2019 جىلدىڭ 6 قاڭتارى ساعات 10.00-دە قاراعاندىدا بيلىك وكىلدەرى «درەۆني ريم» مەيرامحاناسىندا ورىن العان جانجال كەزىندە كوز جۇمعان جىگىتتىڭ جاقىندارىمەن كەزدەستى، - دەپ حابارلايدى اباي-اقپارات قاراعاندى وبلىسى اكىمدىگىنىڭ ءباسپاسوز قىزمەتىنە سىلتەمە جاساپ.

كەزدەسۋ بارىسىندا تەرگەۋدىڭ جۇرگىزىلۋى جايلى تۇسىنىكتەمەلەر بەرىلدى.

بۇل ۋاقىتتا پوليتسيا دەپارتامەنتىنىڭ الدىندا اقپاراتتىڭ حابارلانۋىن كۇتكەن 200-230 ادام جينالدى.

جينالعانداردىڭ الدىندا قاراعاندى وبلىسىنىڭ اكىمى ەرلان قوشانوۆ ءسوز سويلەپ، تەرگەۋدىڭ بارىسى جايلى جانە الداعى ۋاقىتتا ىسكە اسىرىلاتىن شارالار تۋرالى تولىق اقپارات بەردى. اكىم تەرگەۋ شارالارىنىڭ قر باس پروكۋرورىنىڭ جەكە باقىلاۋىنا الىنعانىن جانە بارلىق كىنالى ازاماتتاردىڭ جازالاناتىنىن قاداپ ايتتى.

بيلىك اتالعان پروتسەسستىڭ وبەكتيۆتى جانە بارىنشا اشىق وتەتىنىنە ۋادە بەردى. قازىرگى ۋاقىتتا قۇقىق قورعاۋ ورگاندارى تاراپىنان قر قىلمىستىق كودەكسىنىڭ ادام ءولتىرۋ جانە بۇزاقىلىق باپتارى بويىنشا قىلمىستىق ءىس قوزعالدى. بۇگىنگى تاڭدا 9 قاتىسۋشى انىقتالدى، ونىڭ 8 تۇتقىنعا الىندى، 1-ەۋى حالىقارالىق ىزدەستىرۋگە جاريالاندى.

جانجال ەكى كومپانيا اراسىندا بولعانىن جانە ۇلتارالىق سيپات الماعانىن حابارلايمىز.

سونداي-اق قر قىلمىستىق كودەكسىنىڭ 274-بابى بويىنشا جالعان اقپارات تاراتۋ - بەس مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا، 7 جىلعا دەيىن باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالاناتىنىن ەسكەرتەمىز.

كەزدەسۋ بارىسىندا ەشقانداي زاڭ بۇزۋشىلىقتار تىركەلگەن جوق. قازىرگى ۋاقىتتا قالادا جانە وبلىستا جاعداي تۇراقتى، قوعامدىق ءتارتىپتىڭ بۇزىلۋىنا جول بەرىلگەن جوق.

Abai.kz