جۇما, 29 ناۋرىز 2024
«سوقىر» فەميدا 7335 8 پىكىر 6 مامىر, 2019 ساعات 01:45

ارحيمەد ەرماك سياقتى رەزيدەنتسياسىنان باس تارتا الا ما؟

جاقىندا سەمەي قالاسىنىڭ اكىمى ەرماك ءسالىموۆ ءوزىنىڭ شاھاردىڭ ەڭ كورىكتى جەرى - قاراعايلى ورماندا ورنالاسقان اۋماعى ات شاپتىرىمداي رەزيدەنتسياسىنان ءوز ەركىمەن باس تارتاتىنى جايلى حابارلاپ، ءباسپاسوزدى ءبىر شۋلاتىپ تاستادى. ەرماكتىڭ بۇل «ەرلىگى» بۇكىل ەلدى ەلەڭ ەتكىزگەنى ءسوزسىز. شىندىعىندا دا قاي اكىم ءوز قالاۋىمەن جانعا جايلى ورىننان ىعىسىپ ەدى.

- مەن ول جەردەن ءوز ەركىممەن كوشىپ كەتتىم، - دەدى ول. - قازىر قالادا تۇرامىن. بۇل ورىنعا كوپ اقشا جۇمسالادى. ونداي شىعىننىڭ قاجەتى قانشا؟ بۇدان دا ونى باي كاسىپكەرلەرگە ساتۋدى ۇيعاردىق.

ەرماك بيداحمەتۇلى مۇنىمەن عانا تىنباعان كورىنەدى. رەزيدەنتسيا جاي عانا ساتىلىپ قويمايدى، ونى العاندارعا قويىلاتىن تالاپ تا قاتتى. ول مىندەتتى تۇردە بالالار دەمالاتىن ورىنعا اينالۋى كەرەك. مۇنىڭ ۇستىنە ونىڭ بولاشاق يەسى جىلىنا ءبىر رەت الەۋمەتتىك از قامتىلعان وتباسىنىڭ بالالارىن تەگىن تاماقتاندىرىپ، دەمالدىرۋعا مىندەتتى. قىسقاسى، مۇنداي كەرەمەت مەكەنجايدى يەلەنگەندەر كەدەي-كەپشىكتىڭ بالالارىن قامقورلىققا الا ءجۇرۋى قاتاڭ قاداعالانادى. دەمەك، قازىر قۇنى 158 ميلليون تەڭگەگە باعالانعان بۇل رەزيدەنتسيانىڭ راحاتىن قاراپايىم حالىق تا كورەتىن بولادى.

وسىندايدا ءبىزدىڭ ءبىر ساۋال مازالاپ وتىر. ەرماكتىڭ وسى باستاماسىن وزگە اكىمدەر ءىلىپ اكەتە الا ما؟ الدە مۇنداي جاڭالىقتارعا جاتىرقاي قاراپ، بىلمەگەنسىپ، بايقاماعانسىپ جۇرە بەرەر مە ەكەن؟

وزگە وڭىرلەردى بىلمەيمىن، ال ءبىزدىڭ وبلىستا مۇنداي رەزيدەنتسيانىڭ «كوكەسى» بار. جالپى كولەمى اناۋ-مىناۋ ەمەس، اۋماعى 21 گەكتار قۇرايتىن، ىشىندە تەننيستىك كورت، مونشا مەن باسسەيىنىن قوسقاندا باقانداي 13 وبەكتى بار مۇنداي كەلىستى مەكەنجايدا وبلىسىمىزدىڭ اكىمى ارحيمەد مۇقانبەتوۆتىڭ جالعىز ءوزى تۇرىپ جاتىر. ال ەندى ءبىزدىڭ سىپايى عانا ايتقان سىنىمىزعا «ويباي، بۇل اۆتور تىرناق استىنان كىر ىزدەپ جاتىر، ىلعي دا اكىمىمىزگە پالە جاۋىپ جۇرەدى، ءسويتىپ ادامدار اراسىنا ىرىتكى سالادى» دەپ، ىلعي دا ەشبىر دالەلسىز ورە تۇرەگەلەتىندەردىڭ نازارلارىنا مىنا ءبىر جايدى سالا كەتەيىن. بۇل ماسلەنى كوتەرگەن تەك ءبىزدىڭ پورتال عانا ەمەس. ونى بىزبەن قاتار «ناشا گازەتى» باسىلىمى، Bestnews.kz اقپاراتتىق اگەنتتىگى كەڭىنەن جازىپ كورسەتتى. ونى از دەسەڭىز YouTube-ءتى اشىپ قاراساڭىز «كاك جيۆەت اكيم كوستانايسكوي وبلاستي ارحيمەد مۋحامبەتوۆ» دەگەن  بەينەتاسپانى كورىپ، ماسەلەنىڭ انىق-قانىعىنا قانىعاسىز.

ءبىز بۇل جەردە ۇلكەن ءبىر وبلىستى باسقاراتىن اكىم جايلى دا جاقسى ورىندا تۇرماسىن دەگەن ويدان اۋلاقپىز. ونىسى زاڭعا تومپاق كەلەدى دەۋگە دە قۇقىمىز جوق. تۇرسىن، دەمالسىن، تىنىقسىن، سەرگىسىن. بىزدىكى تەك حالىقتىڭ اراسىندا كەڭىنەن قولداۋ تاپقان ەرماك ءسالىموۆ سەكىلدى اكىمنىڭ ارتىق شىعىنداردان ارىلىپ، قاراپايىم جۇرتقا جاقىنىرىق تۇرۋدى كوزدەگەن باستاماسىن ارحيمەد قولداي الا ما دەگەن ساۋال عانا. ونىڭ ۇستىنە قازىرگى تاڭدا مەملەكەتتىك قىزمەت ىستەرى جونىندەگى اگەنتتىكتىڭ مەملەكەتتىك ورگاندارداردىڭ تىم داليىپ كەتكەن ورىنداردى يەلەنىپ جۇرگەنىن، ال قازىرگى تاڭدا بۇلاردى بوساتۋ مەن وڭتايلاندىرۋ تۋرالى ناقتى ماسەلە قويىپ وتىرعانىن ەسكەرسەك، بۇل ايتقاندارىمىز نەگىزسىز ەمەس شىعار دەپ ويلايمىز.

جايبەرگەن بولاتوۆ

Abai.kz

 

8 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1583
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2283
عيبىرات

قايسار رۋحتى عازيز جان

مۇحتار قۇل-مۇحاممەد 3618