مەملەكەت باسشىسى قاسىم-جومارت توقاەۆ «استانا» حالىقارالىق قارجى ورتالىعى سوتىنىڭ جاڭا عيماراتى مەن حالىقارالىق اربيتراجدىق ورتالىعىن اشۋ راسىمىنە قاتىستى.

جاڭا عيماراتتاردىڭ اشىلۋ راسىمىندە ارنايى ءسوز العان قازاقستان پرەزيدەنتى قاسىم-جومارت توقاەۆ «استانا» حالىقارالىق قارجى ورتالىعىنىڭ دەربەس سوت جۇيەسىن قالىپتاستىرۋداعى ءھام زاڭ ۇستەمدىگىن ساقتاۋداعى ءرولى تۋرالى ايتتى. سونداي-اق، ەكونوميكالىق دامۋعا جانە ينۆەستورلارعا سەنىم بەرەتىن ءبۇل جۇيەنىڭ (دەربەس سوت جۇيەسى) ماڭىزدىلىعىنا ەرەكشە توقتالدى.

«ءبىز زاماناۋي، كاسىبي جانە دەربەس سوت جۇيەسىن قالىپتاستىرۋعا ەرەكشە كوڭىل بولەمىز. «استانا» حالىقارالىق قارجى ورتالىعىنىڭ سوتى مەن حالىقارالىق اربيتراجدىق ورتالىعىن اعىلشىن قۇقىعى قاعيداتى نەگىزىندە قۇرۋ ارقىلى ءبىز «استانا» حالىقارالىق قارجى ورتالىعىنىڭ ينستيتۋتسيونالدىق قۇرىلىمىن جاساۋدى اياقتايمىز. سونىمەن قاتار، تۇڭعىش پرەزيدەنت نۇرسۇلتان نازارباەۆتىڭ نەگىزگى باستامالارىنىڭ ءبىرىن جۇزەگە اسىرامىز»، – دەدى مەملەكەت باسشىسى ءوز سوزىندە.

ايتا كەتەيىك، «استانا» حالىقارالىق قارجى ورتالىعىنىڭ سوتى مەن حالىقارالىق اربيتراجدىق ورتالىعى اعىلشىن قۇقىعى نەگىزىندە قۇرىلعان. پرەزيدەنت توقاەۆتىڭ ايتۋىنشا، «استانا» حالىقارالىق قارجى ورتالىعىنىڭ جانە ونداعى سوت جۇيەسىنىڭ اعىشلىن نەگىزىندە قۇرىلۋى - بۇل بىرىنشە كەزەكتە قازاقستاننىڭ الەمنىڭ دامىعان وتىز ەلىنىڭ قاتارىنا قوسىلۋ ءۇشىن جاساعان قادامدارىنىڭ ءبىرى بولىپ تابىلادى.

«ءبىز مۇنىڭ بيىك ماقسات ەكەنىن تۇسىنەمىز. ول تۇراقتى ءارى ساپالى ەكونوميكالىق ءوسىمدى، ءارتاراپتاندىرۋدى، جاڭا ينۆەستيتسيا مەن تەحنولوگيانى تارتۋدى تالاپ ەتەدى. ءبىز رەفورمالاردان قورىقپايمىز. سوندىقتان، بۇرىنعى كسرو اۋماعىندا العاش رەت اعىلشىن قۇقىعى سوت تورەلىگىنىڭ جالپى جۇيەسى اياسىندا ەلىمىزدە تابىستى قولدانىلىپ وتىر»، – دەدى قازاقستان پرەزيدەنتى.

اتالعان عيماراتتاردىڭ اشىلۋى ءراسىمى اياسىندا، مەملەكەت باسشىسى قاسىم-جومارت توقاەۆ «استانا» حالىقارالىق قارجى ورتالىعىنداعى ستارتاپ-جوبالاردى قولداۋ ماقساتىندا اتقارىلىپ جاتقان جوبالاردىڭ كورمەسىن ارالادى. بۇل جەردە يسلامدىق قارجىلاندىرۋ، ادام كاپيتالىن ءوسىرۋ، يننوۆاتسيا مەن تسيفرلاندىرۋدى دامىتۋ بويىنشا جوبالارمەن تانىستى.

سونىمەن قاتار، قاسىم-جومارت توقاەۆ «استانا» حالىقارالىق قارجى ورتالىعى بيرجاسىنىڭ جۇمىسىمەن تانىستى.

Abai.kz