جۇما, 29 مامىر 2020
COVID-19 قازاقستاندا. جۇقتىرعاندار — 9932. جازىلعاندار — 5057. قايتىس بولعاندار — 37
46 - ءسوز 1845 3 پىكىر 4 ءساۋىر, 2019 ساعات 10:39

نۇر-سۇلتانعا تاعى دا جاڭا تەاتر سالۋ قاجەتتىگى تۋىپتى

استانا جۇرتشىلىعى اراسىندا «قاقپا» اتالىپ كەتكەن تريۋمفالدى اركانى جوندەۋگە قالا بيۋدجەتىنەن 600 ميلليون تەڭگە بولىنەدى دەگەن حابار تارادى.
ەل تاۋەلسىزدىگىنىڭ 20 جىلدىعى قۇرمەتىنە 2011 جىلى 16 جەلتوقساندا اشىلعان «ماڭگىلىك ەل» قالا قاقپاسى سەگىز جىلدا 600 ميلليونعا توزىپ قالدى ما؟ ەلدەگى قارجى-ەكونوميكالىق داعدارىس جاعدايىندا ونى وسىنشا قارجىعا جوندەۋ قانشالىقتى قاجەت؟

قالا اكىمىنىڭ ورىنباسارى نۇركەنوۆ مىرزانىڭ ايتۋىنا قاراعاندا، راسىندا دا، «ماڭگىلىك ەلدىڭ» قاقپاسى ماڭگىلىك بولماي قالعان سىڭايلى. «تريۋمفالدى اركانىڭ جاعدايى كۇردەلى، – دەپتى ول ەندىگى «نۇر-سۇلتان» اتانعان قالانىڭ ءماسليحاتىندا. – ونىڭ جەراستى وتپەلى جولى ساپاسىز سالىنعان، جىل سايىنعى اعىمدىق جوندەۋدەن كەمشىلىكتەر تۇزەتىلەر ءتۇرى جوق».
ال انىعىندا، ۇزىندىعى 40–50 مەتردەن اسپايتىن وتكەل جولدى سىلتاۋ ەتىپ، جەر استىنا 600 ملن تەڭگەنى كومۋدىڭ ماقساتى تىپتەن باسقادا سياقتى. بىرىنشىدەن، بۇل قاقپا ميلليونداردى قىلعىتىپ بىتكەن كەزدە «نۇروتاندىق» ءبىر جاندايشاپ اتىپ تۇرىپ: «ماڭگىلىك ەلدى جاساعان – نۇرسۇلتان نازارباەۆ، سوندىقتان اركاعا اتىن بەرەيىك» دەۋى ابدەن مۇمكىن. قيتۇرقىسى قويۋ قازاقستاندا ءبارى مۇمكىن!

ەكىنشىدەن، بۇل قاقپا مەن ءبىر مەزەتتە 30 000 مىڭ جاماعات «جىعىلۋعا» جارايتىن مەشىت سالۋدىڭ ماشاقاتى بىرەگەي قامنىڭ قاجەتىنەن تۋعان بولۋى كەرەك. ول قام – نازارباەۆقا دارىگەرلەر بەلگىلەپ بەرگەن «ەكى جىلدىق مەرزىمنىڭ» مەزەتىمەن تۇسپا-تۇس كەلسە كەرەك. ايتپەگەندە، كوپ بالالى انالاردى اقشالى مەن اقشاسىزعا ءبولىپ، بىرەۋى ون بالا تاپسا دا، تۇكسىز قالعان، ەكىنشىسى – ءتورت بالامەن جاردەماقى الا الاتىنداي الالاۋ ايلاسى جاسالعان جاعدايدا سول 600 ميلليوندى «كومىپ تاستاۋدىڭ» باسقا دا جولدارى تابىلار ەدى.

ەندى بۇل اركاعا اقشا شاشۋ از بولعانداي، نۇر-سۇلتانعا تاعى دا جاڭا تەاتر سالۋ قاجەتتىگى تۋىپتى. «تاعى دا» دەيتىنىمىز – بۇدان 2-3 جىل بۇرىن سىيىمدىلىعى 1200 ورىندىق وپەرا تەاترى سالىنعانى ءالى ەستە. بۇل جولعى سالىنباعى – دراما تەاترى ەكەن. ونىڭ دا سالىنىپ ءبىتۋ مەرزىمى سول «بەلگىلەنگەن ەكى جىلمەن» مەجەلەنىپتى.

ايتپاقشى، «سامۇرىق-قازىنا» قورى (حالىقتىڭ اقشاسى دەي بەرىڭىز) سالۋى ءتيىس تەاترعا توگىلەتىن قارجىنىڭ قيسابى ازىرگە بەلگىسىز كورىنەدى. بەلگىلىسى – بۇل تەاتر ورنالاساتىن 6 گەكتار القاپتاعى 47 جەر تەلىمى «مەملەكەتتىك قاجەتتىلىككە» الىنادى. تەگىن ەمەس، ساتىلىپ الىنادى. ال ول «قاجەتتىلىك ءۇشىن» احمەت بايتۇرسىنۇلى مەن جۇمەكەن ناجىمەدەنوۆ كوشەلەرىنىڭ ارالىعىنداعى التى گەكتار جەردەگى ۇيلەر مەملەكەت قارجىسىنا (تاعى دا حالىقتىكى دەي بەرىڭىز) ساتىپ الىناتىن بولسا، بۇل تەاتردىڭ دراماسى دارداي بولايىن دەپ تۇر.

نەسىن ايتاسىز، بەلگىلى كاريكاتۋراشى مۇرات ءدىلمانوۆ ءوزىنىڭ «فەيسبۋكتاعى» پاراقشاسىنا سۋرەتىن سالىپ، اتاۋىن «كاكوي تريۋمف – تاكايا اركا» دەپ جازعانداي (سۋرەتتى قاراڭىز), تاعى ءبىر «تريۋمفتىڭ» تۋى كوتەرىلدى: كەشە ەلدەگى اقپارات اگەنتتىكتەرى قازاقستاننىڭ تۇڭعىش پەرزيدەنتىنىڭ كەڭسەسىن قۇرۋعا ەل بيۋدجەتىنەن 1 ميلليارد تەڭگە بولىنەتىنىن حابارلادى. ال استانانىڭ اتاۋى مەن جالاقىنى كوتەرۋگە قازىنانىڭ ەسەبىنەن جۇمسالاتىن 37,8 ميلليارد تەڭگەنىڭ قانشاسىن نۇر-سۇلتان جۇتارىن ءبىر قۇدايدىڭ ءوزى ءبىلسىن.

قىسقاسى، الداعى ەكى جىلدا «تريۋمفتاردىڭ» تالايىن كورەتىن ءتۇرىمىز بار. تەك ەل-جۇرت امان بولسىن، اعايىن!

ەرمۇرات باپيدىڭ facebook پاراقشاسىنان

Abai.kz

3 پىكىر