جۇما, 5 ناۋرىز 2021
1990 13 پىكىر 25 جەلتوقسان, 2018 ساعات 12:10

بۇۇ باس اسسامبلەياسى رەسەيدىڭ قىرىمداعى ساياساتىن ايىپتادى

بۇۇ باس اسسامبلەياسى سەنبى كۇنى رەسەي اننەكسيالاعان قىرىم مەن سەۆاستوپولدەگى ادام قۇقىعى جاعدايى تۋرالى قارار قابىلدادى.

ۋكراينا ۇسىنعان قۇجاتتى 67 ەل، سولاردىڭ قاتارىندا اقش پەن ەۋروپا وداعى ەلدەرى قولداعان. ال قارسى داۋىس بەرگەن 27 دەلەگاتسيانىڭ ىشىندە رەسەي، بەلارۋس، قىتاي، سيريا، سەربيا مەن ۆەنەسۋەلا بار. 70 ەل قالىس قالعان.

قاراردا قىرىمدا ادام قۇقىعىنىڭ بۇزىلاتىندىعىن جانە رەسەيدىڭ تۇبەكتە "باسقارۋ مەن زاڭداردى زاڭسىز ورناتۋىن" ايىپتاعان.

بۇۇ باس اسسامبلەياسى بۇل ءتارىزدى قارارلاردى رەسەي قىرىمدى اننەكسيالاپ العاننان كەيىن بىرنەشە رەت ماقۇلداعان. قازىرگى قاراردىڭ بۇرىنعىلاردان وزگەشەلىگى، وندا رەسەي بيلىگى تۇتقىنداپ، سوتتاعان ۋكراينا ازاماتتارى ولەگ سەنتسوۆ، ۆلاديمير بالۋح پەن ەمير-ۋسەين كۋكۋدىڭ اتى-جوندەرى اتالعان.

"باس اسسامبلەيا رەسەي بيلىگىنىڭ 2014 جىلدان بەرى ساياسي استارى بار قۋعىن-سۇرگىندەر، سونىڭ ىشىندە ۋكراين رەجيسسەرى ولەگ سەنتسوۆتىڭ ىسىنە دە قاتىستى جالعان كۋالىكتەردى ازاپتاۋ ادىسىمەن الاتىنى تۋرالى حابارلارعا بايلانىستى قاتتى الاڭداۋشىلىق بىلدىرەدى" دەلىنگەن قاراردا. قۇجاتتا سونىمەن بىرگە رەسەي بيلىگىن نەلسون ماندەلا ەرەجەسىن (تۇتقىندارعا قارىم-قاتىناستاردىڭ ەڭ قاجەتتى ستاندارتتارى) ساقتاۋعا شاقىرعان.

رەسەيدىڭ بۇۇ جانىنداعى تۇراقتى وكىلىنىڭ ورىنباسارى گەننادي كۋزمين بۇل قۇجاتتى "تەك قانا رەسەيگە قارسى باعىتتالعان، جالعان، ەكىجۇزدى جانە مازمۇنى جاعىنان ماعىناسىز" دەپ اتاعان.

بۇعان دەيىن بۇۇ باس اسسامبلەياسى قىرىمدى ميليتاريزاتسيالاۋعا قارسى قارار قابىلداعان.

بۇۇ قاۋىپسىزدىك كەڭەسىنىڭ شەشىمىنەن وزگەشەلىگى - باس اسسامبلەيانىڭ قارارى ۇسىنىس سيپاتىندا.

رەسەي قىرىمدا 2014 جىلى اننەكسيالاپ العان. ۋكراينا، ەۋروپا وداعى ەلدەرى مەن اقش تۇبەكتى رەسەي وككۋپاتسياسىنداعى ۋكراين تەرريتورياسى دەپ بىلەدى.

Abai.kz

13 پىكىر