن. بىراق ءبىز اۋىستىرۋعا ەشقانداي نەگىز جوق دەپ ەسەپتەيمىز. وسى جەردە شاعىم تۇسىردىك. Beeline الماتىدا تىركەلگەن. جاقسى دەلىك، نۇر-سۇلتاندا سوتتاسۋعا دا دايىنبىز، - دەيدى شاعىمدانۋشىنىڭ وكىلى ستانيسلاۆ لوپاتين.

زاڭگەرلەر الماتىدان وزگە ەكى قالادا ۇيالى بايلانىس وپەراتورلارىنا شاعىم تۇسىرگەن. 8 تامىزدا نۇر-سۇلتاندا زاڭگەر انۋاربەك سقاقوۆتىڭ Beeline وپەراتورىنا، قاراعاندىدا انتون ءساموحيننىڭ اltel وپەراتورىنىڭ ۇستىنەن تۇسىرگەن شاعىمى بويىنشا العاشقى سوت وتىرىسى وتپەك.

بيىل شىلدەنىڭ ورتاسىنان بەرى قازاقستاندىقتار ۇيالى بايلانىس وپەراتورلارىنان "ينتەرنەتكە كىرۋ ماسەلەسى تۋىنداماس ءۇشىن" ارنايى قاۋىپسىزدىك سەرتيفيكاتىن ورناتۋدى ۇسىنعان حابارلاما الا باستاعان.

سەرتيفيكاتتىڭ رەسمي اتاۋى - QazNet Trust Network. وپەراتورلار مەن قازاقستان بيلىگى مۇنى "كيبەر شابۋىلدى الدىن الۋ شاراسى" دەپ اتايدى.

بيلىك "سەرتيفيكاتتىڭ كيبەرشابۋىل مەن تەرىس كونتەنتتەن قورعايتىنىن، ونى ورناتۋ تۋرالى تۇپكىلىكتى شەشىمدى ءار ازامات ءوزى قابىلدايتىنىن" ايتۋمەن كەلەدى. بىراق QazNet سەرتيفيكاتىنان باس تارتقاندار كوپتەگەن الەۋمەتتىك جەلى مەن پوشتا جۇيەسىنە كىرە الماعانىن ايتىپ شاعىمدانعان.

بيلىكتىڭ سەرتيفيكاتتى جاپپاي ەنگىزۋ تالپىنىسىنان كەيىن نۇر-سۇلتان جەرگىلىكتى جانە حالىقارالىق ۇيىمدار مەن بەلسەندىلەردىڭ سىنىنا قالدى.

قازاقستاندىق قۇقىق قورعاۋشىلار مەن بەلسەندىلەر سەرتيفيكاتتان ورناتقان سوڭ "بيلىك تسەنزۋرانى كۇشەيتەدى" دەپ قاۋىپتەنەدى. ولار "بيلىك وسى سەرتيفيكات ارقىلى اركىمنىڭ جەكە اقپاراتىن باقىلاپ وتىرعىسى كەلەدى" دەپ توپشىلايدى. كەيبىر بەلسەندىلەر بيلىك باستاماسىنا نارازىلىق ءبىلدىرىپ، استانادا جالعىز ادامدىق اكتسيا وتكىزگەن.

حالىقارالىق ۇيىمدار مەن باسىلىمدار دا قازاقستان بيلىگىن سىنعا الدى. "جۋرناليستەردى قورعاۋ كوميتەتى" حالىقارالىق جۋرناليستەردى قورعاۋ ۇيىمى سەرتيفيكات ورناتۋ ۇسىنىسىن "ازاماتتاردى باقىلاۋدا ۇستاۋ مۇمكىندىگىن كۇشەيتۋگە تالپىنىسى" سياقتى كورىنەتىنىن ايتادى. كوميتەت جاريالاعان بلوگ اۆتورى مادلين ەرپ نۇر-سۇلتاننىڭ ۆەبترافيكتى قاداعالاۋ ارەكەتىن "تسەنزۋرا مەن اڭدۋدىڭ جاڭا ءبىر ءتۇرى" دەپ اتاعان.

اقش-تىڭ ميچيگان ۋنيۆەرسيتەتىندەگى Censored Planet زەرتتەۋ توبى Qaznet سەرتيفيكاتىن تەستىلەۋدەن وتكىزىپ، ونىڭ قورىتىندىسىن جاريالاعان. زەرتتەۋشىلەر سەرتيفيكاتتىڭ قولدانۋشى مەن ۆەب-رەسۋرستار اراسىنداعى اقپارات الماسۋعا ارالاسۋ، ترافيك ۇرلاۋ، كونتەنتتى موفيتسيكاتسيالاۋ جانە قولدانۋشىنى اڭدۋ ءتارىزدى فۋنكتسيالارى بار ەكەنىن انىقتاعان.

Freedom House حالىقارالىق قۇقىق قورعاۋ ۇيىمىنىڭ الەمدەگى ينتەرنەت ەركىندىگىنىڭ دەڭگەيى تۋرالى ەسەبىندە قازاقستان 2018 جىلى 65 ەلدىڭ ىشىندە 46-ورىندا تۇرعان. Freedom House قازاقستاندى "الەۋمەتتىك جەلىلەر مەن كوممۋنيكاتسيالىق پلاتفورمالاردى ءجيى بۇعاتتايتىن" ەلدەر قاتارىنا جاتقىزادى.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1583
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2284
عيبىرات

قايسار رۋحتى عازيز جان

مۇحتار قۇل-مۇحاممەد 3621