اۋعان سوعىسىندا ءبىر جىل بويى توقتاۋسىز جاۋعا تويتارىس بەرىپ، اسكەرى ەڭ از شىعىندالعان كوماندير، «قازاقتىڭ قارا مايورى» كەرىمباەۆ بوريس توكەنۇلىنا ارناپ وفيتسەرلەر ءۇيى مۇراجايىنان بۇرىش اشىلدى.

اتالمىش ءىس-شارانىڭ اشىلۋىنا بوريس توكەنۇلىنىڭ اسىل جارى رايسا كەرىمباەۆا، سوعىستا بىرگە بولعان قارۋلاستارى، الماتى وڭىرلىك گارنيزونى اسكەري بولىمدەرىنىڭ جەكە قۇرامى جانە جوعارى وقۋ ورىندارى اسكەري كافەدرالارىنىڭ تاربيە جانە يدەولوگيالىق جۇمىستار جونىندەگى وفيتسەرلەرى مەن ستۋدەنتتەرى قاتىستى.

كورمەگە بوريس توكەنۇلىنىڭ كوزى تىرىسىندە قولدانعان زاتتارى، سوعىس كەزىندەگى ەستەلىك سۋرەتتەرى مەن اڭىز ادامعا ارنالىپ جازىلعان كىتاپتار جادىگەر رەتىندە قويىلدى.

بەيبىت كۇندەر مەن سۇم سوعىس جىلدارىندا باتىر تۇلعانىڭ جانىنان تابىلعان اسىل جارى رايسا كەرىمباەۆا ءىس-شارا قوناقتارىنا: «بولاشاقتا ەشقانداي سوعىس بولماسىن، ۇرپاعىمىز تىنىش زاماندا ءومىر ءسۇرسىن، اربىرىڭىزگە تەك قانا دەنساۋلىق تىلەيمىن»-, دەگەن اق تىلەگىن جەتكىزدى.

سونىمەن قاتار، شاكەن ايمانوۆ اتىنداعى قازاقفيلم كينوستۋدياسىنىڭ قولداۋىمەن «قازاقتىڭ قارا مايورىنىڭ» اسكەري ومىرىنە ارنالىپ تۇسىرىلگەن «ايرىقشا تاپسىرمالارعا ارنالعان ءومىر» اتتى ءفيلمى قوناقتار نازارىنا ۇسىنىلدى. كورسەتىلىمنىڭ باسىندا جانە سوڭىندا اۋعان سوعىسى ارداگەرلەرىنىڭ قاتارىنان قۇرىلعان انشىلەر توبى سوعىس كەزىندە ءاربىر مايدانگەردىڭ ۇرانىنا اينالعان اندەردى شىرقادى. قاپشاعاي قالاسىندا ايرىقشا تاپسىرمالار ءۇشىن جاساقتالعان 177-وتريادتىڭ اسكەرلەرى، بۇگىنگى اۋعان سوعىسىنىڭ ارداگەرلەرى بوريس توكەنۇلى كوزى تىرىسىندە قولى قويىلعان العىس حاتتارمەن جانە توسبەلگىلەرمەن ماراپاتتالدى. وسى وتريادتىڭ قۇرامىندا بولعان جاۋىنگەرلەر اتى اڭىزعا اينالعان كومانديرلەرىن اسكەري ءتاسىلدى ەرەكشە مەڭگەرگەن مىقتى قولباسشى جانە بەيبىت تىرلىك ءۇشىن قارسىلاستاردىڭ ورتاق كەلىسىمگە كەلۋىنە ىقپال ەتكەن باتىر تۇلعا رەتىندە ەسكە الدى.

«قازاقتىڭ قارا مايورى» بيىل كەڭەس اسكەرىنىڭ اۋعان جەرىنەن شىعارىلعانىنا 30 جىل تولۋى قارساڭىندا، 72 جاسقا قاراعان شاعىندا ومىردەن وزعان بولاتىن. اۋعان سوعىسىنىڭ ازابى، وت پەن سۋدى بىرگە كەشكەن باتىر اعاسى، ءوزى كورگەن سوعىستىڭ ۇلكەن سوعىستىڭ مەكتەبىنەن وتكەن، قان مايداننىڭ قاتال تەزىندە سىنالعان ارىس بوريس كەرىمباەۆ وسكەلەڭ ۇرپاقتى پاتيروتتىققا تاربيەلەۋدە قايتالانباس باتىر تۇلعا بولىپ قالارى ءسوزسىز.

قارلىعاش نۇرباي

Abai.kz