ول بۇل تۋرالى 29 قاڭتاردا پارلامەنت سەناتىندا وتكەن جيىندا ايتتى. سەناتتىڭ حالىقارالىق قاتىناستار، قورعانىس جانە قاۋىپسىزدىك جونىندەگى كوميتەتىندە وتكەن جيىندا سەناتور داريعا نازارباەۆا نۇرعالي بىلىسبەكوۆتەن قازاقستانداعى تەرروريزم جانە ەكسترەميزم قاۋپى قاي دەڭگەيدە ەكەنىن سۇرادى.

بىلىسبەكوۆ سيريا، يراك جانە اۋعانستانداعى قاقتىعىس ايماقتارىن ەسكەرىپ، ايماققا بەلگىلى ءبىر قاۋىپ-قاتەر ءتونىپ تۇرعانىن ايتتى. ء"بىز حالىقارالىق تەررورلىق ۇيىمدار قىزىعىپ وتىرعان ايماقتا ورنالاسقانبىز. وعان الماتىدا قاڭتاردىڭ باسىندا ۇستالعان توپ دالەل بولا الادى. ولارعا شەتەلدەن قازاقستان اۋماعىندا تەراكت جاساۋعا نۇسقاۋ بەرگەن" دەدى بىلىسبەكوۆ.

ۇقك توراعاسى ورىنباسارىنىڭ سوزىنشە، قازىر سيريا، يراك جانە اۋعانستانداعى قاقتىعىس ايماقتارىندا 300-دەن استام قازاقستاندىق ءجۇر، ولاردىڭ 100 شاقتىسى - سودىرلار قاتارىندا.

قاڭتاردىڭ 14-ءى كۇنى ۇقك ورتالىق ازيا ەلىنەن شىققان بىرنەشە ازاماتتى تەررورلىق اكت جاساۋعا دايىندالدى دەگەن كۇدىكپەن ۇستاعانىن حابارلاعان. كۇدىكتىلەر ۋاقىتشا تۇرىپ جاتقان ورىنداردى ءتىنتۋ كەزىندە "قۋاتتى جارىلعىش زاتتار جاساۋعا ارنالعان قۇرىلعىلار، قارۋ-جاراق پەن وق-دارىلەر تاركىلەنگەن".

بۇعان دەيىن 9 قاڭتاردا پرەزيدەنت نۇرسۇلتان نازارباەۆ قازاقستاننىڭ 47 ازاماتى سيريادان ورالعانىن مالىمدەگەن.

Abai.kz