بيىل قىزىلوردا وبلىسى بويىنشا 1-10 سىنىپ ارالىعىنداعى 147750 بالانىڭ 144795-ءى جازعى تىنىعۋ لاگەرلەرىندە دەم الاتىن بولادى. 1 ماۋسىمنان باستاپ ايماقتاعى ساۋىقتىرۋ لاگەرلەرى ءوز جۇمىسىن باستايدى،- دەپ حابارلايدى اباي-اقپارات.

قىزىلوردالىق ورەندەردىڭ دەمالىسىن قىزىقتى وتكىزۋ ماقساتىندا وبلىستا ءتۇرلى شارالار قولعا الىنۋدا. ماسەلەن، «رۋحاني جاڭعىرۋ» باعدارلاماسى شەڭبەرىندە مەكتەپ ءتۋريزىمىن جانداندىرۋ بويىنشا 20 مىڭ وقۋشى ايماقتاعى كيەلى تاريحي-مادەني ورىندارعا ساياحات جاسايدى.

– وبلىستاعى 9 ساۋىقتىرۋ ورتالىعى مەن دەمالىس لاگەرىندە (6-ۋى جىل بويى، 3-ەۋى ماۋسىمدىق) 10 مىڭعا جۋىق بالا دەمالىسپەن قامتىلادى. ال جالپى ءبىلىم بەرۋ مەكتەپتەرىنىڭ بازاسىنداعى كۇندىزگى جانە شاتىرلى لاگەرلەردە 96 مىڭ بالا تىنىعاتىن بولادى، - دەدى وبلىستىق ءبىلىم باسقارماسىنىڭ باسشىسى مايرا مەدەلبەكوۆا.

بيىل 2018-2019 وقۋ جىلىندا وبلىستاعى 261 مەكتەپتەن 5754 وقۋشى 11 سىنىپتى تامامدايدى. ونىڭ 4143-ءى (72 پايىز) ماۋسىم ايىندا وتەتىن ۇلتتىق بىرىڭعاي تەستىلەۋگە قاتىسپاق. تۇلەكتەردىڭ 400-ءى «التىن بەلگىگە»، 285-ءى «ۇزدىك اتتەستاتقا» ۇمىتكەر. سونداي-اق، ءبىتىرۋشى تۇلەكتەر جىل بويى جۇمىس ىستەيتىن «قامباش»، «تالدىسۋ» لاگەرلەرىندە دايىندىق كۋرستارىنان وتكەن.

– مەكتەپ ءبىتىرۋشى تۇلەكتەردىڭ 4662-ءسى ۋنيۆەرسيتەتتەرگە، 1 مىڭى كوللەدجدەرگە تۇسەدى دەپ جوسپارلانۋدا،- دەدى وبلىستىق ءبىلىم باسقارماسىنىڭ باسشىسى.

ايتا كەتەيىك، ماۋسىم ايىندا وتكىزىلەتىن ۇبت-نى ۇيىمداستىرۋعا جەرگىلىكتى بيۋدجەتتەن 17,5 ملن تەڭگە بولىنگەن.

Abai.kz