جۇما, 29 ناۋرىز 2024
ساياسات 9883 41 پىكىر 16 مامىر, 2019 ساعات 11:03

بۇل سايلاۋ حالىقتىڭ الىپ كۇش ەكەنىن كورسەتۋى كەرەك

جىگىتتەر، ەگەر سىزدەر حالىقتىڭ جاناشىرىمىز، ماقساتىمىز ەلىمىزدە شىن وزگەرىستەر الىپ بيلىك حالىقتىڭ پىكىرىمەن ساناساتىن  بولسىن دەسەڭدەر كوزدەرىڭدى اشىپ، كوكىرەكتەرىڭدى وياتىڭدار. ءوز ارا كورەالماۋشىلىقتان، باقتالاستىقتان، اتاققۇمارلىقتان، وكپە – نازدان ءبىر ساتكە ايىعىپ، بيلىككە حالىقتىڭ بىرلىگى الىپ كۇش ەكەنىن كورسەتۋ ءۇشىن بارلىعىمىز ءبىر قاتاردا تۇرىپ الداعى سايلاۋعا قاتىسۋمىز قاجەت ەكەنىن ۇعايىق.  

ال، ءبىز سايلاۋعا بارمايمىز قارسىمىز دەپ كۇرەستەن باس تارتۋ – ساياسي ساۋاتسىزدىق. بۇل حالىقتىڭ ءالجۋاز السىزدىگىن، ازاماتتاردىڭ ءسوزى كوپ ءىسى جوق جىگەرسىز ەكەنىن، ءوز اتاعىن عانا ويلايتىنىن، ەل ىشىندە بەلسەندى جۇمىس ىستەي المايتىنىن عانا كورسەتەدى. ويتكەنى جۇرت، وسى ۇلكەن قاتە ۇرانعا الدانىپ سايلاۋشىلاردىڭ قىرىق پايىزى سايلاۋعا بارماي قالسا، داۋىستىڭ ۇرلانۋى بولۋى ابدەن مۇمكىن. وسىنى ۇعۋ قاجەت.

بۇل جول – ناعىز حالىققا قارسى ىستەلەتىن "پروۆوكاتورلاردىڭ" جولى. ءبىز، اقىلمەنەن ۇيىسا جۇمىلىپ، حالىقتى بەلسەندىلىكپەن سايلاۋعا  بارىپ وزدەرىنىڭ كوزقاراستارىن سايلاۋدا اشىق، ايقىن كورسەتۋىنە ىقپال جاساساق قانا بيلىككە حالىقتىڭ ءوز ەلىنىڭ يەسى جانە الىپ كۇش ەكەنىن كورسەتە الامىز. سوندا عانا جالپى حالىقتىڭ جەڭىسكە جەتۋىنە بولادى. ءبىز بىردەن جەڭىسكە جەتپەسەك تە، بيلىك حالىقپەن ساناساتىن داۋىس جيناۋىمىز قاجەت.

قوعامدا قالىپتاسىپ قالعان ۇرەيدەن قۇتىلايىق، جىگەرلى قيمىلدايىق! ءبىز سايلاۋدىڭ شەشۋشى كەزەڭى داۋىس بەرۋ ۇدەرىسىنە  قاتتى باقىلاۋ جاساۋدى ۇيىمداستىرا بىلسەك، بيلىككە حالىقتىڭ كوزقاراسىن جەتكىزەتىن ۇمىتكەردى ءبىر اۋىزدان قولداي بىلسەك، سوندا عانا جەڭىس بولادى. سوندا عانا سەڭ قوزعالادى. بارلىق جەردەگى سايلاۋ وتكىزەتىن جەردە بەلسەندى باقىلاۋشىلاردى  ۇيىمداستىرۋمەن قاتار، قازىرگى  دامىعان تەحنيكا جەتىستىكتەرىن سايلاۋدى باقىلاۋ جۇمىسىنا پايدالانايىق.

ءار سايلاۋشى جەكە كابيناعا كىرگەندە ءوزى بەلگى قويعان ۇمىتكەردى كورسەتەتىن بيۋلەتەندى قالتا تەلەفونىنا سۋرەتكە ءتۇسىرىپ الىپ وتىرۋى قاجەت. بۇل ارەكەت ازاماتتاردىڭ داۋىسىن ۇرلاتپاۋ ءۇشىن قاجەت. ولاي ىستەۋگە بولمايدى دەگەن زاڭ جوق. ال، ەندى باس - باسىمىزعا كوسەم سايلاپ ءبولىنىپ، ءبىرىمىز – ويعا، ءبىرىمىز – قىرعا تارتساق، ول حالىقتىڭ الدىنداعى وپاسىزدىعىمىز بولادى. وسىنى ۇعايىق. اتاق - ماداق ءۇشىن ءوزىمىزدى عانا "كەرەمەت" دەپ، ال، وزىمىزدەن باسقالاردى "اناۋ ساتقىن، مىناۋ جامان" دەپ ۇمىتكەرلەردى وسەكتەگەنشە، ەرتەڭ حالىق الدىندا ماسقارا بولمايتىن جايدى ويلانايىق.

كىمنىڭ كىم ەكەنىن ەرتەڭ حالىق ءوزى باعالايدى. ۇلتىمىزدىڭ كەلەشەگىن، نامىسىن قورعايمىن دەگەن ازامات جان – جاقتان ايتىلاتىن ۇران مەن وسەككە ءمان بەرمەي ءوزىنىڭ ار ۇياتىنا جۇگىنۋى قاجەت. سوندىقتان اقىلعا سالىپ كىم حالىقتىڭ مۇددەسىن قورعاي الادى سونى قولدايىق، ۇلت مۇددەسى توپتاردىڭ مۇددەسىن قورعايتىن پارتيالاردىڭ ۇگىت – ناسيحاتىنان جوعارى تۇرادى وسىنى ۇمىتپايىق. ال، شەتتە جۇرگەن «كوسەمدەر» مەن كەيبىر ۇمىتكەرلەر سايلاۋداعى حالىقتىڭ داۋىسىن بولشەكتەۋمەن ۇپاي جيناپ حالىقتىڭ مۇددەسىنە زيان اكەلۋگە باعىتتالعانى ايان، سونى ۇعايىق.

بارلىقتارىڭ ساۋاتتىسىڭدار، قاراساڭدارشى ۋكرايندىقتاردىڭ تاجىريبەسىنە قازىرگى كەزەڭدە ەڭ قاجەتتى ماسەلە – حالىقتىڭ الىپ كۇش ەكەنىن كورسەتۋ. بۇنداي جاعداي كەيىن تۋماۋى مۇمكىن، پايدالانۋ قاجەت. وسى مۇمكىنشىلىكتى جىبەرىپ المايىق. بۇل كەلەشەك ءۇشىن كەرەك قادام.

ويلانىڭدار،  اعايىندار!

بولات دۇيسەمبى

Abai.kz

 

41 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1569
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2264
عيبىرات

قايسار رۋحتى عازيز جان

مۇحتار قۇل-مۇحاممەد 3558