بەيسەنبى, 22 قازان 2020
COVID-19 قازاقستاندا. جۇقتىرعاندار — 109766. جازىلعاندار — 105301. قايتىس بولعاندار — 1796
نە دەيدى؟! 2730 11 پىكىر 26 ماۋسىم, 2019 ساعات 10:20

قوستانايدىڭ ورتالىعىنداعى جالعىز قازاق باستاۋىش مەكتەبى شالعايعا كوشىرىلەدى

قوستاناي قالاسىنىڭ اكىمدىگى قالاداعى التىنسارين كوشەسى، 107 مەكەن جايىندا ورنالاسقان باستاۋىش ءبىلىم بەرەتىن №24 مەكتەپ-گيمنازيانى بورودين كوشەسى 138/1 بويىندا تۇرعان بۇرىنعى كاسىپتىك-تەحنيكالىق كوللەدج عيماراتىنا كوشىرۋگە شەشىم قابىلداعالى وتىر. كەرىسىنشە، گيمنازيا عيماراتىن بالاباقشا ەتپەكشى. كەشە وسى ماسەلەگە قاتىستى قوستاناي قالاسىنىڭ اكىمى قايرات احمەتوۆ ءبىلىم ورداسىندا اتا-انالارمەن كەزدەسۋ وتكىزدى. بيلىك تاراپى مەن اتا-انالار ءبىر شەشىمگە كەلە المادىق.

بۇل 20 جىلدان استام تاريحى بار قارا شاڭىراق كەزىندە ەلدىڭ زيالى ازاماتتارى، اقساقالدارى، اتا-انالار بار ابىروي-بەدەلىن سالا ءجۇرىپ اشىلعان وقۋ ورداسى. 20 جىلدا تالاي قيىندىقتى كوردى، ءبارىبىر تولاعاي جەتىستىكتەرگە قول جەتكىزىپ كەلەدى. ەندى مىنە، قوستانايدىڭ ورتالىعىنداعى انا تىلىمىزدە ءبىلىم بەرەتىن جالعىز باستاۋىش گيمنازيا شالعاي كوشكەلى تۇر. قازىرگى عيماراتتى بالاباقشا ەتىپ اشپاقشى. ەستۋىمىزشە، ونى مەكتەپكە دەيىنگى مەكەمەگە بەيىمدەۋ ءۇشىن جاڭالاپ جوندەپ، جابدىقتاۋعا 100-150 ميلليون تەڭگە قىرۋار قاراجات كەتەدى ەكەن. ءبىز، اتا-انالار قوستاناي قالاسى اكىمدىگىنىڭ بۇل شەشىمىنە تۇبەگەيلى قارسىمىز! بالالارىمىزدىڭ قازىرگى ورنىندا قالىپ وقىعانىن قالايمىز!

قالا ورتالىعىنداعى جالعىز باستاۋىش مەكتەپتىڭ وقۋشىلارى ساباقتان بولەك، بالالار شىعارماشىلىعى سارايىندا بي، ۆوكال، سۋرەت، اسپاپتا ويناۋ ۇيىرمەلەرىنە جانە پاۆلوۆ كوشەسىندە ورنالاسقان مۋزىكا مەكتەبىندە قوسىمشا ءبىلىم الۋدا. مەكتەپ ءبىلىمى، ۇيىرمەلەر مەن قوسىمشا وقۋدىڭ ارقاسىندا وقۋشى بالعىندار قازىر ءبىلىم، ونەر-مادەنيەت، سپورت، باسقا دا سالالاردان رەسپۋبليكالىق، حالىقارالىق كونكۋرستاردىڭ جەڭىمپازدارى اتانۋدا. وتكەن 2018-2019 وقۋ جىلىنىڭ وزىندە ءبىلىم سالاسى جاعىنان حالىقارالىق بايقاۋلاردان 17, رەسپۋبليكالىق جارىستاردان 8 جۇلدە ەنشىلەپ كەلگەن. ونەر-مادەنيەت سالاسىنان دا كەندە ەمەس. ءبىر عانا مىسال، تەك سوڭعى ءبىر ايدا بالالار شىعارماشىلىعى سارايىنىڭ «التىناي» حالىقتىق بي ءانسامبلىنىڭ جاس بيشىلەرى الماتى مەن بۋرابايدا وتكەن حالىقارالىق بي بايقاۋىنان 3 گران-پري يەلەنىپ كەلىپ وتىر.

مىنە، وسىنداي تالاپتى ۇل-قىزدارىمىز ءۇشىن التىن ۇيا سانالاتىن قارا شاڭىراعىنان كوشۋ اۋىر سوققى بولعالى تۇر. بىرىنشىدەن، 6 مەن 10 جاس ارالىعىنداعى  500 بالانىڭ تاعدىرىنا، ءبىلىم مەن شىعارماشىلىق دامۋىنا بالتا شابىلعالى تۇر! ەكىنشىدەن، مەكتەپتى كوشىرۋ ورتالىق اۋداندا تۇراتىندار مەن وسى جەردە جۇمىس ىستەيتىندەر ءۇشىن بالالاردى تاسىمالداۋ جاعىنان ماتەريالدىق جانە ۋاقىت جاعىنان وراسان سالماق بولعالى تۇر. ۇشىنشىدەن، شالعاي اۋداننان وقىتۋعا قارسى اتا-انالار بالالاردى ورتالىقتاعى №1, №2 جانە گوركي اتىنداعى گيمنازيانىڭ ورىس سىنىپتارىنا بەرۋگە ءماجبۇر بولادى. وسىلايشا، ءسىز بەن ءبىز انا تىلىمەن ءبىلىمىن باستاعان ۇرپاعىمىزدىڭ وبالىنا قالعالى وتىرمىز. التىن ۇيا مەكتەبىمىزدىڭ كوشىرىلۋىنە قارسىمىز!

ال قالا اكىمى قايرات احمەتوۆ قازىر قوستاناي ورتالىعىندا بالاباقشانىڭ جەتىسپەۋشىلىگى وتكىر ماسەلە ەكەنىن العا تارتتى. ماسەلەن، مۇندا بالعىندار 4 جىل ءبىلىم الادى دا، ورتا ءبىلىمدى باسقا مەكتەپەردە جالعاسىرادى. ەگەر گيمنازيا كاسىپتىك-تەحنيكالىق كوللەدج عيماراتىنا كوشسە، ولار 1 سىنىپتان 11 سىنىپقا دەيىن ەشقايدا كوشپەي، سول جەردە قازاق تىلىندە ءبىلىم الا الادى.

ءبىزدىڭ ەندىگى ءۇمىتىمىز وبلىس باسشىلىعىندا. ايماق اتقامىنەرلەرى وسى ماسەلەگە تىكەلەي ارالاسىپ، جاعدايدى شەشىپ بەرەدى دەگەن سەنىمىمىز زور.

وبلىس اكىمىنە جازىلعان حاتقا 150-دەن استام اتا-انا قول قويدى.

قوستاناي قالاسى

Abai.kz

11 پىكىر