سىر وڭىرىندە جىلىجايلاردىڭ جۇمىسىن جانداندىرۋ قارقىندى جۇرگىزىلۋدە،- دەپ حابارلايدى اباي-اقپارات.

ال بۇگىنگى تاڭدا وبلىستا ەگىن ەگۋ جۇمىستارى تولىق تامامدالعان. بۇل تۋرالى وبلىستىق اۋىل شارۋاشىلىعى باسقارماسى باسشىسىنىڭ ورىنباسارى مارجان ومىرباەۆا مالىمدەدى.

– تۇڭعىش پرەزيدەنت - ەلباسى نۇرسۇلتان نازارباەۆ 2018 جىلعى 5 قازانداعى قازاقستان حالقىنا جولداۋىندا اگروونەركاسىپ كەشەنىنىڭ الەۋەتىن تولىق ىسكە اسىرۋ كەرەكتىگىن اتاپ كورسەتكەن بولاتىن. قازاقستان رەسپۋبليكاسىندا اگروونەركاسىپتىك كەشەنىن دامىتۋدىڭ 2017-2022 جىلدارعا ارنالعان مەملەكەتتىك باعدارلاماسىنا سايكەس، وبلىستىڭ اگروكارتاسى بويىنشا بيىل اگروونەركاسىپ كەشەنىن دامىتۋدىڭ نىسانالى ينديكاتورلارى بەلگىلەندى. اگروكارتا اياسىندا وبلىستىڭ اۋىل شارۋاشىلىعى سالاسىندا بىرقاتار ءىرى جوبالار ىسكە اسىرىلدى. قازىرگى كۇنى وڭىردە ەگىن ەگۋ جۇمىستارى تولىعىمەن اياقتالدى. بيىل بارلىعى 183,8 مىڭ گەكتار القاپقا اۋىل شارۋاشىلىعى داقىلدارى ورنالاسىپ، مەجەدەن 5,2 مىڭ گەكتارعا ارتىق ورىندالدى. اگروكارتا بويىنشا، بيىل وبلىستا ەگىلگەن مايلى داقىلدار كولەمى 7 مىڭ گەكتاردى، مال ازىقتىق داقىلدار كولەمى 62,7 مىڭ گەكتاردى قۇرادى، - دەيدى باسقارماسا باسشىنىڭ ورىنباسارى.

سونداي-اق، ول قىزىلوردا وبلىسىندا جالپى كولەمى 10,5 گا قۇرايتىن بارلىعى 164 جىلىجاي بارىن جەتكىزدى. قولدا بار جىلىجايلاردىڭ 90-ى ناقتى جۇمىس ىستەپ تۇر. بۇگىندە وڭىردە جىلىجاي شارۋاشىلىعىن دامىتۋ جونىندە ارنايى ءىس-شارالار قابىلدانعان ەكەن. سونىڭ ارقاسىندا بيىل جاڭادان قولعا الىنعان جانە جۇمىسى توقتاپ تۇرعان جالپى كولەمى 6,395 گا بولاتىن 43 جىلىجايدى ىسكە قوسۋ جوسپارلانىپ وتىر.

بىلتىر سىربويىلىق ديقاندار 34,5 ملن دوللاردى قۇرايتىن 95,8 مىڭ توننا اۋىل شارۋاشىلىعى ونىمدەرى ەكسپورتقا شىعارعان.

تاعى ءبىر ايتا كەتەرلىك جايت، 2018 جىلدان باستاپ ەكسپورتتالاتىن ءونىم تۇرلەرى ۇلعايتىلىپ، قىتاي، تۇركيا، اراب امىرلىگى مەملەكەتتەرىنىڭ نارىعى يگەرىلۋدە. بيىل سىرتقى نارىققا باعىتتالعان جوبالىق قۇنى 5,4 ملرد تەڭگەنى تۇراتىن 9 ينۆەستيتسيالىق جوبانى جۇزەگە اسىرۋ جوسپاردا بار.

Abai.kz