ونىڭ سوزىنشە، جاقىندا ارىسقا كەلگەن پرەمەر-مينيستر اسقار مامين وتكىزگەن جيىندا قالانىڭ 44781 تۇرعىنىنا 100 مىڭ تەڭگەدەن بەرۋ جونىندە شەشىم قابىلدانعان.

"كىشكەنتاي سابيدەن باستاپ زەينەتكەرلەرگە دەيىن اتالعان اقشا بەرىلەدى. بۇل ماقساتقا ءتورت ميلليارد 478 ملن 100 مىڭ تەڭگە قاجەت. ونىڭ ءبىر ميللياردى وبلىستىق بيۋدجەتتەن بولىنەدى. ەكى ميلليارد تەڭگە رەسپۋبليكالىق بيۋدجەتتەن، قالعان قاراجات "تۇركىستان" كورپوراتيۆتىك قورىنا تۇسكەن اقشادان جۇمسالادى" دەدى وبلىس اكىمىنىڭ ورىنباسارى.

امانباەۆتىڭ سوزىنشە، ازىرگە اتالعان قورعا تۇسكەن اقشا جۇمسالماعان.

"ول ارىس تۇرعىندارىنا جۇمسالادى. قالاداعى ارنايى مالىمەتتەر بازاسى ارقىلى 44781 ادامدى انىقتاپ، قاراجاتىن اۋدارامىز" دەدى جولدىمۇرات امانباەۆ. ول بۇل جۇمىستار ەكى اپتا ۋاقىت الاتىنىن ايتتى. اكىم ورىنباسارى كومەك اقشا الۋ ءۇشىن "ەش قۇجات جيناۋدىڭ قاجەتى جوق، ءاربىر تۇرعىن انىقتالىپ، ءتيىستى قاراجاتتى الادى" دەپ مالىمدەدى.

قازاقستان ۇكىمەتى سەيسەنبى كۇنى بەكىتكەن 2019 جىلعى رەسپۋبليكالىق بيۋدجەتكە تۇزەتۋلەر ەنگىزۋ تۋرالى زاڭ جوباسىندا ۇكىمەتتىڭ رەزەرۆتىك قورىن 72,9 ميلليارد تەڭگەگە (191,8 ميلليون دوللار) ۇلعايتۋ كوزدەلگەن. بۇل قارجىنىڭ ءبىر بولىگى ارىستاعى جارىلىس سالدارىن جويۋعا جۇمسالماق.

24 ماۋسىمدا تۇركىستان وبلىسى ارىس قالاسىنداعى اسكەري قويما جارىلدى. رەسمي مالىمەت بويىنشا، جارىلىستان ءۇش ادام (ارىس تۇرعىنى مەن ەكى اسكەري) قازا تاۋىپ، 400-دەن استام ادام دارىگەر كومەگىنە جۇگىنىپ، 80-تەن استام ازامات اۋرۋحاناعا جاتقىزىلعان. رەسمي مالىمەت بويىنشا، ارىستاعى ۇيلەردىڭ 85 پايىزى بۇلىنگەن.

قازاقستان ۇكىمەتىنىڭ حابارلاۋىنشا، جارىلىس بولعان كۇنى 39 مىڭ ادام ءوز كۇشىمەن قالانى تاستاپ شىققان، ءۇش مىڭنان استام ادام تۇركىستان وبلىسى اكىمدىگى ۇسىنعان اۆتوبۋستارمەن شىمكەنتكە جەتكەن. 27 ماۋسىمدا شىمكەنتتە شەرۋگە شىققان جۇزدەگەن ارىستىق سوڭعى ون جىل ىشىندە ءتورتىنشى رەت جارىلىس بولعان ارىس قالاسىنا بارمايتىنىن ايتىپ، بيلىكتەن وزدەرىن باسقا جاققا كوشىرۋدى تالاپ ەتكەن.

28 ماۋسىمدا كورشى ەلدى مەكەندەردى ۋاقىتشا پانالاعان ارىستىقتار ۇيلەرىنە ورالدى.

Abai.kz