بۇگىن ۇكىمەت وتىرىسىندا قىزىلوردا وبلىسىنىڭ اكىمى قىرىمبەك كوشەرباەۆ وبلىستىڭ 2022 جىلعا دەيىنگى كەشەندى دامۋ جوسپارىن تانىستىردى. وتىرىستىڭ قورىتىندىسىمەن قۇجات بەكىتىلدى.

ءوڭىردى دامىتۋدىڭ كەشەندى جوسپارى 12 باعىت، 119 ءىس-شارادان تۇرادى.  ولار - ونەركاسىپ، اگروونەركاسىپتىك كەشەن، كاسىپكەرلىكتى دامىتۋ، كولىك ينفراقۇرىلىمى، تۇرعىن ءۇي كوممۋنالدىق شارۋاشىلىعى، ەكولوگيا جانە تابيعاتتى پايدالانۋ، حالىقتى الەۋمەتتىك قورعاۋ، دەنساۋلىق ساقتاۋ، سپورت، سۋ تاسقىنىنا قارسى ءىس-شارالار، تۇرعىن ءۇي قۇرىلىسى جانە ينجەنەرلىك-كوممۋنيكاتسيالىق ينفراقۇرىلىمدى دامىتۋ.

ايماق باسشىسى اعىمداعى جىلدىڭ اقپان ايىندا قازاقستان رەسپۋبليكاسى قاۋىپسىزدىك كەڭەسىنىڭ وتىرىسىندا ءوڭىر تۇرعىندارىنىڭ الەۋمەتتىك-ەكونوميكالىق جاعدايىن جاقسارتۋ جانە دامۋ قارقىنىن ارتتىرۋ ماقساتىندا وبلىستىڭ وزەكتى ماسەلەلەرى قارالعانىن اتاپ ءوتتى.

"قاۋىپسىزدىك كەڭەسىنىڭ وتىرىسىندا كەڭەس توراعاسى-ەلباسى ن.ءا.نازارباەۆ 2022 جىلعا دەيىن وبلىستى دامىتۋدىڭ كەشەندى جوسپارىن ازىرلەۋدى تاپسىرعان ەدى. جوسپار قۇنى - 219,7 ملرد.تەڭگە. ونىڭ ىشىندە رەسپۋبليكالىق بيۋدجەتتەن 156,7 ملرد. تەڭگە، جەرگىلىكتى بيۋدجەتتەن 50,6 ملرد. تەڭگە جانە باسقا كوزدەردەن 12,4 ملرد. تەڭگە بولاتىن 119 ءىس - شارانى ىسكە اسىرۋدى قامتيدى", - دەدى ايماق باسشىسى.

قر پرەمەر - ءمينيسترى اسقار مامين "كەشەندى جوسپاردى ىسكە اسىرۋ ءوڭىردىڭ دامۋىنا وڭ سەرپىن بەرەتىنىن" اتاپ ءوتتى.

ايتا كەتەيىك، ءوڭىردىڭ دامۋ جوسپارى 2019 جىلعى 21 مامىرداعى رەسپۋبليكالىق بيۋدجەت كوميسسياسىنىڭ وتىرىسىندا ماقۇلداندى.

Abai.kz