جەكسەنبى, 29 قاراشا 2020
COVID-19 قازاقستاندا. جۇقتىرعاندار — 130865. جازىلعاندار — 116187. قايتىس بولعاندار — 1990
1614 1 پىكىر 2 تامىز, 2019 ساعات 18:13

ارىس اپاتى كەزىندە جارالانعان سەگىز جاسار ايان شارىپبەك قايتىس بولدى

تۇركىستان وبلىسى ارىس قالاسىنداعى اسكەري قويماداعى جارىلىس كەزىندە جارالانعان ءۇش ادامنىڭ ءبىرى سەگىز جاسار ايان شارىپبەك قايتىس بولدى. بۇل تۋرالى ازاتتىققا بالانىڭ اكەسى ەربول شارىپبەك حابارلادى.

بۇگىنگە دەيىن نۇر-سۇلتان قالالىق № 2 بالالار اۋرۋحاناسىنىڭ جان ساقتاۋ بولىمىندە جاتقان بالانىڭ دارىگەرى ايدىن نۇرتاسۇلىنىڭ سوزىنشە، اياننىڭ جۇرەگى 2 تامىزدا تاڭەرتەڭ توقتاعان.

24 ماۋسىمدا ارىستاعى قارۋ قويماسىندا جارىلىس بولىپ، ادامداردى ەۆاكۋاتسيالاپ جاتقان كەزدە 8 جاسار ايان شارىپبەكتى كولىك قاعىپ كەتىپ، باسى جاراقاتتانعان ەدى. ءبۇلدىرشىندى 28 ماۋسىمدا ساناۆياتسيامەن نۇر-سۇلتان قالاسىنا شۇعىل جەتكىزگەن. دارىگەرلەر وپەراتسيا جاساپ، شەتەلدەن دارىگەرلەر شاقىرتىلعان.

اكەسى ەربول شارىپبەكتىڭ سوزىنشە، ءۇيدىڭ كەنجەسى ايان زەرەك ءارى پىسىق بالا بولعان. بۇعان دەيىن ازاتتىققا بەرگەن سۇقباتىندا ەربول شارىپبەك ارىس قالاسىنداعى جەدەل جاردەمنىڭ ۇلىنا دەر كەزىندە كومەك كورسەتپەگەنىن ايتقان.

دەنساۋلىق ساقتاۋ مينيسترلىگىنىڭ دەرەگىنشە، جارىلىستان ءۇش ادام قازا تاپقان. ونىڭ ءبىرى – بەيبىت تۇرعىن، ەكەۋى – اسكەري قىزمەتكەر. جارىلىستان سوڭ 400-دەن استام ازامات دارىگەر كومەگىنە جۇگىنگەن. تاعى 80 ادام ءتۇرلى جاراقاتپەن اۋرۋحاناعا جاتقىزىلعان.

24 ماۋسىمدا ارىس قالاسىندا اسكەري قويما ورتەنىپ، ارتى ءىرى جارىلىسقا ۇلاسقان. رەسمي دەرەك بويىنشا، ونداعى وق-دارىلەردىڭ 70 پايىزدان استامى جارىلىپ كەتكەن. قالاداعى تۇرعىن-ۇيلەردىڭ باسىم بولىگى بۇلىنگەن. بۇعان دەيىن بيلىك ارىستى قالىپقا كەلتىرۋگە 34,5 ملرد تەڭگە قاجەت ەكەنىن، ءار تۇرعىنعا 100 مىڭ تەڭگە بەرىلەتىنىن مالىمدەگەن.

Abai.kz

1 پىكىر