قىزىلوردا وبلىسىنىڭ ورتالىعىندا وتكەن حالىقارالىق ينتەرنەت-فورۋمعا رەسەي، تاتارستان، سينگاپۋر جانە قازاقستان مەملەكەتتەرىنەن ساراپشىلار كەلدى، - دەپ حابارلايدى اباي-اقپارت.

ماماندار وڭىردەگى ءبىلىم بەرۋ جانە جۇمىسپەن قامتۋ سالاسىنىڭ بولاشاعى، جىلدام وزگەرەتىن زاماناۋي ەڭبەك نارىعى جاعدايىنداعى جاڭا سىن-قاتەرلەر مەن مۇمكىندىكتەر، سياقتى وزەكتى ماسەلەلەر تالقىلادى.

فورۋم مودەراتورى – قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ اقپاراتتىق تەحنولوگيالاردى دامىتۋ جونىندەگى ۆيتسە-رەكتورى ءاليا مۇحامەدجانوۆا.

شاراعا قاتىسقان قىزىلوردا وبلىسىنىڭ اكىمى ق.كوشەرباەۆ:

– ءبىز ءتورتىنشى ينتەرنەت-فورۋمدى ادام كاپيتالىن دامىتۋعا ارناپ وتىرمىز. ويتكەنى الەمدىك تاجىريبە كورسەتكەندەي، قازىرگى كەزەڭدە مەملەكەتتىڭ ەكونوميكالىق ءوسۋىنىڭ شەشۋشى فاكتورى - ادام كاپيتالىن قالىپتاستىرۋ مەن دامىتۋعا بايلانىستى ينۆەستيتسيالار. الەمدە ءبىلىم بەرۋدى دامىتۋعا مەملەكەتتىك شىعىستار بۇرىننان الەۋمەتتىك شىعىندار رەتىندە ەسەپتەلمەيدى. سەبەبى بۇل - تابىس اكەلەتىن ينۆەستيتسيا. «بارلىعىن كادرلار شەشەتىنىن» تۇسىنەمىز، سوندىقتان وبلىستىق بيۋدجەتتىڭ 40% استامىن ءبىلىم بەرۋ سالاسىنا باعىتتايمىز، - دەپ اتاپ ءوتتى.

ايتالىق، سىر وڭىرىندە "HackDay" جاس IT-مامانداردىڭ ءبىرىنشى وڭىرلىك فەستيۆالى ۇيىمداستىرىلدى. بۇگىنگى تاڭدا وبلىس جاستارى "IT-ەشەلون" جوباسى شەڭبەرىندە ۆەب-باعدارلامالاۋ نەگىزدەرى مەن فرونتەند-ازىرلەمەلەر بويىنشا اقىسىز نەگىزدە ءبىلىم الۋدا.

فورۋمعا ونلاين جانە وفلاين رەجيمىندە قر دەنساۋلىق ساقتاۋ ۆيتسە-ءمينيسترى ولجاس ابىشەۆ، "ميسيس" ۇتزۋ دامۋ جونىندەگى ديرەكتورى نۇرلان قياسوۆ، BTSDigital ءبىلىم بەرۋ جوبالارىنىڭ جەتەكشىسى ساياسات نۇربەك، ەلەكتروندىق ۇكىمەت ورتالىعىنىڭ ديرەكتورى/سينگاپۋر ۇلتتىق ۋنيۆەرسيتەتىنىڭ حالىقارالىق باعدارلاماسىنىڭ جۇيەلىك عىلىمدار ينستيتۋتىنىڭ باسشىسى اشوك كۋمار سيتحارامان، "يننوپوليس" ۋنيۆەرسيتەتىنىڭ رەكتورى الەكساندر تورماسوۆ، سونداي-اق ساندىق تەحنولوگيالار جانە ادامي رەسۋرستاردى دامىتۋ سالاسىنداعى باسقا دا ساراپشىلار قاتىستى. سونىمەنقاتار وبلىس اكىمدىگى ينتەرنەت پايدالانۋشىلارى ءۇشىن الەۋمەتتىك جەلىلەردەگى (YouTube جانە Facebook) رەسمي اككاۋنتتارى ارقىلى ونلاين ترانسلياتسيا ۇيىمداستىردى.

ەستەرىڭىزگە سالا كەتەيىك، 2016 جىلى ءبىرىنشى ينتەرنەت-فورۋم ەلەكتروندىق كوممەرتسيانى دامىتۋعا، ەكىنشى (2017) - بايقوڭىر قالاسىندا كاسىپكەرلىكتى دامىتۋعا، ءۇشىنشى (2018) – وڭىردە تسيفرلاندىرۋدى دامىتۋعا ارنالدى. ايتا كەتۋ كەرەك، اتالمىش فورۋمداردى وتكىزۋ ناتيجەسىندە وبلىستا "بارس-گرۋپپ" تاتار كومپانياسىمەن بىرلەسىپ "ەلەكتروندىق بالاباقشا" جوباسى جۇزەگە اسىرىلدى. بۇگىنگى كۇنى جۇيە 425 مەكتەپكە دەيىنگى ءبىلىم بەرۋ مەكەمەسىنە ەنگىزىلدى. سونداي-اق، "ترانستەلەكوم" كومپانياسىمەن بىرىگىپ تۇرعىنۇي كوممۋنالدىق شارۋاشىلىق شىعىندارىن وڭتايلاندىرۋدى كوزدەيتىن "ە-شاڭىراق" زياتكەرلىك اقپاراتتىق جۇيەسىنىڭ پيلوتتىق جوباسى ىسكە اسىرىلدى. قازىرگى تاڭدا جۇيە 6 كوپقاباتتى ۇيگە ەنگىزىلگەن، جىل سوڭىنا دەيىن تاعى 170 ءۇيدى ەنگىزۋ جوسپارلانۋدا.

Abai.kz