اۋىل شارۋاشىلىعى ءمينيسترى ساپارحان وماروۆپەن كەزدەسۋ بارىسىندا مەملەكەت باسشىسىنا مينيسترلىك جۇمىستارىنىڭ ناتيجەلەرى مەن الداعى جوسپارلارى جونىندە باياندالدى.

قازاقستان پرەزيدەنتى اگروونەركاسىپ كەشەنىندەگى ونىمدىلىكتى جانە قايتا وڭدەلگەن ءونىمنىڭ ەكسپورتقا شىعارىلۋىن ارتتىرۋ ءۇشىن مينيسترلىكتىڭ الدىنا قويىلعان مىندەتتەردى ساپالى جۇزەگە اسىرۋدىڭ ماڭىزدى ەكەنىنە نازار اۋداردى.

قاسىم-جومارت توقاەۆ 2022 جىلعا دەيىن تەحنيكالاردىڭ جاڭارتىلۋ قارقىنىن 2-دەن 6%-عا جانە سۋارمالى ەگىنشىلىك جەرلەرىن 1,4 ميلليوننان 2 ميلليون گەكتارعا ارتتىرۋ، سونداي-اق، اۋىل شارۋاشىلىعى جوعارى تەحنولوگيالىق جۇيەسىنىڭ كەشەنىن پايدالانۋ، ەگىستىك القاپتارىن ءارتاراپتاندىرۋ، تۇقىم ساپاسىن جاقسارتۋ، تىڭايتقىشتاردى جانە وسىمدىكتەردى قورعاۋ قۇرالدارىن قولدانۋ قاجەتتىگىن ايتتى.

سونىمەن قاتار، مەملەكەت باسشىسى ءىرى قارا مالدىڭ تۇقىمىن زەرتتەۋ جانە قايتا اسىلداندىرۋ ءۇشىن زاماناۋي تەحنولوگيانى ەنگىزۋ، وتباسىلىق مال شارۋاشىلىعىن قۇرۋ جانە پايدالانىلاتىن جايىلىمداردىڭ كولەمىن ۇلعايتۋ جونىندەگى جۇمىستاردى جالعاستىرۋدى تاپسىردى.

نۇر-سۇلتان قالاسىنىڭ اكىمى باقىت سۇلتانوۆپەن كەزدەسۋدە مەملەكەت باسشىسىنا 2018 جىلدىڭ قورىتىندىسى بويىنشا قالانىڭ نەگىزگى الەۋمەتتىك-ەكونوميكالىق كورسەتكىشتەرى تۋرالى باياندالدى.

سونىمەن قاتار، قاسىم-جومارت توقاەۆ بارلىق قاجەتتى ينجەنەرلىك-كولىكتىك ينفراقۇرىلىمدى ىسكە قوسۋدى كوزدەيتىن جانە 2019-2023 جىلدارعا ارنالعان ەلوردانىڭ شاعىن قۇرىلىسى جونىندەگى كەشەندى جوسپارمەن تانىستى.

بۇدان بولەك، قاسىم-جومارت توقاەۆ جەڭىلدىگى بار ازاماتتارعا الەۋمەتتىك قولداۋ كورسەتۋ ءۇشىن قابىلداناتىن شارالار تۋرالى، سونداي-اق جاعدايى تومەن جانە كوپبالالى وتباسىلاردى باسپانامەن قامتاماسىز ەتۋ جونىندەگى ەسەپتى تىڭدادى.

سوڭىندا مەملەكەت باسشىسى ەلوردانى ودان ءارى دامىتۋعا، سونىڭ ىشىندە قالا كوشەلەرىن، ساياباقتار مەن گۇلزارلاردى لايىقتى اباتتاندىرۋعا، تازالىق پەن ءتارتىپتى ساقتاۋ ءۇشىن قالا مادەنيەتىن قالىپتاستىرۋعا قاتىستى بىرقاتار ناقتى تاپسىرما بەردى.

ادام قۇقىقتارى جونىندەگى ۋاكىل اسقار شاكىروۆتى قابىلداۋ بارىسىندا قازاقستان پرەزيدەنتىنە ادام قۇقىقتارى جونىندەگى ۋاكىلدىڭ جۇمىسى تۋرالى ەسەبى، سونداي-اق، ەلىمىزدەگى ادام قۇقىقتارىنىڭ ساقتالۋى جونىندە مالىمەت بەرىلدى.

قاسىم-جومارت توقاەۆ الەۋمەتتىك جاعدايى تومەن تۇرعىنداردىڭ، سونىڭ ىشىندە كەدەي وتباسىلار مەن كوپ بالالى انالاردىڭ نەگىزگى قۇقىقتارى مەن مۇددەلەرىن قامتاماسىز ەتۋ، سونداي-اق سوتتالعاندارعا قاتىگەزدىك كورسەتۋ فاكتىلەرىنە جول بەرمەۋ ءۇشىن مۇددەلى مەملەكەتتىك ورگاندارمەن بىرلەسە جۇمىس ىستەۋ قاجەتتىگىن ايتتى.

سوڭىندا قازاقستان پرەزيدەنتى بىرقاتار ناقتى تاپسىرما بەرىپ، قۇقىق قورعاۋ ماسەلەسىن ءجىتى نازاردا ۇستايتىنىن ايتتى.

Abai.kz