قازاقستاندا مۇقتاج جانداردىڭ 25 مىڭ يپوتەكالىق قارىزى بويىنشا مەملەكەتتىك كومەك كورسەتىلدى، دەپ حابارلايدى قازاقپارات ءتىلشىسى.

بۇل تۋرالى اقپارات جانە قوعامدىق دامۋ ءمينيسترى داۋرەن اباەۆ «حابار» ارناسىنداعى «اشىق ديالوگ» باعدارلاماسىندا ايتتى.

«ومىردە ءتۇرلى جاعدايدار بولادى جانە مەملەكەت كەيبىر ازاماتتار ساناتىندا يپوتەكالىق قارىزدى وتەۋگە كومەكتەسۋى قاجەت. بۇگىندە قازاقستاندا مەملەكەتتىك قاراجات ەسەبىنەن 25 مىڭ يپوتەكالىق نەسيە بويىنشا تولەماقى بەرۋ قاراستىرىلعان»، - دەدى مينيستر.

ولاردىڭ جالپى كولەمى شامامەن 140 ملرد تەڭگەنى قۇراعان جانە ونىڭ 48 ملرد تەڭگەسىن مەملەكەت وتەگەن.

«مەنىڭ ويىمشا بۇل مۇقتاج جاندار ءۇشىن وتە ۇلكەن قولداۋ. نەسيەنى تولىق سىزىپ تاستاۋ - تەرىس تاجىريبە. كوپشىلىگى بۇل قارىزدى وتەۋ مەملەكەتتىك اپپاراتتىڭ موينىندا دەپ ەسەپتەيدى. شىن مانىندە بۇل سالىق تولەۋشىلەرگە جۇك بولادى. يپوتەكالىق قارىزدى وتەۋدى تالاپ ەتىپ، ەرەۋىلگە شىعاتىندار اراسىندا ءوز ەسەبىن تۇگەندەپ العىسى كەلەتىن پىسىقايلار دا تابىلادى. ماسەلەن، بىرەۋلەر قالا شەتىندەگى ءبىر بولمەلى پاتەر قارىزىن تولەي الماي قينالسا، كەي ادامدار الماتىنىڭ قىمبات اۋدانىنداعى كوتتەدج نەمەسە ءتورت بولمەلى پاتەرىنىڭ قارىزىن جاۋىپ العىسى كەلەدى. جىلدار بويى تىرنەكتەپ جارنا جيناپ، ماڭداي تەرىمەن بانك الدىنداعى قارىزىن وتەيتىن ازاماتتار دا بار»، - دەپ ءوز ءسوزىن تۇيىندەدى د. اباەۆ.

Abai.kz