3 شىلدە كۇنى نۇر-سۇلتان قالاسىندا «حابار» اگەنتتىگىنىڭ تاپسىرىسىمەن تۇسىرىلگەن «بەكزات» كوركەم ءفيلمىنىڭ جابىق كورسەتىلىمى ءوتتى. بۇل تۋرالى «Abai.kz» اقپاراتتىق پورتالى حابارلايدى. 

كارتينا سيدنەي وليمپياداسىنىڭ چەمپيونى مارقۇم بەكزات ساتتارحانوۆتىڭ ءومىرى مەن سپورتتاعى جەتىستىگى تۋرالى سۋرەتتەيدى.

شاراعا قر اقپارات جانە قوعامدىق دامۋ ءمينيسترى داۋرەن اباەۆ، قر مادەنيەت جانە سپورت ءمينيسترى اقتوتى رايىمقۇلوۆا، جۋرناليستەر مەن بلوگەرلەر، سپورتشىلار مەن ونەر يەلەرى، سونداي-اق اكتەرلەر قۇرامى قاتىستى. بەكزات ساتتارحانوۆتىڭ اتا-اناسى بۇل كورسەتىلىمگە ارنايى تۇركىستاننان كەلدى.

- 20 جاس عۇمىرىندا قولىنان كەلگەنشە ەلىنە بارلىق كۇش-جىگەرىن بەرىپ كەتتى. بەكزاتقا قانداي ماراپات، قانداي كينو شىعارسا دا ارتىق بولماس. بەكزاتتى جاستاردىڭ الدىنا ۇلگى ەتىپ قويسا... ونىڭ يماندىلىعى، ۇلكەندى سىيلاۋى، قازاقىلىعى، بىربەتتىلىگى، العا قويعان ماقساتىن ورىندايتىن مىنەزى قازىرگى قازاق جاستارىنا كەرەك، - دەيدى بەكزات ساتتارحانوۆتىڭ اكەسى سەيىلحان ساتتارحانوۆ.

كارتينانىڭ رەجيسسەرى - مۇرات بيدوسوۆ، ستسەناريىن سەرجان زاكەرۇلى جازعان.

ءفيلمنىڭ سيۋجەتتىك جەلىسىندە بەكزات ساتتارحانوۆ ءومىرىنىڭ ءۇش كەزەڭى قامتىلادى. بالالىق شاعى، بوز بالا كەزەڭى جانە ءومىرىنىڭ سوڭعى ءساتى. 90 جىلداردىڭ باسىنداعى قيىن-قىستاۋ زامانعا تاپ كەلگەن بەكزاتتىڭ بالالىعى كوپ قيىندىقتارمەن وتەدى. تۇركىستان قالاسىنداعى تەمىر جولدى بويلاي ورنالاسقان شاعىن اۋىلدىڭ قاراپايىم تىرشىلىگى بالا بەكزاتتىڭ كوزىمەن بەينەلەنەدى. ونىڭ ارمانى، نامىسقوي ءبىتىمى ءار ءبىر ساتتە سىنالىپ وتىرادى.

بىردە اتا-اناسى بەكزاتتى كۇرەسكە قاتىسسىن دەپ باپكەرگە اپارادى. وندا بەكزات ءوزىنىڭ سەرگەكتىگىمەن كوزگە تۇسەدى. دەگەنمەن كۇرەسكە قاتىسقان بالانىڭ بويى وسپەي قالادى دەگەن تۇسىنىكپەن ونى بوكسقا اۋىستىرادى. باپكەرىمەن تانىسقان كۇننەن باستاپ، بۇل سپورت تۇرىنە ەرەكشە ماحابباتى اشىلادى. كۇن سايىن ەرىنبەي جاتتىعىپ، العاش رەت تۇركىستاندا وتكەن سايىستا جارقىراپ كورىنەدى. بوز بالا شاعىندا گەرمانيادا وتكەن تۋرنيردە توپ جارىپ، باپكەرلەر وليمپياداعا دايارلاۋ جاتتىعۋلارىنا قابىلدايدى. 1999 جىلى تاشكەنتتە وتكەن بۇكىل ازيا بىرىنشىلىگىندە كۇمىس جۇلدەگە يە بولىپ، وليمپيادا ويىندارىنا جولداما الادى. سولاي 2000 جىلى سيدنەيدە تارتىستى ويىندار وتكىزىپ، التىن مەدالعا يە بولادى.

ءفيلمنىڭ ءتۇسىرىلىم جۇمىستارى تۇركىستان، الماتى جانە ىستامبۇل قالالارىندا وتكەن. باستى ءرولدى جاس اكتەر سامات ازىمقۇلوۆ وينايدى. ول 2006-2007 جىلدارى كيكبوكستان جاستار اراسىندا ەكى رەت قازاقستان چەمپيونى بولعان. سونىمەن قاتار تۋىندىدان عالىمبەك وسپانوۆ، مۇرات جارىلقاسىنوۆ، مايرا ماقۇلبەكوۆا، دۋلىعا اقمولدا، قۋانىش مۇقاتاي، باقداۋلەت شايماحان جانە باسقا اكتەرلەردى كورەسىزدەر.

تولىق مەترلى كارتينا وسى كۇزدە ەلىمىزدىڭ بارلىق كينوتەاترلارىندا كورسەتىلەدى دەپ جوسپارلانعان.

Abai.kz