قازاقستاننىڭ ءبىلىم جانە عىلىم ءمينيسترى اسحات ايماعامبەتوۆ پرەزيدەنت تاپسىرماسىنا قاتىستى ءتيىستى شارالار قابىلدانعانىن مالىمدەدى. ول تۋرالى مينيستر ءوزىنىڭ Facebook جەلىسىندەگى جەكە پاراقشاسىندا جازدى. 

"مەملەكەت باسشىسى قاسىم-جومارت كەمەلۇلى توقاەۆتىڭ قوستاناي قالاسىنداعى قازاق مەكتەبى ماسەلەسىنە قاتىستى بەرگەن تاپسىرماسىنا ساي ءتيىستى شارالار قابىلداندى. مەكتەپ ءوز جۇمىسىن جالعاستىرا بەرەدى. ماتەريالدىق بازاسى جاقسارتىلادى.

ساراپتاما جۇمىستارىنىڭ ناتيجەسىنە قاراي، قاجەت بولسا جوندەۋ جۇمىستارىن دا جۇرگىزەتىن بولامىز. وعان قوسا، قوستاناي قالاسىندا 1-قىركۇيەككە دەيىن تاعى ءبىر قازاق مەكتەبىن اشۋ جۇمىستارىن جۇرگىزۋدەمىز.
مينيسترلىك اتالمىش مەكتەپكە قاتىستى ماسەلەنى ارنايى باقىلاۋدا ۇستايتىنىن xابارلايمىن", دەدى مينيستر.

ەستەرىڭىزگە سالا كەتەيىك، كەشە قازاقستان پرەزيدەنتى قاسىم-جومارت توقاەۆ قوستانايداعى قازاق مەكتەبىنە قاتىستى ماسەلەنى جاڭا وقۋ جىلىنا دەيىن شەشۋدى ءبىلىم جانە عىلىم ءمينيسترى مەن وبلىس اكىمىنە تاپسىرعان بولاتىن.  بۇل تۋرالى پرەزيدەنت ءوزىنىڭ Twitter جەلىسىندەگى جەكە پارقشاسىندا جازدى.

- جەرگىلىكتى تۇرعىنداردىڭ پىكىرىنە قاراعاندا، قوستانايداعى قازاق تىلىندە ءبىلىم بەرەتىن جالعىز مەكتەپكە قاتىستى كۇردەلى جاعداي قالىپتاسىپ وتىر. ءبىلىم ءمينيسترى جانە وبلىس اكىمى بارلىق ماسەلەنى جاڭا وقۋ ماۋسىمىنا دەيىن شەشۋى ءتيىس، - دەدى پرەزيدەنت.

قوستانايداعى جالعىز قازاق باستاۋىش مەكتەبىنە قاتىستى "Abai.kz" اقپاراتتىق پورتالى العاشقىلاردىڭ ءبىرى بولىپ، ماسەلە كوتەرگەن ەدى.

قوستاناي اكىمدىگى سىرباي ماۋلەنوۆ اتىنداعى №24 باستاۋىش مەكتەپتى بورودين كوشەسىندەگى بۇرىنعى قوستاناي كاسىپتىك-تەحنيكالىق كوللەدجىنىڭ عيماراتىنا كوشىرۋدى كوزدەگەن. ال مەكتەپتىڭ عيماراتىن بالاباقشاعا اينالدىرۋ جوسپارلانعان ەكەن. الايدا وقۋشىلاردىڭ اتا-انالارى جەرگىلىكتى بيلىكتىڭ بۇل باستاماسىنا قارسى شىققان.

وسى ماسەلەگە بايلانىستى، بۇعان دەيىن Abai.kz پورتالىندا ەكى بىردەي ماقالا جاريالاندى. 26 ماۋسىم كۇنى جاريالانعان العاشقى ماقالادا قوستاناي قالاسى اكىمدىگىنىڭ قالاداعى التىنسارين كوشەسى، 107 مەكەن جايىندا ورنالاسقان باستاۋىش ءبىلىم بەرەتىن №24 مەكتەپ-گيمنازيانى بورودين كوشەسى 138/1 بويىندا تۇرعان بۇرىنعى كاسىپتىك-تەحنيكالىق كوللەدج عيماراتىنا كوشىرگەلى جاتقانىن جازدىق.

ال 27 ماۋسىمدا جاريالانعان ەكىنشى ماقالادا №24 باستاۋىش مەكتەپتى قويما-قوپسىسى كوپ، كۇيى قاشقان «سترويتەل» اۋدانىنداعى كەڭ عيماراتقا كوشىرۋ تۋرالى قالا اكىمىنىڭ باستاماسى قوستانايلىق اتا-انالار تاراپىنان قولداۋ تاپپاعاننان كەيىن، شەشىم كەيىن قايتارىلعانى جازىلدى.

Abai.kz