بۇگىن 1 ماۋسىم كۇنى پەدياتريا جانە بالالار حيرۋرگياسى عىلىمي ورتالىعىندا كلينيكادا ەم الىپ جاتقان بالالارعا ارنالعان «ارمانسىز كۇنىم بولمايدى» اتتى مەرەكەلىك شارا ءوتتى.

شارانىڭ ۇيىمداستىرۋشىلارى - «Help Today» قوعامدىق قورى مەن پەدياتريا جانە بالالار حيرۋرگياسى عىلىمي ورتالىعى.

شارانىڭ باستى ماقساتى – اۋىر دەرتكە شالدىققان بالالارعا مەرەكە، قۋانىش سىيلاۋ، اتى جامان اۋرۋدى جەڭۋگە دەگەن سەنىم ۇيالاتۋ، كوڭىلدەرىن كوتەرۋ ارقىلى ءبىر ساتكە اۋرۋىن ۇمىتتىرۋ،  پسيحولوگيالىق قولداۋ كورسەتۋ.

شارانىڭ اشىلۋىندا پەدياتريا جانە بالالار حيرۋرگياسى عىلىمي ورتالىعىنىڭ باسشىسى ريزا بورانباەۆا مەن «Help Today» قوعامدىق قورىنىڭ جەتەكشىسى ەلميرا اليەۆا بالالارعا جىلى تىلەكتەرىن ايتىپ، بارشا قاۋىمدى بالالار كۇنىمەن قۇتتىقتادى.

مەرەكەلىك كونتسەرتكە پارۆيز نازاروۆ، ايدانا مەدەنوۆا، «تاليسمان» توبى، «Tribal Pro» بي توبى، رايم مەن ارتۋر جانە ت.ب. ەسترادا جۇلدىزدارى قاتىسىپ، بالالارعا مەرەكەلىك كوڭىل-كۇي سىيلادى. ونەر جۇلدىزدارىمەن بىرگە ورتالىقتا ەم الىپ جاتقان بالالار مەن ولاردىڭ اتا-انالارى ونەر كورسەتتى. سونىمەن قاتار دارىگەرلەر دە قالىس قالماي، فلەش-موب ۇيىمداستىرىپ، ارنايى ءبيىن بالالارعا تارتۋ ەتتى. شارا بارىسىندا ورتالىقتا ەم العان،  اۋىر دەرتتى ءبىر ەمەس، ەكى رەت  جەڭگەن، ۇزاق جانە قيىن جولدان وتكەن الين ابدۋلام ءسوز سويلەپ، اۋرۋمەن قالاي كۇرەسكەندىگى جونىندە ايتىپ، بالالارعا جاقسىلىققا دەگەن سەنىم تىلەدى.

شارا اياسىندا بالالاردىڭ سۋرەت جانە قولونەر كورمەسى ءوتتى.  بالالار ءۇشىن  اكۆاگريم مەن فوتوسەسسيالار ۇيىمداستىرىلدى. «We Art» ۇيىمىنىڭ ەرىكتىلەرى مەن انيماتورلارى بۇلدىرشىندەردىڭ كوڭىلىن كوتەرىپ، بالالارمەن بىرلەسە ءتۇرلى ويىندار وينادى.

مەرەكە سوڭىندا شاراعا قاتىسقان بالالار مەن سۋرەت بايقاۋىنىڭ جەڭىمپازدارى «Help Today» قوعامدىق قورىنىڭ سىيلىقتارىمەن جانە ارنايى ديپومدارىمەن  ماراپاتتالدى.

ايتۋلى مەرەكەمەن سونىمەن قاتار «باۋىرجان» قايىرىمدىلىق قورى قۇتتىقتاپ، كارديولوگيا، ونكولوگيا جانە گەماتولوگيا  بولىمىندە جاتقان بارشا بالاعا ءتۇرلى سىيلىقتار ۇلەستىرىپ، ناۋقاس بالالاردىڭ جۇزدەرىنە قۋانىش سىيلادى.

Abai.kz