قازاقستان ەكىنشى رەت «Junior Eurovision Song Contest»  حالىقارالىق بالالار ءان بايقاۋىنا قاتىسادى. شارا 2019 جىلدىڭ 24 قاراشاسى كۇنى پولشا مەملەكەتىنىڭ گليۆيتسە قالاسىندا وتەدى. ەلىمىزدىڭ اتىنان 9-14 جاس ارالىعىنداعى بالالارمەن بىرگە ەرجان ماكسيم ونەر كورسەتەدى. قازاقستان اۋماعىندا بايقاۋدى «حابار» تەلەارناسىنان تاماشالايسىزدار.

«حابار» اگەنتتىگى 2016 جىلعى 1 قاڭتاردان باستاپ اتالمىش ءىس-شارانى ۇيىمداستىراتىن ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى بولىپ تابىلادى، بۇل اتالعان بايقاۋعا ءبىزدىڭ ەلدەن ۇمىتكەر ۇسىنۋعا مۇمكىندىك بەردى.

وتكەن جىلى مەملەكەت اتىنان دانەليا تۋلەشوۆا باق سىناعان ەدى. تەلەكورەرمەندەردىڭ داۋىس بەرۋىمەن ءۇشىنشى، ال قازىلار القاسىنىڭ باعاسىمەن قوسا ەسەپتەگەندە التىنشى ورىنعا جايعاستى.

بايقاۋدىڭ شارتى بويىنشا قاتىسۋشىلار ەش جەردە جاريالانباعان، 2 مينۋت 45 سەكۋندتان 3 مينۋتقا دەيىنگى كومپوزيتسيانى تابيعي داۋىستا ورىنداۋى قاجەت. جەڭىمپاز قازىلار القاسى مەن قاتىسۋشى مەملەكەتتەردىڭ داۋىس بەرۋى ارقىلى انىقتالادى. قازىلار القاسىنا 5 ادام كىرەدى – 3 ەرەسەك جانە 2 بالا. ەرەسەكتەر «ەۆروۆيدەنيەسىنەن» ايىرماشىلىعى كەلەسى بايقاۋدى ۇيىمداستىرۋ قۇقى جەڭىمپازعا بەرىلمەيدى، بۇل جاس ورىنداۋشىلارعا ارتىق قىسىم بولماۋى ءۇشىن ىستەلگەن شارا. بايقاۋدىڭ قاي مەملەكەتتە وتەتىنىن  ەۋروپالىق حابار تاراتۋ وداعى انىقتايدى.

بيىل جارىسقا 19 ەل قاتىسادى، ولاردىڭ قاتارىندا البانيا، ارمەنيا، اۆستراليا، ءازىربايجان، بەلارۋس، فرانتسيا، ماكەدونيا، گرۋزيا، يرلانديا، يزرايل، يتاليا، قازاقستان، مالتا، پولشا، پورتۋگاليا، رەسەي، سەربيا، نيدەرلاندى، ۋەلس بار.

العاش رەت «Junior Eurovision Song Contest» 2003 جىلى كوپەنگاگەن (دانيا) قالاسىندا 16 مەملەكەتتىڭ قاتىسۋىمەن وتكەن بولاتىن. ال تەلەكورەرمەندەردىڭ جانە قازىلار القاسىنىڭ ورتاق شەشىمىمەن جەڭىمپازدى انىقتاۋ 2008 جىلدان باستاپ مۇمكىن بولدى، وعان دەيىن داۋىس بەرۋ كورسەتىلىم كەزىندە كورەرمەندەرمەن جۇزەگە اسقان ەدى. 2007 جانە 2008 جىلدارداعى  داۋىس بەرۋدەن تۇسكەن پايدا «UNICEF» جولداندى.

Abai.kz