بۇگىن ەرلان بالعابەكۇلى نۇرعاليەۆتىڭ تۋعان كۇنى. ول 13-قاڭتار كۇنى قاراعاندى ​​وبلىسىنىڭ نۇرا اۋدانىندا بروكونەرلەرمەن قاقتىعىس كەزىندە اۋىر جاراقات العان بولاتىن. وكىنىشكە قاراي، استانالىق دارىگەرلەر ەرلاننىڭ جانىن امان الىپ قالا المادى.

اقبوكەندەرگە اراشا بولامىن دەپ ءوز ءومىرىن قيعان ەرلاننىڭ ەرلىگى قوعامدا قىزۋ تالقىلاندى. ال، ءماجىلىس دەپۋتاتتارى وسى وقيعادان كەيىن ەرلان نۇرعاليەۆكە “حالىق قاھارمانى” اتاعىن بەرۋدى ۇسىنعان ەدى.

جامبىل احمەتبەكوۆ، ءماجىلىس دەپۋتاتى:

- بۇكىل قوعام الدىندا بەرگەن انتىن بەرىك ۇستانىپ، مەملەكەتتىك قىزمەت سالاسىندا ءجۇرىپ، سوڭىنا دەيىن كۇرەسىپ، قايتىس بولعان ءبىزدىڭ قورىقشىنى مەملەكەتتىك ماراپاتقا ۇسىنۋدى سۇراپ وتىر. كەيبىر ەرىكتىلەر ونىڭ ەسىمىن ۇلىقتاۋ ماقساتىندا قولىندا ەلىكتىڭ لاعىن ۇستاپ تۇرعان سۋرەتىنىڭ نەگىزىندە ەسكەرتكىش ورناتپاقشى. مۇنىڭ بارلىعى حالىقتىڭ ءوز باتىرىن قالاي قۇرمەتتەيتىنىن كورسەتەدى. سونىمەن قاتار، براكونەرلەرمەن كۇرەس جولىندا ەرلىك تانىتقان ەرلاننىڭ ارىپتەسى - پەتر نيتسىك تە ماراپاتقا لايىق دەپ سانايمىز", - دەگەن بولاتىن.

ال، قورىقشىنىڭ ولىمىنە كىنالىلەردىڭ اتى-جوندەرى بىرنەشە كۇن بويى ايتىلمادى. قاراقشىلار تەك ءبىر اپتادان سوڭ عانا قىزىلوردا وبلىسىنان تابىلدى دەگەن اقپارات شىقتى. الايدا، ءىىم ولاردىڭ اتى-جوندەرىن نەلىكتەن جاسىرىپ كەلگەندەرى بەلگىسىز.

قالاي دەسەك تە، ەرلان نۇرعاليەۆتىڭ قازاسى بىزدەگى زاڭنىڭ السىزدىگىن تاعى دا ءبىر دالەلدەپ بەردى. ياعني، قاراقشىلارعا تابيعاتتاعى اڭ تۇگىلى، ادامدى اتا سالۋ دا تۇك ەمەس ەكەن. تاعى ءبىر وكىنىشتىسى، ەرلان اۋىر جارالانعانىنا قاراماستان ەمحاناعا ءبىر كۇننەن كەيىن جەتكىزىلگەن. ال، سانيتارلىق اۆياتسيا ۇشاعىن پايدالانۋعا اۋا رايى قولايسىز بولىپتى-مىس.

ءتۇيىن.

ءوز كاسىبىنە ادالدىقتىڭ ۇلگىسىن كورسەتىپ كەتكەن ەرلان نۇرعاليەۆ شىن مانىندە حالىق قاھارمانى بولۋعا لايىق! سوندىقتان، ءماجىلىس دەپۋتاتتارى باستاعان ىستەرىن ورتا جولدان تاستاماي، وسىنداي ازاماتتىڭ ەرلىگىنە لايىق باعا بەرىلۋىنە اتسالىسۋ كەرەك. ال، مۇنداي ۇسىنىستى قوعام قولدايتىنى ءسوزسىز.

نۇربيكە بەكسۇلتانقىزى

Abai.kz