«اباي ولەڭدەرىن جاتقا وقۋ» ەستافەتاسىن ەلىمىزدىڭ جاپونياداعى ەلشىسى ەرلان باۋداربەك-قوجاتاەۆ جالعاستىردى. 

باس ەلشى اباي قۇنانبايۇلىنىڭ 175 جىلدىق مەرەيتويىنا وراي جالعاسىپ جاتقان ەستافەتانى قازاقستانمەن پارلامەنتتىك دوستىق ليگاسىنىڭ توراعاسى تاكەو كاۆامۋرادان قابىلداپ الدى.

"تاكەو كاۆامۋرا مىرزانىڭ دوستىق تۋرالى پىكىرىنە قوسىلا وتىرىپ، ابايدىڭ 38-ءشى قارا سوزىنەن ءۇزىندى وقىپ بەرەيىن", - دەگەن قوجاتاەۆ ەستافەتانى جالعاستىرۋدى قر ەڭبەك سىڭىرگەن مادەنيەت قايراتكەرى، فولكلورلىق-ەتنوگرافيالىق سازگەن سازى ءانسامبلىنىڭ جەتەكشىسى باعدات تىلەگەنوۆكە جولدادى.

«اباي ولەڭدەرىن جاتقا وقۋ» ەستافەتاسىنىڭ كەڭ كولەمدە جالعاسۋىنا 9 جاستاعى مەكتەپ وقۋشىسى ءلايلىم-شىراق ەرلانقىزى تۇرتكى بولدى. ول ۇلى اقىننىڭ ولەڭىن وقىپ، ونى پرەزيدەنت قاسىم-جومارت توقاەۆقا جولداعان بولاتىن.

مەملەكەت باسشىسى ەستافەتاعا قولداۋ ءبىلدىرىپ، اقىننىڭ «عىلىم تاپپاي ماقتانبا» ولەڭىنەن ءۇزىندى وقىدى. ءارى ەستافەتانى ودان ءارى ءبىلىم جانە عىلىم ءمينيسترى اسحات ايماعامبەتوۆكە، مادەنيەت جانە سپورت ءمينيسترى اقتوتى رايىمقۇلوۆاعا جانە بۇكىل الەمدى مويىنداتقان تالانتتى ءانشى ديماش قۇدايبەرگەنگە جولداعان.

الەمگە ايگىلى قازاق ءانشىسى ديماش قۇدايبەرگەن دە مەملەكەت باسشىسى ۇسىنعان ەستافەتانى قۋانىشپەن قابىل الىپ، ۇلى اقىننىڭ «قاقتاعان اق كۇمىستەي كەڭ ماڭدايلى» ولەڭىن وقىدى. ديماش بۇل challenge-ءدى جالعاستىرۋدى اقتوبە وبلىسىنىڭ اكىمى وڭداسىن سەيىلۇلى ورازالينگە، رف-نىڭ حالىق ءارتiسi يگور كرۋتويعا جانە ءوزىنىڭ بارلىق تىڭدارمانىنا تاپسىرعان ەدى. وسىعان وراي رەسەيلىك ونەرپاز دا ۇلى ابايدىڭ ولەڭىن وقىعان بولاتىن.

Abai.kz