21 ماۋسىم كۇنى قىزىلوردادا سىرداريا وزەنىنىڭ سول جاعالاۋىنداعى 40 پاتەرلى ءۇيدىڭ ىرگەتاسى قالاندى، بۇل – سول جاعالاۋدا سالىناتىن 3 جاڭا شاعىن اۋداننىڭ العاشقى كوپقاباتتى ءۇيى، - دەپ حابارلايدى اباي-اقپارات.

سالتاناتتى شاراعا قاتىسقان وبلىس اكىمى قىرىمبەك كوشەرباەۆ سول جاعالاۋدا سالىنعان شاعىن اۋداننىڭ 70 پايىزعا جۋىق پاتەر يەسى قونىستانىپ ۇلگەرگەنىن جەتكىزدى.

– بۇگىن ءبىز سول جاعالاۋداعى جاڭا ءۇش شاعىن اۋداننىڭ العاشقى ءۇيىن سالۋعا كىرىسۋدەمىز. جىل سوڭىنا دەيىن مۇندا 2466 پاتەرلىك 53 ءۇي سالىنادى. جالپى، سوڭعى 6 جىلدا ايماقتا 361 كوپقاباتتى ءۇي نەمەسە 7000 پاتەر سالىندى. ونىڭ ىشىندە 600 استام پاتەردى بۇرىنعى اپاتتى ۇيلەردىڭ تۇرعىندارى الدى. قىزىلوردا وبلىسى – اپاتتى جاعدايداعى تۇرعىن ءۇي ماسەلەسىن تولىق شەشكەن قازاقستانداعى بىردەن-ءبىر ايماق، - دەدى ايماق باسشىسى.

سىر وڭىرىندە جىل سايىن قۇرىلىس جۇمىستارىنىڭ كولەمى ارتىپ كەلەدى. ايتالىق، سوڭعى 5 جىلىڭ ىشىندە باس شاھاردا 4 مىڭ پاتەرلىك 80 كوپقاباتتى ءۇيدىڭ قۇرىلىسى جۇرگىزىلگەن. الداعى ۋاقىتتا رەسپۋبليكالىق بيۋدجەت ەسەبىنەن 320 ورىندىق بالاباقشا مەن 600 ورىندىق مەكتەپ جانە مەملەكەتتىك-جەكەمەنشىك ارىپتەستىك اياسىندا 500 ورىندىق ەمحانا سالۋ جوسپارلانۋدا.

ەستەرىڭىزگە سالا كەتەيىك، قىزىلوردادا سىرداريا وزەنىنىڭ سول جاعالاۋىنداعى قۇرىلىس جۇمىستارى 2016 جىلى باستالعان بولاتىن. بىلتىر جاڭا قالادا جەكە ينۆەستورلار قاراجاتى ەسەبىنەن سالىنعان 14 كوپقاباتتى تۇرعىن ءۇي جانە "رۋحاني جاڭعىرۋ" ورتالىعى مەن 320 ورىندىق بالاباقشا پايدالانۋعا بەرىلدى. ال بيىل "بولاشاق" ۋنيۆەرسيتەتى كامپۋسى مەن جاستار ورتالىعىنىڭ قۇرىلىسى تامامدالدى.

جالپى، سوڭعى 6 جىلدا وبلىستا 3 ملن شارشى مەتر تۇرعىن ءۇي ەل يگىلىگىنە بەرىلدى. وبلىس ورتالىعىندا 2013-2018 جىلدارى 15 جاڭا شاعىن اۋدان سالىنعان.

Abai.kz