جەكسەنبى, 29 قاراشا 2020
COVID-19 قازاقستاندا. جۇقتىرعاندار — 130865. جازىلعاندار — 116187. قايتىس بولعاندار — 1990
1343 0 پىكىر 4 شىلدە, 2019 ساعات 11:17

اقش قازاقستاندى سيريادان ازاماتتارىن قايتارۋ تاجىريبەسىمەن بولىسۋگە شاقىردى

اقش مەملەكەتتىك حاتشىسى مايك پومپەو 2 شىلدەدە ۆاشينگتونعا رەسمي ساپارمەن بارعان قازاقستان سىرتقى ىستەر ءمينيسترى بەيبىت اتامقۇلوۆپەن كەزدەستى.

"مەملەكەتتىك حاتشى قازاقستاننىڭ ءوز ازاماتتارىن سيريادان وتانىنا قايتارۋ مەن ولاردى رەينتەگراتسيالاۋ جولىنداعى كوشباسشىلىعىن جوعارى باعالادى جانە قازاقستاندى باسقا ەلدەرمەن تاجىريبەسىمەن بولىسۋگە شاقىردى" دەپ حابارلادى اقش مەملەكەتتىك دەپارتامەنتىنىڭ ءباسپاسوز قىزمەتى.

اقش مەملەكەتتىك دەپارتامەنتىنىڭ رەسمي وكىلى مورگان ورتاگۋستىڭ ايتۋىنشا، اۋعانستانداعى بەيبىتشىلىكتى قامتاماسىز ەتۋدەگى قازاقستاننىڭ قولداۋىن اتاپ وتكەن پومپەو (قازاقستانداعى) جاڭا ۇكىمەت تۇسىندا دا ەكى جاقتى قارىم-قاتىناستى ءارى قاراي نىعايتۋدى جاقتاعان. ورتاگۋستىڭ سوزىنشە، پومپەو بۇعان قوسا قازاقستان پرەزيدەنتى قاسىم-جومارت توقاەۆتىڭ ەل ازاماتتارىنىڭ ساياسي پروتسەستەرگە ارالاسۋ جانە نەگىزگى بوستاندىقتارىن قورعاۋداعى بەلسەندىلىگى ارتىپ كەلە جاتقانى تۋرالى ايتقان ءسوزىن قۇپتاعان.

بۇعان دەيىن قازاقستان سىرتقى ىستەر مينيسترلىگى ءباسپاسوز قىزمەتى بيىل اقپاندا سىرتقى ساياسات مەكەمەسى باسشىلىعىنا تاعايىندالعان اتامقۇلوۆتىڭ اقش-قا العاش رەت ساپارمەن بارعانى تۋرالى حابارلاعان.

بيىل مامىردىڭ سوڭىندا قازاقستان ۇكىمەتى سيريادان ارنايى وپەراتسيا اياسىندا جۇزدەگەن قازاقستاندىق ازامات پەن ولاردىڭ بالالارى ەلگە جەتكىزىلگەنى تۋرالى اقپارات تاراتقان. بيلىكتىڭ مالىمەتى بويىنشا، ءۇش كەزەڭنەن تۇرعان "جۋسان" وپەراتسياسى اياسىندا سيريادان 357 بالا ەلگە ورالعان.

قازاقستان بيلىگى تاياۋ شىعىستان قايتارىلعان ونداعان ادامنىڭ ۇستىنەن "تەررورلىق ءىس-قيمىلعا قاتىسقان" دەگەن كۇدىكپەن قىلمىستىق ءىس قوزعاعان.

2018 جىلى شىلدەدە قازاقستان ۇلتتىق قاۋىپسىزدىك كوميتەتى ازاتتىققا سيريا مەن يراكتا سوعىس باستالعالى تاياۋ شىعىسقا 800-گە تارتا قازاقستاندىق كەتكەنىن حابارلاعان.

Abai.kz

0 پىكىر