“ۇلتتىق قۇرامامىز بالكىم وسى جولى ءساتتى ونەر كورسەتەر” - دەگەن تاعى ءبىر ءۇمىت وتى تۇتانعان ءسات. 2020 جىلى وتەتىن ەروپا چەمپيوناتىنىڭ ىركتەۋ كەزەڭى باستالدى. بەلگيا، رەسەي، شوتلانديا، كيپر، سان-مارينو قۇرامالارىنىڭ اراسىنان كەم دەگەندە ەكىنشى ورىندى يەلەنۋ ءبىزدىڭ جىگىتتەردىڭ قولىنان كەلە مە؟ ءار جولى ۇلتتىق قۇرامامىز ءىرى ءتۋرنيردىڭ ىرىكتەۋىنە قاتىسقاندا ۇيدە وتىرىپ تاقىمىمىزدى قىسامىز، وكىنىشتىسى، ءۇمىتىمىز ءالى اقتالماي كەلەدى. بالكىم وسى جولى جولىمىز بولار...

بۇگىن، ياعني 21 نارۋىز كۇنى باس كوماندامىز «استانا ارەنادا» شوتلانديا قۇراماسىن قابىلدادى. قازاق جانكۇيەرلەرى بۇل ويىندى اسىعا كۇتكەنى بەكەر ەمەس ەكەن. ەۋروپا فۋتبولىنىڭ بايىرعى قۇرامالارىنىڭ ءبىرى ءبىزدىڭ ەلدە ماسقارا جەڭىلىسكە ۇشىرادى. ەسەپ - 3:0. قالاي دەسەك تە، بۇگىن قازاق جانكۇيەرلەرىنىڭ قۋانا بەرۋىنە سەبەپ جەتكىلىكتى.

FIFA رەيتينگىسىندە 38-ءشى ساتىدا تۇرعان كوماندا مەن 119-شى ساتىعا جايعاسقان قۇرامانىڭ قايسىسىنىڭ مىقتىراق ەكەنىن جاقسى بىلەتىن جۇرتشىلىق قوناقتاردىڭ قينالماي ءۇش ۇپاي الاتىنىنا انىق سەنگەن بولاتىن. ولار ءتىپتى قازاقستان قۇراماسىنىڭ ويىندى ءوز الاڭىندا وتكىزەتىنى دە كومەكتەسە المايدى دەپ ويلاعان. بىراق، اقيقات ءبارىن جوققا شىعاردى. الاڭ يەلەرى ايىق جەڭىسكە جەتتى.

سالىستىرۋ ءۇشىن ايتا كەتەيىك، گەرمانيانىڭ اتاقتى transfermarkt سايتىنىڭ مالىمەتىنشە، شوتلانديالىق فۋتبولشىلاردىڭ ترانسفەر نارىعىنداعى جالپى قۇنى 143,9 ملن ەۋرونى قۇرايدى. ال قازاقستان فۋتبولشىلارى بار بولعانى 28,43 ملن. شوتلانديا قۇراماسىنداعى ءبىر ەندريۋ روبەرتسوننىڭ ءوزى بۇكىل قازاقستان قۇراماسىنان ەكى ەسە قىمبات (بۇل ويىنشى قازاقستانعا كەلگەن جوق). وسىعان قاراماستان ءبىزدىڭ جىگىتتەر سەنساتسيا جاساپ وتىر. سوڭعى ءبىر اپتادا ەلودادان تەك سەنساتسيالى جاڭالىقتار ەستىپ ءجۇرمىز...

ويىننىڭ 6-مينۋتىندا الەكساندر مەركەل ارىپتەسى يۋري پەرتسۋحقا ادەمى پاس شىعارىپ، ونىڭ ەسەپ اشۋىنا مۇمكىندىك جاسادى. ارادا ءتورت مينۋت وتكەندە قۇراما كاپيتانى يسلامبەك قۋات تا ءدال وسىنداي ونەرىمەن كوزگە ءتۇستى. قۋاتتىڭ كەرەمەت پاسىنان كەيىن يان ۆوروگوۆسكي ويىنداعى ەكىنشى گولدى سوقتى. ءبىرىنشى تايم وسىلاي اياقتالدى. ال ەكىنشى تايمنىڭ باسىندا رەسەيدىڭ «روستوۆ» كومانداسىندا ويناپ جۇرگەن باكتيور زاينۋتدينوۆ ءۇشىنشى گولدى سوقتى. ونىڭ گول سوعۋىنا بۇگىنگى ويىننىڭ ۇزدىگى عافۋرجان سۇيىنباەۆ كومەكتەستى.

وسىلايشا، «مانچەستەر يۋنايتەد»، «ليۆەرپۋل»، «فۋلحەم»، «ساۋتگەمپتون»، «استون ۆيللا»، «سەلتيك» سىندى الپاۋىت كوماندالاردا وينايتىن فۋتبولشىلارى بار شوتلانديا قۇراماسىن جەرلەستەرىمىز وپ-وڭاي ۇتىپ كەتتى.

جەڭىسكە جەتكەن ارينە جاقسى. ءبىر وكىنىشتىسى، بۇگىن ءبىزدىڭ قۇراما ساپىندا بار بولعانى ەكى-اق قازاق ازاماتى نەگىزگى قۇرامدا شىقتى. ۇشەۋى قوسالقى قۇرامنان قوسىلدى. بۇدان بولەك، نەگىزگى قۇرامداعى 11 ويىنشىنىڭ تورتەۋى لەگيونەر. قاقپاشى دميتري نەپوگودوۆ، قورعاۋشىلار سەرگەي مالىي مەن ەۆگە́ني پوستنيكوۆ "جاڭا قازاقتار". العاشقى ەكەۋى ۋكراينادا، سوڭعىسى رەسەيدە دۇنيەگە كەلگەن. ال جارتىلاي قورعاۋشى الەكساندر مەركەل الماتىدا تۋىپ، التى جاسىندا گەرمانياعا قونىس اۋدارعان ازامات. نەمىس قۇراماسىنا كىرە الماعان سوڭ بۇرىنعى وتانىنىڭ اتىنان دوپ تەۋىپ ءجۇر.

ەۋروپا چەمپيوناتى - 2020. ىرىكتەۋ كەزەڭى.

قازاقستان — شوتلانديا 3:0 (2:0)

گول: پەرتسۋح 6 (1:0), ۆوروگوۆسكي 10 (2:0), زاينۋتدينوۆ 51 (3:0)

ەسكەرتۋ: مەركەل 38 — شينني 83

قازاقستان: نەپوگودوۆ، مالىي، ەرلانوۆ (احمەتوۆ 81), پوستنيكوۆ، قۋات، پەرتسۋح، ۆوروگوۆسكي، مۇرتازاەۆ (تۇرىسبەك 68), سۇيىمباەۆ، زاينۋتدينوۆ (مۋجيكوۆ 84), مەركەل

شوتلانديا: بەين، پالمەر، شينني، ماكگينن (ماكتومينەي 70), بەيتس، ماككەنا، فوررەست (ماكنالتي 81), ماكگرەگور، ماكبەرني (راسسەلل 61), ارمسترونگ، بەرك

باس تورەشى: سردجان يوۆانوۆيا (سەربيا)

21 ناۋرىز. استانا. «استانا-ارەنا» 27 641 كورەرمەن.

قۋانىش قاپپاس

Abai.kz