دەپارتامەنتتىڭ ءباسپاسوز حاتشىسى ايگەرىم يباتۋللاەۆا ازاتتىق ءتىلشىسىنىڭ جاڭاوزەندەگى جاعداي تۋرالى سۇراعىنا:

- ۋچاسكەلىك پوليتسيا وكىلدەرى بوس جۇمىس ورىندارى جارمەڭكەسى وتەر الدىندا ۇيلەردى ارالاپ، سوعان شاقىرتۋ حابارلاماسىن تاراتقان. قالادا جاعداي قالىپتى، تىنىش. ەشكىم قامالعان جوق، ايىپپۇل دا سالىنباعان، - دەپ جاۋاپ بەردى.

بۇعان دەيىن جاڭاوزەن قالاسىندا بيلىكتەن جۇمىس بەرۋدى تالاپ ەتكەن كەي تۇرعىندار قۇقىق ورگاندارىنىڭ وكىلدەرى جۇمىسپەن قامتۋ ورتالىعىنا كەلۋدى سۇراپ ۇيلەرىنە ءجيى بارعىشتاپ كەتكەنىن ايتىپ شاعىمدانعان بولاتىن. قالا تۇرعىنى سەرىك باقتىبايۇلى بىرنەشە تۇرعىننىڭ "كوشەدە تەمەكى تۇقىلىن تاستاعانى" ءۇشىن اكىمشىلىك جاۋاپقا تارتىلعانى جانە ءوزى دە پوليتسيا باسقارماسىنا شاقىرتۋ العانىن حابارلاعان.

2011 جىلى بىرنەشە ايعا سوزىلعان جۇمىسشىلار نارازىلىعى پوليتسيانىڭ حالىققا وق اتۋىنا ۇلاسىپ، بەيبىت ادامدار قازا تاپقان جاڭاوزەن قالاسىندا سوڭعى ەكى اپتادان بەرى الەۋمەتتىك نارازىلىق كۇشەيگەنى بايقالعان.

تۇرعىندار بيلىكتەن كەمىندە 150-200 مىڭ تەڭگە ەڭبەكاقى تولەيتىن، ۇكىمەتكە قاراستى كاسىپورىن اشۋدى تالاپ ەتكەن. بيلىك الەۋمەتتىك نارازىلىقتى باسۋ ءۇشىن 23 اقپاندا ەڭبەك جارمەڭكەسىن ۇيىمداستىرىپ، بوس جۇمىس ورىندارىنا 3 مىڭنان استام ءوتىنىش قابىلدانعانىن حابارلاعان بولاتىن.

كەي تۇرعىندار ەڭبەك جارمەڭكەسىندە اقتاۋ قالاسىنان ايلىعى 70-80 مىڭ تەڭگە بولاتىن جۇمىس ۇسىنىلعانىن، ونداي اقشا وتباسىن اسىراۋعا جەتپەيتىنىن ايتىپ نارازىلىق بىلدىرگەن.

جاڭاوزەندەگى نەگىزگى جۇمىس كوزى - "وزەنمۇنايگاز" اكتسيونەرلىك قوعامى مەن "قازاق گاز وڭدەۋ" زاۋىتى. رەسمي ستاتيستيكا بويىنشا، قالادا 130 مىڭنان استام ادام تۇرادى. 2018 جىلدىڭ العاشقى ءتورت ايىندا ماڭعىستاۋ وبلىسىندا جۇمىسسىزدىق دەڭگەيى 4,8 پايىزدى قۇراعان.

Abai.kz