بەيسەنبى, 28 ناۋرىز 2024
ەل ءىشى... 5130 18 پىكىر 2 شىلدە, 2019 ساعات 13:31

شەرۋلەتىپ وتكىزگەن جارتى جىل (شولۋ)

بيلىك بەيبىت ميتينگ وتكىزۋگە رۇقسات بەردى. مۇنداي دا بولادى ەكەن-اۋ، دەگەن جۇرت اۋەلدە سەنەر-سەنبەسىن بىلمەدى. ادەتتە بىزدەگى كەز كەلگەن ميتينگ رۇقساتسىز ۇيىمداسادى. جو-جوق، رۇقسات سۇرايدى عوي. تەك بيلىك وعان رۇقسات بەرمەيدى. اقىرى جينالعان جۇرتتى بەتپەردە كيگەن ۇردا-جىق جەندەتتەر كۇشپەن تاراتاتىن. قۋالاسپاق وينايدى. ارتى سوتتاۋ، اكىمشىلىك جازاعا كەسۋ، قۋدالاۋمەن اياقتالادى. قازاقستانداعى بەيبىت ميتينگتەردىڭ ورتاق سيپاتى وسى.

بۇ جولى ولاي بولمادى. بيلىك ءوزى رۇقسات بەردى. الماتى مەن استانا (نۇر-سۇلتان) قالالارىندا ماۋسىمنىڭ 30-ى كۇنى بەيبىت ميتينگتەر ءوتتى.

الماتىدا «سارىارقا» كينوتەاترىنىڭ ارتىندا ورنالاسقان ساياسي-قوقىس الاڭى بار. ول جەر ءبىز ءۇشىن ساياسي «سۆالكا» بولعانىمەن، كوممۋنيستەردىڭ كيەلى ورنى. قىزىل جالاۋلىلار جىل سايىن جيىلىپ، كوسەمدەرىنە (لەنينگە) قۇلشىلىق قىلادى. ءبىر جىلدارى مۇحتار شاحانوۆ تا، مەملەكەتتىك ءتىل اكتسيالارىن سول الاڭدا وتكىزدى. وپپوزيتسيا سەركەلەرى دە سول جاققا جينالاتىن. باسقا جاققا بيلىك جولاتپايتىن. قىسقاسى، الگى ساياسي «سۆالكا» الماتىداعى ساياسي اكتسيالار پوليگونىنا اينالعان. كەشەگى رۇقسات ەتىلگەن ميتينگ تە سول الاڭدا ءوتتى. وعان 1,5 مىڭنان اسا ادام قاتىستى.

ال ەلورداداعى ميتينگتى وتكىزۋگە ءوتىنىش جازىپ، رۇقسات العان «بايتاق-بولاشاق» ەكولوگيالىق اليانسىنىڭ جەتەكشىسى ازاماتحان ءامىرتاي بولدى. باس قالاداعى جۇرت بىلە بەرمەيتىن «جەرۇيىق» دەيتىن ساياباققا دا شامامەن 1000-1500 ادام جيىلدى.

باسقاسىن ايتپاعاندا، ماجىلىستەگى قاھارماندار مەن قايراتكەرلەر دە الاڭعا شىقتى. وتكەندە عانا «قاي ەل ميتينگكە شىعىپ، مۇراتىنا جەتىپتى» دەپ سويلەگەن بەكەڭنىڭ (بەكبولات تىلەۋحان) ءوزى دە "ميتينگىلەتىپ" كەتتى. بيلىك پارتياسىنىڭ وكىلدەرى ميتينگكە شىقتى دەگەندى بۇرىن ەستىپ پە ەدىڭىزدەر؟ ءاي، قايدام... ولار نە دەدى، كىمگە قايرىلىپ سويلەدى، ول تۋرالى ەگجەي-تەگجەيلى جازدىق... قايتالاپ جاتپايىق...

ءجا، 2019-دىڭ جارتى جىلىن وتكەردىك. وسى جارتى جىل قازاق ءۇشىن، قازاقستان ءۇشىن ساياسي پروتسەسستەرگە تولى ءوتتى. قازاقستاندى كەزەكسىز 30 جىل باسقارعان نۇرسۇلتان نازارباەۆ وتستاۆكاعا كەتتى. كەزەكتەن تىس پرەزيدەنت سايلاۋىن وتكىزدىك. قازاقستان تاۋەلسىزدىك تاريحىنداعى ەكىنشى پرەزيدەنىن سايلادى. استاناداعى شەتىن وقيعا مەن ارىستاعى اپات ەل-حالىقتىڭ ساناسىن سىلكىپ وياتتى. وكىنىشكە وراي، جىل باسى قازامەن باستالدى. قاڭتاردا قاراعاندىداعى جانجالدان باستالعان تولقۋلاردىڭ سوڭى كەشەگى تەڭىزدەگى شەرۋگە دەيىن ۇلاستى. قاراپ وتىرساق، جىل باسىنان بەرى 100-گە جۋىق ميتينگ ءوتىپتى. مىڭداعان ادامدى پوليتسيا تۇتقىنداعان. جۇزدەگەن ادامعا اكىمشىلىك جازا كەسىلگەن. ونداعان ادام قامالعان. ءسوزىمىز سۇيىق شىقپاس ءۇشىن، سول ميتينگتەردى حرونولوگيالىق رەتى بويىنشا ەسكە ءتۇسىرىپ كورەيىكشى...

قاڭتاردان ماۋسىمعا دەيىنگى ميتينگتەر حرونولوگياسى

قاڭتار ايى. قاراعاندى وقيعاسى

01.01.2019 جىل. قاراعاندى قالاسىنداعى «درەۆني ريم» مەيرامحاناسىندا جانجال شىعىپ، ارتى جاپپاي توبەلەسكە ۇلاستى. 3 ادام جاراقات الىپ، 1 ادام قازا تاپتى. 23 جاستاعى قازاق جىگىتى كىسى قولىنان قازا تاپتى.

02.01.2019 جىل. توبەلەس بولعان جەرگە ونداعان ادام جينالدى.

03.01.2019 جىل. حالىق ميتينگىگە شىقتى.ءادىل تەرگەۋدى تالاپ ەتتى.

06.01.2019 جىل. جۇزدەگەن ادام قاراعاندى ورتالىعىنا جينالدى. ميتينگ ۇيىمداستىردى. نارازى حالىققا وبلىسى اكىمى ەرلان قوشانوۆ شىعىپ، اكىم رەتىندە، پرەزيدەنتتىڭ وكىلى رەتىندە ءىستى سوڭىنا دەيىن جەتكىزەتىنىنە ۋادە بەردى.

اقپان ايى. بەس ءسابيدىڭ قازاسى

04.02.2019 جىل. اقپاننىڭ 4-ىنە قاراعان ءتۇنى استانانىڭ سارىارقا اۋدانىنداعى كوكتال-2 دەپ اتالاتىن بولىگىندەگى جەكە مەنشىك ءۇيدىڭ اۋلاسىندا باسپانا ورتەنگەن. ءبىر ءۇيدىڭ بەس بالاسى قازا تاپتى.

05.02.2019 جىل. ورتتەن قازا تاپقان بەس ءسابيدى جەرلەۋ ءراسىمى ءوتتى. قارالى جيىنعا جۇزدەگەن ادام جيىلدى.

05.02.2019 جىل. اقتوبەدە ونداعان ادام جيىلىپ، قارالى جيىن وتكىزدى.

05.02.2019 جىل. الماتىدا ونداعان ادام جيىلىپ، قارالى جيىن وتكىزدى.

كوپ بالالى انالار ميتينگى

06.02.2019 جىل. كوپ بالالى انالار استانادا ميتينگ وتكىزدى. ونداعان ادام جينالدى. پرەزيدەنت نازارباەۆتىڭ اتىنا كوپ بالالى انالار اتىنان حات جازىلدى. ولار قازاقستان پرەزيدەنتى نۇرسۇلتان نازارباەۆقا كوپبالالى وتباسىلارىن باسپانامەن قامتاماسىز ەتۋدى، بالاعا مەملەكەتتەن تولەنەتىن جاردەماقىنى كوبەيتۋدى، تۇرمىس جاعدايلارىن جاقسارتۋدى تالاپ ەتتى. جينالعان جۇرتپەن كەزدەسۋگە استانا اكىمىنىڭ ورىنباسارى ەرمەك امانشاەۆ شىقتى.

06.02.2019 جىل. الماتىدا ءبىر توپ كوپ بالالى انا جينالدى.

07.02.2019 جىل. اقتوبە وبلىسىنىڭ بەرشۇگىپ اۋىلىندا جۇمىسشىلار ميتينگكە شىقتى. وبلىس اكىمدىگىنە بارعاندار بيلىككە 200-گە جۋىق ادامنىڭ اتىنان ارىز-شاعىم وتكىزدى.

07.02.2019 جىل. اقتوبە وبلىستىڭ اكىمدىگىنە كوپ بالالى انالار جينالدى.

08.02.2019 جىل. اقتوبە، الماتى مەن قىزىلوردا قالالارىندا ونداعان ادام جينالىپ ميتينگ وتكىزدى.

09.02.2019 جىل. استانادا ونداعان انا «استانا» كانسەرت زالىنىڭ الدىنا جينالىپ، اكىمدىككە تالاپتارىن جەتكىزبەك بولدى. نارازى انالارعا اكىمنىڭ ورىنباسارى ەرمەك امانشاەۆ كەلدى.

10.02.2019 جىل. شىمكەنتتە كوپ بالالى انالار جينالىپ، اكىمدىككە باردى.

11.02.2019 جىل. الماتىدا  اسحات بەرساليموۆ دەيتىن بەلسەندى ازامات ساياسي تۇتقىندار مەن كوپ بالالى انالاردى قولداپ جالعىزىلىكتى پيكەت وتكىزدى.

15.02.2019 جىل. استانا قالاسىنداعى كونتسەرت زالىنا جۇزدەگەن ادام جينالدى. ولاپ كوپ بالالى انالار ەدى. الەۋمەتتىك ماسەلەلەرىن ايتىپ، قالا اكىمىمەن كەزدەسۋدى تالاپ ەتتى.

15.02.2019 جىل. شىمكەنتتەگى «تۇركىستان» سارايىنا مىڭنان استام ادام جينالدى. اكىممەن كەزدەسۋگە كەلدى.

16.02.2019 جىل. شىمكەنتتە 300-گە جۋىق انا كەزدەسۋگە اكىمنىڭ كەلۋىن تالاپ ەتتى.

18.02.2019 جىل. الماتىدا كوپ بالالى انالار جينالدى.

20.02.2019جىل. الماتى اكىمىنىڭ ەسەپ بەرۋ جيىنىنا بارماق بولعان بەلسەندىلەردى پوليتسيا تۇتقىندادى.ولار "كوكجايلاۋدى قورعايىق!" قوزعالىسىنىڭ وڭىلدەرى ەدى.

20.02.2019 جىل. كەنتاۋلىق كوپ بالالى انالار اكىمنەن الەۋمەتتىك پروبلەمالاردى شەشۋدى سۇرادى.

20.02.2019 جىل. استانا قالاسىنداعى «قازمەديا ورتالىعى» الدىندا ەر ادام ۇكىمەت مۇشەلەرىنىڭ كەلۋىن تالاپ ەتتى.

25.02.2019 جىل. شىمكەنتتە دە كوپ بالالى انالار جينالىپ، قالا اكىمىمەن كەزدەسۋدى تالاپ ەتتى.

25.02.2019 جىل. جاڭاوزەندە ونداعان جۇمىسسىز ازامات ميتينگ وتكىزدى. پوليتسيا 16 ازاماتى اكىمشىلىك جازاعا تارتتى.

27.02.2019 جىل. الماتىداعى «نۇر وتان» پارتياسى الدىنا ءبىر توپ بەلسەندى جينالدى. ولاردى پوليتسيا ۇستادى.

28.02.2019 جىل. اقوردانىڭ الدىنا بىرنەشە ادام جينالدى. ولار كوپ بالالى انالار ەدى.

ناۋرىز ايى. استانا اتاۋىن وتگەرتۋگە قارسى اكتسيالار

04.03.2019 جىل. كوپ بالالى انالار نارازىلىق ءبىلدىردى.

06.03.2019 جىل. اقتوبەلىك انالار بيلىكتەن باسپانا ماسەلەسىن شەشۋدى تالاپ ەتتى.

11.03.2019 جىل. جاڭاوزەندە 100-گە جۋىق جۇمىسسىز ادام اكىمدىك الدىندا نارازىلىق ءبىلدىردى.

12.03.2019 جىل. شىمكەنتتە كوپ بالالى انالار نارازىلىققا شىقتى.

14.03.2019 جىل. ەۋروپارلامەنت قازاقستانداعى ادام قۇقىقتارى ماسەلەسى تۋرالى رەزوليۋتسيا قابىلدادى. ەۋروپارلامەنت قازاقستان بيلىگىن «ادام قۇقىقتارىن قۇرمەتتەپ، حالىقارالىق تالاپتاردى ورىنداۋعا، ساياسي قۋدالاۋلاردى توقتاتۋعا» شاقىردى.

18.03.2019 جىل. استانادا ونداعان كوپ بالالى انا مينيسترلەر ۇيىنە كەلىپ، ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆپەن كەزدەسۋدى تالاپ ەتتى.

21.03.2019 جىل. استانا قالاسىندا ءبىر توپ ازامات قالا اتاۋىن وزگەرتۋگە قارسى ميتينگكە شىقتى.

22.03.2019 جىل. استانادا ميتينگ ءوتتى. پوليتسيا ونداعان ادامدى ۇستادى.

22.03.2019 جىل. شىمكەنتتە پوليتسيا بىرنەشە ادامدى ۇستادى. ولار ميتينگ وتكىزبەك بولدى دەگەن كۇدىككە ىلىككەن.

22.03.2019 جىل. الماتىداعى گوگول مەن پانفيلوۆ كوشەلەرىنىڭ قيىلىسىندا ونداعان ادام جينالىپ، نارازىلىق اكتسياسىن وتكىزدى.

ءساۋىر ايى

02.04.2019 جىل. اقتوبەدە الەۋمەتتىك ماسەلەلەردى كوتەرگەن ءبىر توپ انا اكىمدىككە باردى.

11.04.2019 جىل. نۇر-سۇلتاندا ونداعان كوپ بالالى انا نارازىلىق تانىتتى.

12.04.2019 جىل. شىمكەنتتە كوپ بالالى انالار اكىممەن كەزدەسۋگە تاعى جينالدى.

16.04.2019 جىل. نۇر-سۇلتاندا ونداعان كوپ بالالى انا نارازىلىق ءبىلدىردى.

وت پراۆدى نە ۋبەجيش اكتسيالارى

21.04.2019 جىل. بەلسەندىلەر سايلاۋعا قارسى «وت پراۆدى نە ۋبەجيش» دەگەن اكتسيا ۇيىمداستىردى. سوت ءاسيا تولەسوۆا مەن بەيبارىس تولىمبەكوۆتى كىنالى دەپ تاۋىپ، 15 كۇنگە قامادى. بەلسەندىلەر مارافون كەزىندە «وت پراۆدى نە ۋبەجيش» دەگە جازۋى بار پلاكات ۇستاپ تۇرعان.

22.04.2019 جىل. الماتىدا ءبىر توپ بەلسەندى ءاسيا تولەسوۆا مەن بەيبارىس تولىمبەكوۆتىڭ قامالۋىنا قارسى قالالىق سوت الدىندا جينالدى.

24.04.2019 جىل. قاراعاندى تۇرعىنى تولەسوۆا مەن تولىمبەكوۆتى قولداپ، فلەشموب وتكىزدى.

25.04.2019 جىل. پاريجدە ءبىر توپ ازامات الماتىدا قامالعان بەلسەندىلەردى قولداپ، اكتسيا وتكىزدى.

25.04.2019 جىل. Freedom House ۇيىمى قازاقستان بيلىگىن الماتىدا ۇستالعان بەلسەندىلەردى بوساتۋعا شاقىردى.

25.04.2019 جىل. پراگادا ءبىر توپ ازامات الماتىدا قامالعان بەلسەندىلەردى قولداپ، اكتسيا وتكىزدى.

25.04.2019 جىل. Amnesty International  ۇيىمى تولەسوۆا مەن تولىمبەكوۆتى قولداپ، «ار-وجدان تۇتقىنى» دەپ تانىدى.

26.04.2019 جىل. لوندوندا ءبىر توپ ازامات الماتىدا قامالعان بەلسەندىلەردى قولداپ، اكتسيا وتكىزدى.

27.04.2019 جىل. ميلاندا ءبىر توپ ازامات الماتىدا قامالعان بەلسەندىلەردى قولداپ، اكتسيا وتكىزدى.

29.04.2019 جىل. نۇر-سۇلتاندا ءبىر توپ ازامات الماتىدا قامالعان بەلسەندىلەردى قولداپ، اكتسيا وتكىزدى.

29.04.2019 جىل. لوندون مارافونىندا «شىندىقتان قاشىپ قۇتىلمايسىڭ» باننەرى ءىلىندى.

29.04.2019 جىل. الماتىدا سوت «كونستيتۋتسيا» ءسوزى جازىلعان باننەر ىلگەن ازاماتتى 5 تاۋلىككە قامادى.

30.04.2019 جىل. بۋداپەشت پەن تورونتودا ءبىر توپ ازامات الماتىدا قامالعان بەلسەندىلەردى قولداپ، اكتسيا وتكىزدى.

مامىر ايى. سايلاۋعا سەنىمسىزدىك ميتينگىلەرى

01.05.2019 جىل. نۇر-سۇلتاندا جۇزدەگەن (مىڭنان اسادى) ادام ميتينگكە شىقتى.

01.05.2019 جىل. الماتىدا جۇزدەگەن ادام ميتينگكە شىقتى.

01.05.2019 جىل. شىمكەنتتە ونداعان ادام ميتينگكە شىقتى.

01.05.2019 جىل. اقتوبەدە ونداعان ادام ميتينگكە شىقتى.

01.05.2019 جىل. قاراعاندىدا ونداعان ادام ميتينگكە شىقتى.

02.05.2019 جىل. شىمكەنتتە جاردەماقى تالاپ ەتكەن انا ەكىنشى قاباتتان سەكىرمەك بولدى.

09.05.2019 جىل. الماتىدا پوليتسيا بىرنەشە ادامدى ۇستادى. ولار رۇقسات ەتىلمەگەن ميتينگ وتكىزۋى مۇمكىن دەگەن كۇدىككە ىلىكتى. مۇنداي شارالار نۇر-سۇلتاندا، اتىراۋدا، اقتوبەدە دە ورىن الدى.

15.05.2019 جىل. پەتروپاۆلدا 300-گە تارتا جۇمىسشى نارازىلىققا شىقتى. ءۇش ايدان بەرى جالاقىلارىن الماعان ازاماتتار زاۋىت اكىمشىلىگىنىڭ الدىنا جينالدى.

16.05.2016 جىل. ونداعان كوپ بالالى انا ميتينگكە شىقتى.

21.05.2019 جىل. شىمكەنتتە جۇزگە جۋىق ادام «ادىلەتسىز» سوت ۇكىمەنى نارازىلىق ءبىلدىرىپ، اكتسيا وتكىزدى.

21.05.2019 جىل. الماتىدا ونداعان نارازى ازامات يپوتەكاسىن كەشىرۋدى تالاپ ەتىپ، «نۇر وتان» كەڭسەسىنىڭ الدىنا جينالدى.

23.05.2019 جىل. نۇر-سۇلتاندا 30-عا جۋىق انا باسپانا ماسەلەسىن شەشۋدى تالاپ ەتتى.

ماۋسىم ايى

01.06.2019 جىل. نۇر-سۇلتاندا «حالىق قۇرىلتايى» ءوتتى. وعان جۇزدەگەن ادام قاتىستى.

03.06.2019 جىل. كوپ بالالى انالار اقوردانىڭ الدىنا باردى.

04.06.2019 جىل. ەڭبەك جانە حالىقتى الەۋمەتتىك كورعاۋ مينيسترلىگىنە جۇزگە جۋىق كوپ بالالى انا كەلدى.

05.06.2019 جىل. الماتىلىق بەلسەندىلەر «Oyan, Qazaqstan» قوزعالىسىن قۇردى.

09.06.2019 جىل. الماتى مەن نۇر-سۇلتاندا ميتينگكە جۇزدەگەن ادام شىقتى. پوليتسيا 500-شە جۋىق ادامدى قاماۋعا الدى. بۇدان بولەك، ميتينگتەر باسقا قالالاردا دا ءوتتى. شىمكەنتتە پوليتسيا ونداعان ادامدى ۇستادى. اقتوبەدە دە ونداعان ادام ۇستالدى. الماتى مەن نۇر-سۇلتاندا ۇستالعانداردىڭ اراسىندا باق وكىلدەرى مەن حالىقارالىق باقىلاۋشىلار دا بولعان.

10.06.2019 جىل. الماتىدا سايلاۋ ناتيجەسىن جارامسىز دەپ تانۋدى تالاپ ەتكەن بەلسەندىلەر ميتينگ وتكىزدى. پوليتسيا 50-60 ادامدى ۇستادى. سول كۇنى شىمكەنتتە دە نارازىلىقتار بولىپ، ونشاقتى ادام ۇستالعان.

10.06.2019 جىل. الماتىداعى كۇندىزگى بولعان ميتينگتە پوليتسيا تۇتقىنداعان اقىن رينات زايتوۆتى بوساتۋدى تالاپ ەتكەندەر كەشكىسىن ميتينگكە قايتا شىقتى. ميتيگكە جينالعانداردى پوليتسيا كۇشپەن تاراتتى. ونداعان ادام ۇستالدى. بۇل كۇنى ميتيگتەر قالانىڭ بىرنەشە جەرىندە ءوتتى.

11.06.2019 جىل. الماتىدا پوليتسيا بىرنەشە ادامدى ۇستادى.

12.06.2019 جىل. نۇر-سۇلتاندا پوليتسيا بىرنەشە ادامدى ۇستاپ اكەتتى.

12.06.2019 جىل. الماتىدا بەلسەندى جاستار «ويان، قازاقستان» اكتسياسىن ۇيىمداستىردى.

15.06.2019 جىل.  سەۋلدە ءبىر توپ ازامات الماتىدا قامالعان بەلسەندىلەردى قولداپ، اكتسيا وتكىزدى.

25.06.2019 جىل. الماتى اكىمدىگى بەلسەندىلەرگە ميتينگ وتكىزۋگە رۇقسات بەردى.

26.06.2019 جىل. نۇر-سۇلتان اكىمدىگى ەكولوگيالىق ۇيىمعا بەيبىت ميتينگ وتكىزۋگە رۇقسات بەردى.

27.06.2019 جىل. ارىستىڭ نارازى ازاماتتارى شىمكەنتتە ميتينگ وتكىزدى.

29.06.2019 جىل. اتىراۋ وبلىسى، جىلىوي اۋدانى، تەڭىز جۇمىسشىلار اۋىلىندا جۇمىسشىلار اراسىندا جاپپاي توبەلەس بولدى. 30-عا جۋىق ادام جاراقات الدى. وزگە مەملەكەت ازاماتىنىڭ قازاق قىزىمەن تۇسكە نانايى سۋرەتى الەۋمەتتىك جەلىگە جاريالانعان. ارتى نارازىلىققا ۇلاسىپ، توبەلەسپەن اياقتالدى.

30.06.2019 جىل. الماتى مەن نۇر-سۇلتان قالالارىندا جۇزدەگەن ادام قاتىسقان بەيبىت ميتينگ ءوتتى.

30.06.2019 جىل. الماتىداعى «سارىارقا» كينوتەاترىنىڭ ارتىنداعى الاڭدا وتكەن ميتينگكە مىڭعا جۋىق ادام قاتىستى.

30.06.2019 جىل. ال نۇر-سۇلتانداعى «جەرۇيىق» ساياباعىندا «بايتاق-بولاشاق» ەكولوگيالىق قوزعالىسى وتكىزگەن ميتينگكە جۇزدەن استام ادام قاتىستى.

وسى كۇنى «نۇر وتان» پارتياسى وكىلدەرى دە ەل اراسىنا ىرىتكى سالۋشىلارعا قارسى ميتينگ وتكىزدى.

قوش! بىلتىرعى جولداۋىندا ەكس-پرەزيدەنت نازارباەۆ 2019 جىلدى – «جاستار جىلى» دەپ جاريالاۋدى ۇسىنعان ەدى. ال بيىل قاڭتاردا «جاستار جىلى» بولىپ رەسمي بەكىتىلدى. قۇزىرلى ورگاندارعا بىرقاتار تاپسىرمالار جۇكتەلدى. ول ءۇشىن ارنايى بيۋدجەت تە قاراستىرىلعان بولدى. جاستارعا كوڭىل ءبولىندى. ءبىراز مۇمكىندىكتەر جاسالاتىن بولدى دەپ قۋاندىق. ۇكىمەت جىرتىعىمىزدى جاماماسا دا، ايتەۋىر كوڭىلدە بارمىز دەدىك. تۇك بىتىرمەدى دەۋدەن جانە اۋلاقپىز. ازدى-كەم قولعا الىنعان شارۋالار دا جوق ەمەس. دەسە دە، وسى ءبىر اتاۋلى جىل سول جىل باسىنان بەرى ۇزدىكسىز ءوتىپ جاتقان ساياسي پروتسەسستەردىڭ تاساسىندا قالعانى جانە شىندىق. ءاسىلى بيىل، «جاستار جىلى» ەمەس، «ميتينگتەر جىلىنا» اينالىپ بارا جاتىر...

ءتۇيىن

جارتى جىل ىشىندە مەملەكەتىمىزدە وتكەن ميتينگىلەردىڭ قىسقاشا حرونيكاسى وسىنداي. ءبىزدى قازىر باستى ءۇش ساۋال مازالايدى. جوعارىدا اتاپ كورسەتكەن جۇزگە جۋىق تولقۋلاردان نە وزگەردى؟ بۇل نارازىلىق شارالارى قاشانعا دەيىن جالعاسادى؟ ەلدە قوي ۇستىندە بوزتورعاي جۇمىرتقالاعان زامان تۋى ءۇشىن توقاەۆ بيلىگى قانداي قادامدار جاساعانى دۇرىس؟

بۇل ساۋالدارعا ءسىز جاۋاپ بەرىپ كورىڭىزشى، قۇرمەتتى وقىرمان!

نۇرگەلدى ابدىعانيۇلى

Abai.kz

18 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3530