ەلورداداعى تاۋەلسىزدىك سارايىندا وتباسىلار فورۋمى ءوتىپ جاتىر، دەپ حابارلايدى قازاقپارات ءتىلشىسى.

نۇر-سۇلتان قالاسىنىڭ اكىمدىگى مەن «اتامەكەن» ۇلتتىق كاسىپكەرلىك پالاتاسىنىڭ ۇيىمداستىرۋىمەن، قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن ءوتىپ جاتقان شارا كەشكە دەيىن جالعاسپاق. قاتىسۋشىلار كۇنى بويى بىرنەشە سەسسياعا ءبولىنىپ، وتباسى ماسەلەسىنە قاتىستى ءتۇرلى تاقىرىپتار بويىنشا پىكىر الماسادى. فورۋم ارقىلى ۇيىمداستىرۋشىلار تۇرعىن ءۇي جاعدايىن جاقسارتۋ، بيزنەس قۇرۋ، وتباسى قاۋىپسىزدىگىن قامتاماسىز ەتۋ، قيىن جاعدايعا تاپ بولعان كەزدە ودان شىعۋ ماسەلەلەرى بويىنشا مەملەكەت ۇسىناتىن مۇمكىندىكتەر تۋرالى تولىققاندى اقپارات بەرۋدى كوزدەپ وتىر.

«مەن ءوزىم اباي كوشەسىندە تۇرامىن. ماڭايىمىزدا كوپبالالى وتباسىلار وتە كوپ. سولاردىڭ كوبى وتباسىن قولداۋعا باعىتتالعان باعدارلامالار مەن جوبالار تۋرالى بىلە بەرمەيدى. حالىقتىڭ باسىم بولىگى ەندى عانا بۇل ماسەلەگە نازار اۋدارىپ، ءوز قۇقىقتارىن تالاپ ەتە باستادى. بۇگىنگى فورۋم ارقىلى دا استانالىق جانۇيالار تالاي ماڭىزدى اقپاراتقا قانىعادى دەپ ويلايمىن. مەن قر ەڭبەك جانە حالىقتى الەۋمەتتىك قورعاۋ مينيسترلىگىنىڭ جانىنان قۇرىلعان جۇمىس توبىنا مۇشەمىن. بيىل وسى جۇمىس توبىنىڭ ۇسىنىسى بويىنشا كوپبالالى وتباسىلاردىڭ بالالارىنا قوسىمشا 5 مىڭ گرانت ءبولىندى. باسپانا كەزەگىندە كوپبالالى وتباسىلار جەكە سانات بولىپ ەندى. جالپىعا مىندەتتى وقۋ قورىنىڭ ەسەبىنەن تەگىن ىستىق تاماقپەن، مەكتەپ فورماسىمەن، جازعى لاگەرمەن قامتۋ ءىسى جولعا قويىلىپ جاتىر. سونىڭ ءبارى وسىنداي باسقوسۋلاردا ايتىلعان ۇسىنىستاردان باستاۋ الىپ جاتادى. بۇل فورۋمعا سول ءۇشىن كەلدىك»، - دەيدى كوپبالالى انا جانبوتا ءومىرتاي.

Abai.kz