دۇيسەنبى, 21 قىركۇيەك 2020
COVID-19 قازاقستاندا. جۇقتىرعاندار — 107262. جازىلعاندار — 101877. قايتىس بولعاندار — 1671
دەپ جاتىر 4690 31 پىكىر 11 شىلدە, 2019 ساعات 12:17

«قوسانوۆتى بۋرا قۋدى، بۋرا قۋسا تۋرا قۋدى»

ءسوز جوق، بۇل سايلاۋدىڭ ناۋقانى ساياسي تارتىسپەن ءوتتى. ناۋقاندا «اققۋ، شورتان ءھام شايان» بولدى. «تۇراقتىلىقتى» قالايتىندار بيلىكتىڭ، «وزگەرىستى» قالايتىندار ءامىرجاننىڭ ماڭىنا توپتاستى. ال، ءۇشىنشىسى «بايكوتشى» توپ ەدى. ءۇش توپتىڭ دا ءىس-قيمىلى جۇرتتىڭ كوز الدىندا. ايتپاقشى، 4-توپ تا بايقالدى. ولار «قۇداي كىمدى قالاسا سول بولادى. اللا بىزگە جاقسى پاتشا بەر!» دەپ، دۇعا جاساپ، ساجدەدە جاتقاندار. ولار دا از ەمەس، ءبىر قاۋىم جۇرت.

ناۋقاندا xالىقتىڭ اۋقىمدى ءبىر بولىگى «وزگەرىستى» قالايتىنىن كورسەتتى:

1) ولار الەۋمەتتىك جەلىدە بەلسەندى بولدى. جەلى مۇمكىندىگىمەن ءتاسىل تالعاماي تارتىستى.

2) سايلاۋ بارىسىن باقىلاۋعا، سايلاۋدىڭ ادىلدىگىن قورعاۋعا بولاتىنىن كورسەتتى.

3) ءبىراز سايلاۋ ۋچاسكەلەرىندە سايلاۋدى ۇيىمداستىرۋشىلاردى قىلمىس ۇستىندە ۇستاپ، جۇرتقا جاريا ەتتى.

4) بەلسەندى باقىلاۋشىلار زاڭ اياسىندا قيمىلداپ، جۇزدەگەن سايلاۋ حاتتاماسىن ءتۇسىرىپ الىپ، جۇرتقا جاريالادى. بۇل ءتىپتى، كەي وبلىستا داۋىس سانى باسقاشا بولعانىن مەجەلەۋگە مۇرسات بەرەتىن ەدى.

«وزگەرىسشىلدەر» سەركەگە ءزارۋ ەدى. قوسانوۆتىڭ كانديدات رەتىندە تىركەلۋى «ىزدەگەنگە سۇراعان» بولدى. قوسانوۆ ءبىر ايلىق كانديداتتىق مانسابىندا ساياسي تۇعىرىنىڭ شىڭىنا كوتەرىلدى. ۇتىمدى ۇستانىمدارىنا شەشەندىگى قوسىلىپ، شەبەر، شاپشاڭ قيمىلدادى. ميلليونداعان سايلاۋشىنى ۇيدەن شىعاردى (راستالعان سانى 1,4 ميلليون). ولاردىڭ اراسىنان سايلاۋدى ناسيxاتتايتىن، باقىلايتىن بەلسەندى توپ «كۋرستان ءوتىپ» شىقتى. ونى سايلاۋ كۇنى كوردىك. بۇل كەلەسى سايلاۋ بۇدان دا تارتىستى بولاتىنىن ءتۇسىندىردى.

ال، سول ءامىرجان ناۋقان اياقتالعان العاشقى ساعاتتا-اق، سىندى. وڭباي سىندى. ءبىز ونىڭ وتىز كۇن ايتقان سوزىنەن اينىپ شىعىپ، الدىعا اتتاسا مينا باسىپ كەتەتىندەي xالدە تۇرعانىن كوردىك.

ال سونداي ساتتە «ءادىل سايلاۋدى» ءومىرىنىڭ ءمانى ساناعان دوستى، ايدوستى كورمەي وتىرمىز. كوشىم مەن سارىم ساياساتتا، سايلاۋدا جوق سياقتى. ەڭ كەمىندە كانديدات ۇسىنعان ۇيىمنىڭ يەسى رەتىندە سايلاۋ زاڭىن بۇزعانداردى سوتقا بەرۋى كەرەك پە ەدى؟

بۇل سايلاۋدىڭ باسقا سايلاۋدان وزگەشە وتكەنىن ءوزى دە باقىلاعان «بايكوتشى» ءباپيدىڭ دە ەستافەتانى قولىنا الۋعا مۇمكىندىگى بار ەدى.

وندا ول ءامىرجان ءۇشىن الاڭداۋشىلىق ءبىلدىرىپ، قوسانوۆ دايىنداعان، قازىر دە «دالادا قالعانداي» بولعان مىڭداعان بەلسەندى باقىلاۋشى مەن ناسيxاتشىنىڭ الدىنا كەلەر ەدى. ولاردى «الداندىڭ» دەپ تابالاماي، ءامىرجان ايتىپ ۇلگەرمەگەن «العىسىن» بىلدىرگەندە نە بولار ەدى؟ باپي دە «ەكى الىپ بيگە شىعار» ەدى. بۇل جەردە ساياساتكەرگە ءتان ساليقالىلىق پەن قاعىلەزدىك جەتىسپەدى.

بۇل سايلاۋدا «وپپوزيتسيا» جەڭىلدى (ەگەر ونداي توپ بار بولسا), جەڭىلگەندە دە وڭباي جەڭىلدى. بىراق، «وزگەرىستى قالاعان» xالىق جەڭىلگەن جوق. ولاردىڭ داۋىسى سانالدى. تالاپتارى تاقتا وتىرعاندارعا جەتتى. «حالىق بيلىكتىڭ باستاۋى» بولا الاتىنىن سەزىندى. توپتاسسا كۇش ەكەنىن، «توبىر» ەمەس ەكەنىن ءبىلدى.

ءامىرجاندى «بۇرا قۋدى. بۋرا قۋسا دا، تۋرا قۋدى». ورايى كەلگەن وتىز كۇندە ايتارىن ايتتى. ايعايىن جەتكىزدى.

ءبىز الاڭداپ وتىرمىز: تالاي بوپساعا شىداعان جىگىت «نەدەن سىندى، كوزىنە نە كورىندى!» دەپ...

P.S. ەل بيلىگىنىڭ تىزگىنى توقاەۆقا ءتيدى. ەندى ول مەملەكەتىمىزدىڭ لەگيتيمدى باسشىسى. حالىقارالىق دەڭگەيدەگى ۇلتتىق تۇلعا. الەم مويىندايتىن ۇلكەن ۇيىمدا دا باسشىلىق قىزمەت اتقارعان قازاق.

جاسامپاز ۇلتىمىزدى جەمقورلىقسىز مەملەكەت قۇرۋعا باستايدى دەپ سەنەمىز.

Abai.kz

31 پىكىر