بەيسەنبى, 21 قاڭتار 2021
2696 14 پىكىر 27 جەلتوقسان, 2018 ساعات 11:52

قازاقستانعا اسىل تۇقىمدى مالدى قاي ەلدەردەن اكەلەدى

الداعى ۋاقىتتا لاتىن امەريكاسىنان اسىل تۇقىمدى مال جەتكىزۋ جوسپارلانعان، دەپ xابارلايدى اباي-اقپارات turkystan.kz-گە سىلتەمە جاساپ.

قر اۋىل شارۋاشىلىعى مينيسترلىگىنىڭ اقپاراتىنا سايكەس، بيىل شەتەلدەن 51 مىڭ ءىرى قارانى ساتىپ الۋعا قارجى بولىنگەن. وسى ۋاقىتقا دەيىن 14 مىڭ باس قازاقستانعا جەتكىزىلدى، جاقىن ارادا تاعى 3,8 مىڭ اسىل تۇقىمدى ءىرى قارا جەتكىزىلەدى. مال ونىمدەرىن وڭدەۋ مەن ءوندىرۋ دەپارتامەنتىنىڭ ديرەكتورى ەركەبۇلان اxمەتوۆتىڭ ايتۋىنشا، اسىل تۇقىمدى مالدىڭ باسىم بولىگى - رەسەي فەدەراتسياسىنىڭ ءونىمى.

«وسى ۋاقىتقا دەيىن مالدىڭ ءبىرشاما بولىگىن ەۋروپا مەن ۋكراينادان اكەلدى. سوسىن 10 مىڭنان استام باستى امەريكادان جەتكىزدى. كەلەسى جىلدان باستاپ اسىل تۇقىمدى مالدى ساتىپ الۋ گەوگرافياسى كەڭەيەدى. قازىرگى كەزدە ءبىز اۆستراليادان مال جەتكىزۋ جولدارىن پىسىقتاپ جاتىرمىز. بۇدان بولەك، لاتىن امەريكانىڭ ۋرۋگۆاي مەن چيلي سياقتى مەملەكەتتەرى بار»، - دەدى ە.اxمەتوۆ استانادا وتكەن ءباسپاسوز ءماسليxاتىندا.

ونىڭ سوزىنە قاراعاندا، اسىل تۇقىمدى مالدى جەتكىزۋشى مەملەكەتتەردىڭ ءبارى ۆەتەرينارلىق تالاپتارعا ساي كەلەدى. ال مينيسترلىكتىڭ وزىندە ءىرى قارانى تاسىمالداۋدىڭ ناقتى گرافيگى بار.

«جىل سوڭىنا دەيىن جەتكىزىلمەگەن مالدار كەلەسى جىلدىڭ ناۋرىز ايىنا دەيىن جەتكىزىلەدى. نەگىزى، جاقىن جانە الىس شەتەلدەن مالدى اكەلۋ باعدارلاماسى ەكىنشى جارتىجىلدىقتا باستالعان بولاتىن. قازىرگى كەزدە فەرمەرلەر وتىنىشتەرىن كوپتەپ تاپسىرىپ جاتىر»، - دەپ اتاپ كورسەتتى ە.اxمەتوۆ.

Abai.kz

14 پىكىر