جۇما, 29 ناۋرىز 2024
2724 0 پىكىر 5 شىلدە, 2019 ساعات 10:54

«جاستار – ەل تىرەگى» شىعارماشىلىق بايقاۋىنىڭ ءبىرىنشى كەزەڭىنىڭ جەڭىمپازدارى انىقتالدى  

2019 جىلعى 4 شىلدەدە ەلباسى كىتاپحاناسىنىڭ مۋزەيىندە «جاستار – ەل تىرەگى» كورمەسى اشىلدى.

«جاستار – ەل تىرەگى» كورمەسى قازاقستان رەسپۋبليكاسىنىڭ تۇڭعىش پرەزيدەنتى ەلباسى كىتاپحاناسىنىڭ ەلوردالىق سۋرەتشىلەر وداعىمەن بىرلەسە اعىمداعى جىلدىڭ 12 اقپانىندا جاريالاعان جاس سۋرەتشىلەر اراسىنداعى شىعارماشىلىق بايقاۋدىڭ قورىتىندىسى. كورمەنىڭ نەگىزگى مىندەتى - «ۇلى دالانىڭ جەتى قىرى» ماقالاسىندا كورسەتىلگەن ەلباسىمىزدىڭ جاسامپاز يدەيالارىن پراكتيكالىق ىسكە اسىرۋ. ءتورت اي ىشىندە كاسىبي جانە اۋەسقوي جاس سۋرەتشىلەر «ۇلى دالانىڭ ۇلى ەسىمدەرى» تاقىرىبى بويىنشا ءوز شىعارمالارىن سومدادى. ولار قازاقستان تاريحىنداعى اتتارى اڭىزعا اينالعان تۇلعالاردىڭ بەينەلەرى مەن اعا بۋىننىڭ جەتىستىكتەرىن مازمۇندى شىعارمالارى ارقىلى اشۋعا ۇمتىلدى.

كورمەنىڭ اشىلۋ جانە بايقاۋدىڭ ءى – كەزەڭىنىڭ جەڭىمپازدارىنا قۇرمەت كورسەتۋ راسىمىندە ەلباسى كىتاپحاناسىنىڭ ديرەكتورى ءامىرحان راحىمجانوۆ جەڭىمپازداردى قۇتتىقتادى:

– ەلباسى كىتاپحاناسى مەملەكەتتىك مەرەكە قارساڭىندا جىل سايىن جاستار شىعارماشىلىعىن قولداپ، ءتۇرلى كورمەلەر مەن بايقاۋلار ۇيىمداستىرۋدى داستۇرگە اينالدىردى. ەلباسىمىز جاريالاعان جاستار جىلىنا ارنالعان «جاستار - ەل تىرەگى» شىعارماشىلىق بايقاۋىنىڭ ءبىرىنشى كەزەڭى دە ءوز مارەسىنە جەتتى. سايىسقا ەلىمىزدىڭ تۇكپىر-تۇكپىرىنەن ءبىراز سۋرەتشىلەر ات سالىستى. جاستاردىڭ ىقىلاسى وتە جوعارى بولعانىنا ءبىز قۋانىشتىمىز. كورمەگە قاتىسقان ۇمىتكەرلەردىڭ  اۆتورلىق جۇمىستارىنا قاراساق، بارىمىزگە بەلگىلى  اتى الەمگە تانىلعان قانداستارىمىز ەربولات تولەپباي، اماندوس اقاناەۆ، قازىبەك اجىبەكوۆ سەمبىعالي سماعۇلوۆ سىندى مايتالمان سۋرەتشىلەردىڭ كولەڭكەسىندە قالىپ قويماي، وزىندىك قولتاڭباسىمەن، ەشكىمگە ۇقسامايتىن ايرىقشا مانەرىمەن ەرەكشەلەنىپ تۇرعانىن بايقاۋعا بولادى. كوڭىلى مەن سەزىمىن ءتۇرلى  بوياۋمەن شەبەر جەتكىزە بىلگەن دارىندى جاستارعا قىلقالامدارىنىڭ مۇقالماۋىن تىلەيمىن.

بايقاۋ بارىسىندا قۇرامى قازاقستاننىڭ كوركەمونەر مەن مادەنيەت سالاسىنا ەڭبەگى سىڭگەن قايراتكەرلەردەن تۇراتىن قازىلار القاسى 50-دەن استام ءوتىنىشتى قارادى. بايقاۋعا ابىلاي حان، شوقان ءۋاليحانوۆ، بۇقار جىراۋ، دينا نۇرپەيىسوۆا، باۋىرجان مومىشۇلى سىندى تاريحي تۇلعالار بەينەلەرىمەن قاتار زاماناۋي تانىمال ەسىمدەر: روزا باعلانوۆا، گەننادي گولوۆكين، ديماش قۇدايبەرگەن بەينەلەنگەن شىعارمالار دا ۇسىنىلدى.

ماراپاتتاۋ ءراسىمىن ەلوردا سۋرەتشىلەر وداعىنىڭ توراعاسى، قازاقستاننىڭ ەڭبەك سىڭىرگەن قايراتكەرى، قر كوركەمسۋرەت اكادەمياسىنىڭ اكادەميگى، سۋرەتشى-كەسكىندەمەشى جانۇزاق ءمۇساپىر جۇرگىزدى.

«كەسكىندەمە» نوميناتسياسى بويىنشا الماس وراقباەۆ ء(ى ورىن) پەن دينارا وتەلباەۆا ء(ىى ورىن) جەڭىمپاز اتاندى. «گرافيكا» نوميناتسياسى بويىنشا جەڭىمپازدار: بەيبىت اسەمقۇل ء(ى ورىن) جانە جانىبەك ورازالى ء(ىى ورىن). بايقاۋدىڭ باسقا قاتىسۋشىلارىنا سەرتيفيكاتتار مەن ىنتالاندىرۋ سىيلىقتارى تاپسىرىلدى.

- مەن بايقاۋعا ديماش قۇدايبەرگەن بەينەلەنگەن تۋىندىمدى ۇسىندىم. جالپى سۋرەتشى ءوز زامانىنداعى ازاماتتاردى بەينەلەۋى كەرەك. قازىرگى تاڭداعى ۇلى تۇلعالاردىڭ ءبىرى ءانشى ديماش قۇدايبەرگەن دەپ بىلەمىن. ول تەك قازاقستاندا عانا ەمەس الەمدە ءوز ورنى بار تۇلعا. مەنىڭ جۇمىسىمنىڭ اتاۋى «اق جاۋىن» دەپ اتالادى. «اق جاۋىن» دەپ اتالۋىنىڭ سەبەبىن ايتار بولسام، «اق» دەگەن ءسوز ءبىر جاعىنان ديماشتىڭ تازالىعىن بىلدىرسە، ەكىنشى جاعىنان حالىقتىڭ ديماشقا دەگەن اق پەيىلىن بىلدىرەدى. ديماشتىڭ اندەرى ادامنىڭ جۇرەگىنىڭ تۇبىندە جاتقان تىلسىم سەزىمدەردى وياتادى، جەكە مەن ءۇشىن ديماشتىڭ ءانىن تىڭداعاندا بالالىق شاقتاعى اق جاۋىن جاۋعانداعى سەزىم كەلەدى»، - دەدى ءوز ويىمەن بولىسكەن بايقاۋ جەڭىمپازى بەيبىت اسەمقۇل.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3544