جۇما, 29 ناۋرىز 2024
46 - ءسوز 5283 7 پىكىر 3 ماۋسىم, 2019 ساعات 11:31

قاسىم-جومارت توقاەۆتىڭ نىق قادامى جانە سالماقتى ءسوزى

20 ناۋرىزدان بەرى پرەزيدەنت قاسىم-جومارت توقاەۆتىڭ ءار باسقان قادامى مەن اۋزىنان شىققان ءار ءسوزىن جۇرت باعىپ، باقىلاپ، باعالاپ وتىر.
مىنە، پرەزيدەنت سايلاۋىنىڭ ۇگىت-ءناسيحات كەزەڭىنىڭ سوڭعى مارەسىنە دە كەلىپ جەتتىك. ەندى سىرگەجيار ءسوزىمىزدى ايتىپ، ءوز ويىمىز بەن قولداۋىمىزدىڭ اقىرعى نۇكتەسىن قويساق دەگەن بەكىمگە كەلدىك.

كورىپ وتىرسىزدار، قاسىم-جومارت كەمەلۇلى پرەزيدەنت رەتىندە ەل اۋماعىن تۇگەلگە جۋىق ارالاپ شىقتى. ءبىر-ەكى مارتە شەتەلدەرگە دە ات باسىن بۇرىپ قايتتى. سونىڭ بارىندە دە ول ءوزىن كادىمگى ىسىلعان، قالىپتاسقان تۇلعا، ۇستامدى، بەدەلدى باسشى رەتىندە كورسەتە ءبىلدى.

ال، مەن پرەزيدەنتتىڭ ءتۇرلى دەڭگەيدەگى كەزدەسۋلەر مەن جينالىستاردا سويلەگەن ءار ءسوزىن التىنعا بالاپ، جادىما جازىپ كەلەم.
مىسالى، ەلباسى نۇرسۇلتان نازارباەۆتىڭ 1991 جىلى 31 جەلتوقساندا «قازاق راديوسىنىڭ» ەفيرىنەن ءوز اۋزىمەن ايتاقان «قىمباتتى وتانداستار! ەجەلگى اتامەكەنىنەن جىراقتاپ قالعان سىزدەردى كەشەگى كۇنگە دەيىن اتا-بابا جەرىنە قايتىپ كەلە الامىز با دەگەن سۇراقتىڭ الاڭداتىپ كەلگەنىن مەن جاقسى بىلەمىن. تۋعان جەردىڭ ءتۇتىنى دە ىستىق دەيدى حالقىمىز. قانداس باۋىرلارىمىزدى بايىرعى اتا قونىسىنا تارتۋ ماقساتىندا ادام پراۆوسى تۋرالى ەلارالىق ەرەجەلەردى باسشىلىققا الا وتىرىپ، قازاقستان ۇكىمەتى «باسقا رەسپۋبليكالاردان جانە شەتەلدەردەن سەلولىق جەرلەردە جۇمىس ىستەۋگە تىلەك ءبىلدىرۋشى بايىرعى ۇلت ادامدارىن قازاقستاندا قونىستاندىرۋ ءتارتىبى مەن شارتتارى تۋرالى» ارنايى قاۋلى قابىلدادى. سوندىقتان اتا-مەكەنگە كەلەمىن دەۋشى اعايىندارعا جول اشىق. اتا-بابا ارۋاعى الدارىڭىزدان جارىلقاسىن!» دەگەن ءسوزىن مەنىڭ تاعدىرلاس قانداستارىم قاسيەتتى تۇماردان ءبىر كەم كورمەي، جۇرەگىنىڭ تۇبىنە ساقتاپ كەلەدى.

ال، قاسىم-جومارت توقاەۆتىڭ مىنا ءسوزى سول ەلباسى ءسوزىنىڭ زاڭدى جالعاسى:
«شەتەلدەگى قانداستارىمىزدى ەلگە قايتارۋ ءىسى ەشقاشان نازاردان تىس قالعان ەمەس، كەلەشەكتە دە جالعاسا بەرەدى. دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز».

سونداي اق، پرەزيدەنتكە كانديدات قاسىم-جومارت كەمەلۇلىنىڭ ء"بىز جەمقورلىقتىڭ ءتۇپ-تامىرى جويىلعانشا كۇرەسەمىز. جەمقورلىق مەملەكەت پەن قوعامنىڭ ىرگەسىن سوگىپ، ۇلتتىق قاۋىپسىزدىككە ۇلكەن قاۋىپ توندىرەدى، مەملەكەتتىڭ دامۋىنا توسقاۋىل قويادى. مەملەكەت پەن ازاماتتاردىڭ كۇشىن بىرىكتىرەمىز. تەك قانا جازالاۋ شارالارى جەتكىلىكسىز. جەمقورلىقتىڭ كەز كەلگەن تۇرىنە مۇلدەم توزبەۋشىلىك تانىتۋ ماڭىزدى. قوعامدىق باقىلاۋدى كۇشەيتەمىز. باسقارۋدىڭ بارلىق دەڭگەيىندە قۇقىقتىق-نورماتيۆتىك اكتىلەردىڭ جەمقورلىققا قارسى ساراپتاماسىنا ۇكىمەتتىك ەمەس ۇيىمداردى تارتامىز. پارلامەنتتىڭ، قوعامدىق جانە ۇكىمەتتىك ەمەس ۇيىمداردىڭ، بۇقارالىق اقپارات قۇرالدارىنىڭ بەلسەندى قاتىسۋىمەن مەملەكەتتىك شەشىمدەردى قابىلداۋ ۇدەرىسىنىڭ اشىقتىعىن قامتاماسىز ەتەمىز" - دەگەنى جاي ءسوز ەمەس، ۋادە دەپ قابىلداعان ءجون.

ۋادە – قۇداي ءسوزى!
ەندى وعان ءبىز – ازاماتتار، ۇكىمەتتىك ەمەس ۇيىمدار، بۇقارالىق اقپارات قۇرالدارى تاس-ءتۇيىن دايىن بولۋىمىز كەرەك!
دايىنبىز!!

جۇرت قاسىم-جومارت توقاەۆتى ەسكى جۇيەنىڭ وكىلى، ەلباسىنىڭ ىقپالىنان شىعا المايدى دەگەن سىڭايداعى سوزدەردى دە ايتىپ جاتىر. قاسىم-جومارت كەمەلۇلى وعان دا جاۋاپ بەردى دەپ ويلايمىن.
«ءار ادام - ينديۆيديۋم. نۇرسۇلتان ءابىشۇلىنىڭ قايتالانباس ءستيلىن كوشىرىپ الۋ ويىمدا جوق» - دەدى ەكىنشى پرەزيدەنت!
دەمەك، قاسىم-جومارت توقاەۆ ءوزى ايتقانداي، ساباقتاستىقتى ساقتاي وتىرىپ، دەربەس، جاڭا قادامدار جاسايدى دەپ سەنەم مەن...

ءوز باسىم قاسىم-جومارت توقاەۆتى قولدايمىن!
سونداي-اق، قانداستارىمدى دا قاسىم-جومارت كەمەلۇلىنا داۋىس بەرۋگە شاقىرام!!!

اۋىت مۇقيبەك

Abai.kz

7 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1566
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2260
عيبىرات

قايسار رۋحتى عازيز جان

مۇحتار قۇل-مۇحاممەد 3541