اتىراۋداعى "جەر داۋى" بويىنشا سوتتالعان قوعام بەلسەندى تالعات اياندى 19 شىلدەدە №2 اتىراۋ قالالىق سوتى مەرزىمىنەن بۇرىن جازاسىن تولىقتاي وتەۋدەن بوساتتى.

"وسىدان ءبىر جىل بۇرىن ولار مەنىڭ باس بوستاندىعىمدى شەكتەۋ جازاسىن شارتتىعا وزگەرتىپ، ونى 2021 جىلعا دەيىن سوزدى. باس بوستاندىعىڭنىڭ شەكتەلۋى نە ەكەنىن ءتۇسىنسىن دەگەن سەكىلدى. بىلاي قاراپ تۇرساڭىز، بوستاندىقتاسىز، ۇيدەسىز عوي، بىراق ەشقايدا بارا المايسىز، رۇقساتسىز ارەكەت قىلا المايسىز، بوس ۋاقىتىڭىز دا شەكتەلەدى. ءار اپتا سايىن پروباتسيا ورگاندارىنا بارىپ، توبە كورسەتىپ تۇرۋىڭىز كەرەك، كەشكى ۋاقىتتا ەشقانداي ەسكەرتۋسىز پوليتسيا قىزمەتكەرلەرى ۇيگە ساۋ ەتە تۇسە الادى. سوندىقتان قاس قارايا "كۇلشەقىز" قۇساپ ۇيىڭىزگە تۇرا جۇگىرەسىڭ. كوڭىل كوتەرەتىن كەشتەرگە بارا المايسىز، مىسالى تويعا بارۋعا قۇقىڭ جوق. باسقا جەرگە، مىسالى قازاعا بارۋ كەرەك بولسا، وندا دا رۇقسات الۋىڭ كەرەك.

جسن-ءنىڭ دە بۇعاتتالعان، ويتكەنى اتى-ءجونىڭىز لاڭكەستىكتى قارجىلاندىرۋمەن اينالىساتىن ادامداردىڭ تىزىمىندە تۇر، ءبىر سوزبەن ايتقاندا بۇل ەشبىر جۇمىس ورنى جۇمىسقا المايتىن تاڭبا", - دەپ جازدى تالعات ءوزىنىڭ Facebook-تەگى پاراقشاسىندا.

تالعات اياننىڭ ايتۋىنشا، پروكۋرور مەن پروباتسيا قارسى بولعانىنا قاراماستان سوت ونىڭ مەرزىمىنەن بۇرىن بوساتۋ تۋرالى ءوتىنىشىن قاناعاتتاندىرعان. الايدا، قوعامدىق جۇمىستارعا ارالاسۋىنا سالىنعان تىيىم سول كۇيى ءوزى كۇشىندە قالدىرىلىپتى.

ايتا كەتسەك، وتكەن جىلدىڭ 28 ساۋىرىندە تالعات ايان اقتوبەدەگى تۇزەۋ كولونياسىنان بوساپ شىققان. ءسويتىپ ءۇش جارىم جىلدىق باس بوستاندىعىن شەكتەۋ مەرزىمىن شارتتىعا اۋىستىرعان. تالعات اياننىڭ سەرىگى، ماكس بوقاەۆ ءوزىنىڭ بەس جىلدىق جازاسىن اقتوبەدە، ورتاشا رەجيمدەگى كا-168/2 تۇرمەسىندە وتەپ جاتىر.

Abai.kz