توقاەۆ: تۇرعىنداردىڭ قاۋىپسىزدىگىن قامتاماسىز ەتۋ قاجەت
قازاقستان پرەزيدەنتى قاسىم-جومارت توقاەۆ ارىستاعى جارىلىسقا قاتىستى مينيسترلەر مەن وبلىس اكىمىنە شۇعىل شارالار قابىلداۋدى تاپسىردى.
بۇل تۋرالى پرەزيدەنت Twitter جەلىسىندەگى جەكە پاراقشاسىندا جازدى.
"قورعانىس، ىشكى ىستەر مينيسترلەرىنە جانە تۇركىستان وبلىسىنىڭ اكىمىنە ارىس قالاسىنداعى اسكەري بولىمىندەگى وق-ءدارى قويماسىندا بولعان جارىلىستىڭ زارداپتارىن جويۋ جونىندە شۇعىل شارالار قابىلداۋدى تاپسىردىم. تۇرعىنداردىڭ قاۋىپسىزدىگىن قامتاماسىز ەتىپ، جارىلىستىڭ سەبەپتەرىن انىقتاۋ قاجەت", - دەپ جازدى توقاەۆ.
دۇيسەنبى تۇركىستان وبلىسى ارىس قالاسىنداعى اسكەري ءبولىمنىڭ اۋماعىنداعى قويمادا جويقىن جارىلىس بولىپ، ارتىنشا الاپات ورتكە ۇلاستى.
قورعانىس مينيسترلىگى قازىرگى ۋاقىتتا جارىلىس سالدارىنان قازا تاپقاندار مەن زارداپ شەكەندەردىڭ جوق ەكەنىن حابارلادى. وقيعانىڭ ءمان-جايى مەن سەبەپتەرى انىقتالىپ جاتىر.
جارىلىستىڭ سالدارىن جويۋ جۇمىستارىن وبلىستىق توتەنشە جاعدايلار دەپارتامەنتى، تۇركىستان وبلىسى مەن شىمكەنت اكىمدىكتەرى جۇرگىزىپ جاتىر.
ارىس تۇرعىندارى شۇعىل تۇردە شىمكەنت قالاسىنا كوشىرىلە باستادى. قورعانىس مينيسترلىگى وقيعا ورنىنا ارنايى كوميسسيا جىبەردى. وبلىس اكىمى ومىرزاق شوكەەۆ توتەنشە جاعداي ورنىنا شىقتى.
