بەيسەنبى, 28 ناۋرىز 2024
الاڭ 5571 34 پىكىر 1 شىلدە, 2019 ساعات 16:33

«قاي ەل ميتينگكە شىعىپ مۇراتىنا جەتىپتى» دەگەن بەكەڭنىڭ ءوزى ميتينگكە شىقتى

جىل باستالعالى ەلدە كوپتەگەن ميتينگ-شەرۋلەر ءوتىپ، بيلىك وكىلدەرىنىڭ مازاسىن قاشىرعان ەدى. رەسمي بيلىك بۇل شەرۋلەردى رۇقسات ەتىلمەگەن، زاڭسىز ارەكەتتەر دەپ باعالادى. 

وسىدان كەيىن بيلىك باسىنداعىلار بەيبىت ميتينگىگە رۇقسات بەرەتىندەرىن ايتتى. وسىعان وراي 30 ماۋسىم كۇنى نۇر-سۇلتان مەن الماتى قالالارىندا رۇقسات ەتىلگەن ميتينگىلەر ءوتتى.

نۇر-سۇلتان قالاسىنداعى «جەرۇيىق» ساياباعىندا 1500-دەن استام ادام جينالدى. «ءبىز بىرگەمىز!» دەپ اتالاتىن بەيبىت اكتسياعا قالا تۇرعىندارىنان بولەك، باقىتجان ەرتاەۆ، باقىتبەك سماعۇل، بەكبولات تىلەۋحان، پاۆەل كازانتسەۆ، باقىتگۇل حامەنوۆا سىندى دەپۋتاتتار مەن ورازكۇل اسانعازى التىناي جوراباەۆا سەكىلدى تانىمال ادامدار قاتىستى.

«نۇر وتان» پارتياسى بۇل جينالىستى «ەلدىڭ اراسىنا ىرىتكى سالىپ جۇرگەن ارانداتۋشىلاردىڭ قيتۇرقى ارەكەتتەرىنە قارسى حالىق بەيبىت شەرۋگە شىقتى» دەپ باعالادى. بيلىك پارتياسىنىڭ ايتۋىنشا، جينالعان حالىق قاشقىن بانكير ءابىلازوۆ سەكىلدى ادامداردىڭ ارەكەتتەرىنە قارسى ءوز ويلارىن ورتاعا سالىپتى.

«ميتينگىگە ەلدىڭ ەرتەڭىنە بەيجاي قارامايتىن بەلسەندى ازاماتتارمەن بىرگە بىرقاتار پارلامەنت دەپۋتاتتارى جانە بەلگىلى قوعام قايراتكەرلەرى دە قاتىسۋدا. بەيبىت شەرۋ دەپ اتى ايتىپ تۇرعانداي، مۇندا ەشقانداي قۇقىقبۇزۋشىلىقتار ورىن الماي، بارلىعىنىڭ زاڭ اياسىندا جۇرگىزىلىپ جاتقانىن دا اتاپ وتكەن ءجون»، - دەپ جازىلدى «نۇر وتان» پارتياسى تاراتقان رەسمي اقپاراتتا.

ال الاڭعا كەلگەن دەپۋتاتتار ەلدىڭ اراسىنا ىرىتكى سالىپ جۇرگەن ارانداتۋشىلارعا قارسىلىق تانىتۋ ءۇشىن شەرۋگە شىققاندارىن ايتتى.

«ءابليازوۆتى سوتتاعان تەك قازاقستان ەمەس. ونى ەۋروپا دا، ۋكراينا دا، رەسەي دە سوتقا بەردى. ءتىپتى گرۋزيا ابىلازوۆقا بەرگەن اتاعىن قايتارىپ الدى، "الاياققا بەرەتىن اتاعىمىز جوق" دەپ. سول الاياق «قىرعىز رەۆوليۋتسياسىن جاساعان مەنمىن، اقشاسىن تولەگەن مەنمىن. قازاقستانعا اسەر ەتۋ ءۇشىن جاسادىم»، دەپ مويىندادى. سوندا قانشاما قاندى موينىنا جۇكتەپ جاتقانىن شىمىرىكپەي ايتقان ادامنىڭ سوزىنە يلانىپ، سوعان سەنگەن ادامدا ەس بار ما، اعايىن-اۋ؟! قاي ەل ميتينگىگە شىعىپ، قاي ەل توڭكەرىس جاساپ مۇراتىنا جەتىپتى؟! »، - دەدى بەكبولات تىلەۋحان ميتينگىدە سويلەگەن سوزىندە.

حالىق قاھارمانى، ءماجىلىس دەپۋتاتى باقىتجان ەرتاەۆ سىرتتا وتىرىپ الىپ يت بولىپ ءۇرىپ جۇرگەندەر ءبىز سەكىلدى وتانشىلداردان اباي بولسىن، ساقتانسىن دەگەن ويىن ايتتى.

«ءبىز شەتەلدە وتىرىپ الىپ، ەلىمىزدىڭ اراسىنا لاڭ سالىپ، دۇربەلەڭ تۋعىزعىسى كەلەتىندەرگە جول بەرمەيمىز. ءبىز ءبارىمىز بىرىگىپ، وسىندايلاردى توقتاتۋىمىز كەرەك. وتان ءۇشىن بىرىگۋ – ءبىزدىڭ پارىزىمىز! ءبىز وتانىمىزعا كىر كەلتىرمەيمىز! ءبىز وتانىمىزدى قورعايمىز! سوندىقتان بىزگە قاراپ يت بولىپ ءۇرىپ جۇرگەندەر اباي بولسىن»، – دەدى ب.ەرتاەۆ.

ال «نۇر وتان» پارتياسىنىڭ مۇشەسى ورازكۇل اسانعازى ەلدەگى بارشا جىگىتتەرگە ۇندەۋ تاستادى. ونىڭ ايتۋىنشا، نامىسى بار ەركەك ايەلىن كوشەگە جىبەرىپ، ءوزى ۇيدە وتىرماۋ كەرەك. "ءبىر قاتىنعا شاماڭ كەلمەسە قانداي ەركەكسىڭ" دەپ ۇرانداتقان ورازكۇل اپامىز ءار جىگىت ايەلىن كوشەگە (ميتينگىگە) جىبەرمەۋى كەرەك ەكەنىن ايتتى.

 «جىگىتتەر، ەركەك بولىڭدار، نامىستى بولىڭدار! ايەلدەرىن كوشەگە جىبەرىپ، وزدەرى ۇيدە وتىرعان ەركەكتەردىڭ تىرلىگى نە دەگەن سۇمدىق، نە دەگەن ماسقارا؟! ەر-ازامات دەگەن اتقا ساي ارەكەت ەتىپ، ءار ەركەك ايەلدەرىنە يە بولۋ كەرەك»، - دەدى ورازكۇل اسانعازى اپامىز ميتينگىدە (كوشەدە) سويلەگەن سوزىندە.

ورازكۇل اسانعازىنىڭ «ايەلدەرىن كوشەگە جىبەرىپ، وزدەرى ۇيدە وتىرعان ەركەكتەردىڭ تىرلىگى نە دەگەن سۇمدىق» - دەگەن پىكىرىن دەپۋتات بەكبولات تىلەۋحان «ماسقارا، ماسقارا!» دەپ قولدادى مىنبەردە تۇرىپ.

تارتىپكە باعىنعان قۇل بولمايدى دەگەن ءماجىلىس دەپۋتاتى باقىتگۇل حامەنوۆا جاستاردى ايتاققا ەرمەيتىن ەتىپ تاربيەلەۋىمىز كەرەك ەكەنىن ايتتى.

ءسوز سوڭىندا، بۇل جينالىستا ءسوز العانداردىڭ بارلىعى بارىنشا زور داۋىسپەن، ۇرانداپ، جۇلقىنىپ سويلەگەنىن ايتا كەتەيىك.

قۋانىش قاپپاس

Abai.kz

34 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3530