وڭىردەگى دەنساۋلىق ساقتاۋ سالاسىندا وتكەن جىلى 15 نىسان سالىندى، ال بيىلعى جىلى 12 نىساننىڭ قۇرىلىسى جۇرگىزىلەدى. بۇل جايىندا بۇگىن تالدىقورعاندا وتكەن الماتى وبلىسى اكىمى اماندىق باتالوۆتىڭ ەسەپ بەرۋ كەزدەسۋىندە ايتىلدى.

بيىلعى جىلى ۇزىناعاش اۋىلىندا پەرزەنتحانا، سارقان قالاسىندا اۋداندىق اۋرۋحانا، شەلەك اۋىلدىق اۋرۋحاناسى جانە مەملەكەتتىك - جەكەمەنشىك ارىپتەستىك اياسىندا ۇزىناعاش اۋىلىندا ەمحانا قۇرىلىسى باستالادى.

«مەديتسينالىق جابدىقتارمەن قامتاماسىز ەتۋ دەڭگەيى 83%-كە دەيىن، سانيتارلىق اۆتوكولىكپەن-78%-كە دەيىن جەتكىزىلدى. "جەتىسۋ" مەديتسينالىق اقپاراتتىق جۇيەسى ەنگىزىلىپ، حالىققا ىڭعايلى بولۋ ءۇشىن موبيلدىك قوسىمشالار ىسكە قوسىلدى»، - دەدى ا. باتالوۆ.

سول سياقتى ەلەكتروندىق دەنساۋلىق پاسپورتتارى تۇرعىنداردىڭ 83%-ىندە بار ەكەندىگى (1,7 ملن.ادام), مەديتسينالىق مەكەمەلەردىڭ 53%-ءى قاعازسىز قۇجات اينالىمىنا وتكەنى، جىل سوڭىنا دەيىن تولىقتاي كوشەتىنى ايتىلدى.

"كومەك 103" جۇيەسى ىسكە قوسىلىپ، اۋىلدىق جەردە جەدەل جاردەمنىڭ كەلۋ ۋاقىتىن 15 مينۋتقا دەيىن، ال قالادا 7 مينۋتقا دەيىن قىسقارتۋعا مۇمكىندىك بەردى.

قابىلدانعان شارالار ناتيجەسىندە حالىق دەنساۋلىعىنىڭ نەگىزگى كورسەتكىشتەرى جاقسارۋدا.

«وسىنداي قابىلدانعان شارالاردىڭ ناتيجەسىندە جالپى ءولىم–جىتىم 3,6%-كە، نارەستە شەتىنەۋى – 7,2%-كە، قان اينالىمى جۇيەسى اۋرۋلارىنان قايتىس بولۋ - 7,9%-كە، قاتەرلى ىسىكتەردەن -13,3%-كە تومەندەدى»، - دەدى ءوز بايانداماسىندا وبلىس اكىمى.

وتكەن جىلى «تالدىقورعان قالاسىنىڭ كوپسالالى اۋرۋحاناسى» بازاسىندا ونكولوگيالىق اۋرۋلاردى ەرتە انىقتاۋعا ىقپال ەتەتىن احۋالدىق ورتالىق قۇرىلىپ، 13 مەديتسينالىق ۇيىمدار ىسكە قوسىلدى.

اعىمداعى جىلى پوزيتروندى ەميسسيالىق توموگرافيا ورتالىعىن اشۋ جوسپارلانىپ وتىر. بۇل ەكى جوبا دا مەملەكەتتىك-جەكەمەنشىك ارىپتەستىك نەگىزىندە جۇزەگە اسىرىلدى.

Abai.kz