دۇيسەنبى, 10 تامىز 2020
COVID-19 قازاقستاندا. جۇقتىرعاندار — 99442. جازىلعاندار — 72523. قايتىس بولعاندار — 1058
1159 0 پىكىر 1 ماۋسىم, 2019 ساعات 11:16

جەتىسۋ كاسىپكەرلەرى كوپبالالى انالار مەن مۇمكىندىگى شەكتەۋلى جاندارعا 60 ءۇي الىپ بەرگەن...

قازىر ەلىمىزدە كوپبالالى انالاردىڭ ماسەلەسىن شەشۋ كۇن تارتىبىندەگى كەزەك  كۇتتىرمەيتىن ماڭىزدى قادام بولىپ تۇر. مەملەكەت تاراپىنان انالارعا كورسەتىلەر كومەك ءتۇرى جىل سايىن ارتىپ كەلە جاتقانى راس. ول ءۇشىن كوپبالالى جانە از قامتىلعان وتباسىلاردى قولداۋدىڭ كەشەندى شاراسى جۇزەگە اسىرىلىپ كەلەدى.

ماسەلەن، كەشە الماتى وبلىسىنىڭ ورتالىعى تالدىقورعان قالاسىندا “الماتى وبلىسىنىڭ الەۋمەتتىك كارتاسىنىڭ ماقساتتارىن جۇزەگە اسىرۋ” اتتى ءباسپاسوز ءماسليحاتى ءوتتى. وندا از قامتىلعان جانە كوپبالالى وتباسىلارعا بارىنشا جاعداي جاساۋ ماسەلەلەرى قاراستىرىلعان.

بۇگىندە الماتى وبلىسىندا 40409 (قىرىق مىڭ ءتورت ءجۇز توعىز) كوپبالالى وتباسى بار. ولار 165 000 ء(جۇز الپىس بەس مىڭ) بالا تاربيەلەپ وتىر. ءوڭىر باسشىسى اماندىق باتالوۆتىڭ تاپسىرماسىنا وراي، بيىلعى جىلدىڭ باسىندا جەتىسۋ ءوڭىرىنىڭ “الەۋمەتتىك كارتاسى” جاسالىپ، وعان جەرگىلىكتى بيۋدجەتتەن 3,4 ميلليارد تەڭگە بولىنگەن. ول قارجىعا الماتى وبلىسىندا ەلباسى نۇرسۇلتان نازارباەۆتىڭ “7-20-25” باعدارلاماسى بويىنشا 1 ميلليون تەڭگەدەن تۇرعىن ءۇي سەرتيفيكاتتارى بەرىلەدى. ول ءۇشىن 300 ميلليون تەڭگە بولىنگەن. سونداي-اق، وڭىرگە گاز تارتۋ ماسەلەسىن شەشۋ ءۇشىن كوپبالالى وتباسىلار مەن از قامتىلعان جانۇيالارعا جەڭىلدەتىلگەن مۇمكىندىكتەر قاراستىرىلعان. ول ءۇشىن ءوڭىر بيۋدجەتىنەن 500 ميلليون تەڭگە بولىنگەن. سونىمەن قاتار، وتكەن جىلى 10,5 ميلليارد تەڭگە كولەمىندەگى اقشاعا 238 مىڭ ادام ءارتۇرلى كومەكتەر العان.

تاعى ءبىر ايتا كەتەرلىگى كوپبالالى جانە از قامتىلعان وتباسى بالالارىنىڭ جوعارى وقۋ ورىندارىنا تۇسۋلەرى ءۇشىن جىل 100 گرانت بولىنەدى. ول ءۇشىن وبلىس بيۋدجەتىنەن 44,3 ميلليون تەڭگە قاراستىرىلعان. ال، قازىر جەتىسۋ وڭىرىندەگى از قامتىلعان جانە كوپبالالى وتباسىنان شىققان 206 بالا وڭىرلىك بيۋدجەت ەسەبىنەن ءبىلىم الىپ جاتقان كورىنەدى.

ايتا كەتەيىك، بۇگىندە جالپى جەتىسۋ ءوڭىرى بويىنشا، 179 450 وقۋشى باستاۋىش سىنىپتاردا وقيدى. ولاردىڭ 22 863 بالا تەگىن ىستىق تاماق ىشەدى. از قامتىلعان جانە كوپبالالى وتباسىلاردان 18806 بالا 100 پايىز تەگىن تاماقپەن قامتىلعان.

ءوڭىر باسشىسىنىڭ حالىقتىڭ الەۋمەتتىك جاعدايىن جاقسارتۋ ماقساتىنداعى كەشەندى شارالارىنىڭ ناتيجەسىندە جەتىسۋ وڭىرىندە 6955 كوپبالالى انالار ەكى اي بۇرىن قالاداعى قوعامدىق كولىكتەردە تەگىن ءجۇرۋ مۇمكىندىگىنە يە بولعان. ال، مۇنداي جەڭىلدىكتەر وڭىردە وسى ۋاقىتقا دەيىن 42 مىڭ مەكتەپ وقۋشىلارىنا قاراستىرىلعان. جانە، ول تىزىمگە جوعارعى وقۋ ورنىندا وقيتىن بولاشاق ماماندار مەن زەينەتكەرلەر دە كىرگەن.

سونىمەن قاتار، الماتى وبلىسىنىڭ اتا-اناسىنان ايىرىلعان 40 مىڭ بالامەن قاتار كوپبالالى، از قامتىلعان وتباسىنان شىققان بالالارى ساۋىقتىرۋ ماۋسىمىندا جازعى دەمالىس ورىندارىنا تەگىن باراتىن بولادى. ول ءۇشىن بيىل وڭىردەگى بالالار مەن جاسوسپىرىمدەردىڭ جازعى دەمالىسى مەن ساۋىقتىرۋ جۇمىستارىن اتقارۋ ءۇشىن جەتىسۋ جەرىندەگى 1521 لاگەر مەن الاڭدار دايىندالعان.

ودان بولەك، 100 كوپبالالى انالاردىڭ بالالارىمەن بىرگە وتباسىلىق دەمالىستارىن ۇيىمداستىرۋ دا جولعا قويلىعان. العاش رەت بولاتىن مۇنداي ساۋىقتىرۋ شاراسى ساناتوريلەر مەن دەمالىس ۇيلەرىندە جۇزەگە اسپاق. ول ءۇشىن مەتسەناتتار مەن دەمەۋشىلەر تارتۋ قاراسىتىرلىپ جاتقان كورىنەدى.

ايتا كەتەر تاعى ءبىرا جايت، بيىل جىل باسىنان بەرى جەتىسۋ وڭىرىندەگى اۋدان، قالا كاسىپكەرلەرى كوپبالالى انالار مەن مۇمكىندىگى شەكتەۋلى جانداردى قولداۋ ماقساتىندا 60 ءۇي الىپ بەرگەن. وبلىس اكىمىنىڭ ورىنباسارى اقان ءابدۋالىنىڭ ايتۋىنشا، ءوڭىر كاسىپكەرلەرىن وسىنداي يگى ىستەرگە جۇمىلدىرۋ الداعى ۋاقىتتا دا جالعاسىن تاپپاق. جەتىسۋ ءوڭىرىنىڭ بىردە-ءبىر وتباسى قامقورلىقسىز قالمايدى دەگەن ءابدۋالى مىرزا مۇنداي باعىتتاعى جۇمىستاردىڭ وسىمەن شەكتەلمەيتىنىن ايتتى. سونىمەن قاتار، ول جۇمىستار تۇراقتى باقىلاۋعا الىناتىن بولادى.

جەتىسۋ جەرىندەگى كوپبالالى انالاردىڭ ماسەلەسىن شەشۋ جۇمىستارى وسىلاي اتقارىلىپ جاتىر. ەندى الداعى ۋاقىتتا دا انا مەن بالانىڭ ماسەلەسىن شەشەتىن وسىنداي ىرگەلى ىستەردىڭ كوپ بولۋى بولاشاققا دەگەن ەل سەنىمىن نىعايتا بەرەتىنى انىق.

Abai.kz

0 پىكىر