قازاقستان پرەزيدەنتى قاسىم-جومارت توقاەۆ قوستانايداعى قازاق مەكتەبىنە قاتىستى ماسەلەنى جاڭا وقۋ جىلىنا دەيىن شەشۋدى تاپسىردى. مەملەكەت باسشىسى ءبىلىم جانە عىلىم ءمينيسترى مەن وبلىس اكىمىنە بەرگەن تاپسىرماسىن Twitter جەلىسىندەگى جەكە پارقشاسىندا جازدى.

- جەرگىلىكتى تۇرعىنداردىڭ پىكىرىنە قاراعاندا، قوستانايداعى قازاق تىلىندە ءبىلىم بەرەتىن جالعىز مەكتەپكە قاتىستى كۇردەلى جاعداي قالىپتاسىپ وتىر. ءبىلىم ءمينيسترى جانە وبلىس اكىمى بارلىق ماسەلەنى جاڭا وقۋ ماۋسىمىنا دەيىن شەشۋى ءتيىس، - دەپ جازدى پرەزيدەنت.

قوستانايداعى جالعىز قازاق باستاۋىش مەكتەبىنە قاتىستى "Abai.kz" اقپاراتتىق پورتالى العاشقىلاردىڭ ءبىرى بولىپ، ماسەلە كوتەرگەن ەدى.

ماسەلەنىڭ ناقتى ءمان-جايى مىناداي: قوستاناي اكىمدىگى سىرباي ماۋلەنوۆ اتىنداعى №24 باستاۋىش مەكتەپتى بورودين كوشەسىندەگى بۇرىنعى قوستاناي كاسىپتىك-تەحنيكالىق كوللەدجىنىڭ عيماراتىنا كوشىرۋدى كوزدەگەن. ال مەكتەپتىڭ عيماراتىن بالاباقشاعا اينالدىرۋ جوسپارلانعان ەكەن. الايدا وقۋشىلاردىڭ اتا-انالارى جەرگىلىكتى بيلىكتىڭ بۇل باستاماسىنا قارسى شىققان.

وسى ماسەلەگەن بايلانىستى، بۇعان دەيىن Abai.kz پورتالىندا ەكى بىردەي ماقالا جاريالاندى. 26 ماۋسىم كۇنى جاريالانعان العاشقى ماقالادا قوستاناي قالاسى اكىمدىگىنىڭ قالاداعى التىنسارين كوشەسى، 107 مەكەن جايىندا ورنالاسقان باستاۋىش ءبىلىم بەرەتىن №24 مەكتەپ-گيمنازيانى بورودين كوشەسى 138/1 بويىندا تۇرعان بۇرىنعى كاسىپتىك-تەحنيكالىق كوللەدج عيماراتىنا كوشىرگەلى جاتقانىن جازدىق.

ال 27 ماۋسىمدا جاريالانعان ەكىنشى ماقالادا №24 باستاۋىش مەكتەپتى قويما-قوپسىسى كوپ، كۇيى قاشقان «سترويتەل» اۋدانىنداعى كەڭ عيماراتقا كوشىرۋ تۋرالى قالا اكىمىنىڭ باستاماسى قوستانايلىق اتا-انالار تاراپىنان قولداۋ تاپپاعاننان كەيىن، شەشىم كەيىن قايتارىلعانى جازىلدى.

قوستاناي قالاسى اكىمدىگىنىڭ قالا ورتالىعىنداعى جالعىز قازاق باستاۋىش مەكتەبىن شالعايعا كوشىرۋ تۋرالى شەشىمى مەملەكەت باسشىسىنىڭ نازارىنا جەتىپ وتىر. بۇل ماسەلە ەندى وڭ شەشىمىن تابادى دەپ سەنەمىز.

Abai.kz